Հասկանում եմ, որ Հայաստանում որոշ օլիգարխիկ ու կլանային ուժեր ամեն կերպ փորձում են արժեզրկել ժողովրդավարական ընտրությունների մոդելը ներկուսակցական համակարգում, բայց ուզում եմ ասել, որ մեր ընտրություններում ընդհանրապես ժողովրդավարության կամ կեղծիքների հետ կապված որևէ միջադեպ չի եղել:
Այդ մասին լրագրողների հետ ճեպազրույցում հայտնեց ԱԺ պատգամավոր, «Քաղաքացիական պայմանագիր» կուսակցության վարչության փոխնախագահ Վահագն Ալեքսանյանը:
Նրա խոսքով՝ այսպիսի ընտրական մոդել, երբ 1000 մարդ ընտրում է մեկ քվեաթերթիկի վրա 20-30 հոգու, այս դեպքում՝ 50 հոգու, դա շատ բարդ ընտրություն է ու բարդ հաշվարկ:
«Այդտեղ կարող է լինել սխալմունք, հաշվարկի ժամանակ կարող է մեկի ձայնը շատ հաշվվել, կարող է անվավեր քվեաթերթիկն անվավեր համարվի, որովհետև պատվիրակը եթե 49 հոգու ընտրի, ապա դա անվավեր է: Սխալմունքներ կարող են լինել, բայց դա ժողովրդավարության մաս է»,- ասաց Ալեքսանյանը:
Նա ընդգծեց՝ հիմա ամբողջ քվեարկությունը լայվով է ընթանում, և ցանկացողն աշխարհի որ կետից ուզենա կարող է հետևել:
«Այսքան ժողովրդավարական ընտրություններ, ինչքան մեր նախորդ վարչության ընտրություններն էին, հուսով եմ՝ այս ընտրություններն էլ են լինելու: Ես կարծում եմ՝ կան կուսակցություններ, որ փորձել են սրա իմիտացիան անել, բայց ակնհայտ է, որ այդ կուսակցությունները մոտ չեն եղել ժողովրդավարական մոդելին, առհասարակ կապ չեն ունեցել ժողովրդավարության հետ
Նրա խոսքով՝ սա մեսիջ է մեր քաղաքացիներին, որ չի կարող ժողովրդավարական լինել մի թիմ, որ ինքն իր ներսում ժողովրդավարական չէ:
«Այսինքն՝ եթե թիմն իր ներսում ուժերի բաշխվածությունը չափում է օլիգարխի կլանի այս կամ այն պատկանելությամբ, օլիգարխի կլանում մասնաբաժինն ունենալով, ավելի մեծ քրեական հեղինակություն լինելով կամ մնացածով, այդ թիմը չի կարող երկրի համար ժողովրդավարական մոդել բերի կամ ժողովրդավարական մոդել կառուցի: Մեր կուսակցությունն էլ է իր ներսում ամեն ինչ չափում ժողովրդավարական եղանակով»,- խոսքը եզրափակեց Ալեքսանյանը:
Ավելի վաղ հայտնել էինք՝ ընթանում է 2026 թվականի հերթական ընտրություններում «Քաղաքացիական պայմանագիր» կուսակցության ընտրական ցուցակի հաստատման առաջին փուլի քվեարկությունը։
Քվեաթերթիկում ընդգրկվել են ՔՊԿ վարչության կողմից գրանցված բոլոր թեկնածուների անունները։ Քվեարկելու իրավունք ունեն համաժողովի պատվիրակները:
