Չեմ համարում, որ այստեղ անհավասարության խնդիր կա, որովհետև մենք խոսում ենք մի կոնտինգենտի մասին, որ բանակի շարքերը համալրվել են վերջին 3 տարիների ընթացքում, և մենք փորձում ենք այս համակարգը ամրացնել, բյուրեղացնել, և չեմ բացառում, որ հետագայում հաշվի առնելով որակները՝ այլ մոտիվացիոն համակարգեր կունենանք նաև այլ պայմանագրայինների մասով, ինչպիսիք, օրինակ, ունենք հատուկ նշանակության ստորաբաժանումներում: Այս մասին խորհրդարանում հայտարարեց ՀՀ պաշտպանության նախարար Սուրեն Պապիկյանը՝ պատասխանելով «Պատիվ ունեմ» խմբակցության քարտուղար Տիգրան Աբրահամյանի հարցին, որը հարց էր ուղղել նախարարին այն մասին, թե երբ մենք խոսում ենք «Պաշտպան հայրենյաց» ծրագրով 2 կամ 5 տարով պայմանագիր կնքողների մասին, արդյոք դա անհավասար դաշտ չի՞ ստեղծում պայմանագրային մյուս ծառայողների համար:
Հիշեցնենք՝ նախարարը «Զինվորական ծառայության և զինծառայողի կարգավիճակի մասին» օրենքում փոփոխություններ և լրացումներ կատարելու մասին» օրենքի նախագծի քննարկման ժամանակ տեղեկացրել էր, որ առաջարկվում է «Պաշտպան հայրենյաց» ծրագրով հնգամյա առաջին պայմանագրի ժամկետը լրանալուց հետո երկու կամ հինգ տարով հերթական պայմանագիրը կնքող զինծառայողների համար ևս նախատեսել պայմանագրի ժամկետի ավարտից հետո պատվովճար ստանալու հնարավորություն, երկու տարվա դեպքում՝ մեկուկես միլիոն, հինգ տարվա դեպքում՝ հինգ միլիոն դրամ:
Պատասխանելով ՔՊ խմբակցության պատգամավոր Արմեն Խաչատրյանի հարցին, որը հետաքրքրվում էր, թե որքան աշխատավարձ է, օրինակ, կանխատեսում ստանալ ռազմական ակադեմիան ավարտած լեյտենանտը, որը ստացել է գերազանց գնահատականներ, երբ անցնի ծառայության, Պապիկյանը ասաց՝ քանի որ խոսքը կարող է վերաբերել տարբեր զորամասերում և տարբեր մասնագիտություններով կրթություն ստացած սպաներին, արդեն առիթ ունեցել է ասելու՝ գերազանց գնահատական ստանալու պարագայում, ըստ ուղղվածությունների, նրանց աշխատավարձը կարող է տատանվել 620 հազարից մինչև 750 հազար դրամի սահմաններում:
«Բայց կարող ենք ունենալ ստորաբաժանումներ, որ այս 750 հազարից զատ, եթե անցկացնեն նաև այլ պայմաններում ծառայություն, նրանց աշխատավարձը ավելի բարձրանալու հնարավորություն կունենա, ընդհուպ մինչև 820 հազար, բայց սրանք հաճախ կարող են լինել մասնավոր դեպքեր, որովհետև վերաբերելի կարող են լինել միայն այն մարդկանց, որոնք ունեն գերազանց առաջադիմություն և համընկնում են իմ նշած պայմաններին»,- ասաց նախարարը:
Ինչ վերաբերում է «Պաշտպան հայրենյաց»-ով ծառայողներին, ասաց՝ այն կարող է տատանվել 420 հազարից մինչև 550 հազար, բայց մարտական ծառայություններ իրականացնելու պարագայում թվերը կարող են տատանվել:
«Ես առիթ եմ ունեցել նաև նշելու, որ այսօր էլ ԶՈՒ-ում, կախված իրենց մարտական ծառայությունից ու զբաղեցրած պաշտոնից, զորատեսակից, «Պաշտպան հայրենյաց» ծրագրով զինծառայողներ ունենք, որ 700 հազար դրամից ավելի աշխատավարձ են ստանում: Խոսքը մեկ-երկու հոգու մասին չէ, առիթ է եղել, երկրի ղեկավարը նաև թվեր է հրապարակել: Այդ մարդիկ գոյություն ունեն»,- ասաց Պապիկյանը:
Ինչ վերաբերում է «Պաշտպան հայրենյաց» ծրագրի շարունակականությանը, նկատեց՝ այսօրվա ծրագիրը նրա մասին է, որ ծրագիրը շարունակական է լինելու:
«Մենք ակնկալում ենք, որ այս պահին շահառուները որոշում ընդունեն պայմանագիր կնքել և երկարացնել իրենց աշխատանքը զինված ուժերում և դառնան մեր հիմնական կազմի զինծառայողներ: Այսօրվա առաջարկի էությունը հենց դա է: Բայց նաև նշեմ, որ արդեն ունենք տարեկան միջին քանակ, երբ մեր շարքային ժամկետայինները որոշում են ընդունում դառնալ պայմանագրային: Այս պահին 4500-ի մասին է խոսքը: Սա մի գործընթաց է, որ ամենօրյա ռեժիմով փոփոխության է ենթարկվում ու մշտապես՝ դրական առումով»,- խոսքը եզրափակեց պաշտպանության նախարարը:
Նշենք՝ օրենքի նախագծի համաձայն՝ վերանայվում են պայմանագրային զինծառայողների պարտադիր ատեստավորման դեպքերը, «Պաշտպան հայրենյաց» ծրագրով ծառայություն անցնող զինծառայողներն ատեստավորված են համարվելու ուսումնական փուլի ավարտին հանձնվող քննությունների արդյունքներով, պայմանով, որ զինծառայողը նշանակվել է ստացած զինվորական մասնագիտությանը համապատասխանող զինվորական պաշտոնի, իսկ ՀՀ ռազմաուսումնական հաստատություններ ավարտած և համապատասխան սպայական պաշտոնին նշանակված զինծառայողներն ատեստավորված են համարվելու ռազմաուսումնական հաստատության ավարտական քննությունների արդյունքներով:
