Ձեր նշած խոսույթն ընդհանրապես գոյություն չունի, բացակա է Վաշինգտոնում ստորագրված փաստաթղթերից: Այդ մասին ԵԽԽՎ-ում իր ելույթին հաջորդած հարցուպատասխանի ժամանակ ասաց ՀՀ վարչապետ Նիկոլ Փաշինյանը՝ արձագանքելով հարցին, թե ինչ տարբերություն կա այսպես կոչված «Զանգեզուրի միջանցքի» մասով Հայաստանի և Ադրբեջանի ընկալումների միջև:
«Դուք օգտագործում եք «Զանգեզուրի միջանցք» արտահայտությունը: Որտե՞ղ եք կարդացել այդ արտահայտության մասին: Նման արտահայտություն չկա, չի եղել և համոզվա՛ծ եղեք, որ չի լինի Հայաստանի և Ադրբեջանի համաձայնեցրած որևէ փաստաթղթում»,- ասաց նա:
Փաշինյանը հիշեցրեց՝ ՄԱԿ ասամբլեայի 80-րդ նստաշրջանի ամբիոնից ևս ստիպված է եղել անդրադառնալ այս խնդրին, և այս համատեքստում ևս մեկ անգամ հիշեցրեց, որ խաղաղությունը խնամք է պահանջում, իսկ խնամքի շատ կարևոր ատրիբուտ է լեգիտիմ, համաձայնեցված բառապաշարի գործածումը:
«ՄԱԿ ամբիոնից ելույթ ունեցա (ի դեպ, նույնը կարող եմ ասել այսօրվա ելույթի մասին) և արձանագրեցի, որ իմ ելույթի մեջ չկա մի բառ, մի արտահայտություն, որի ծագումնաբանությունը ես չեմ կարող ցույց տալ Վաշինգտոնում ընդունված փաստաթղթերից»,- ասաց նա, հիշեցրեց, որ դիմել է նաև կոչով՝ ուղղված ադրբեջանցի գործընկերոջը, որպեսզի վերջինս պարզաբանի՝ ինչ նկատի ունի՝ «Զանգեզուրի միջանցք» ասելով, որտեղ է այդ «Զանգեզուրի միջանցքը»:
«...Քարտեզի վրա պետք է ցույց տա «Զանգեզուրի միջանցքը», որովհետև եթե պարզվի, որ «Զանգեզուրի միջանցք» ասելով՝ նկատի ունեն Հայաստանի որևէ տարածք, [ապա] որևէ մեկն իրավունք չունի ՀՀ ինքնիշխան տարածքի վրա անուն դնել, որն ընդունված չէ ՀՀ-ի կողմից: Դա արդեն իսկ ձեռք բերված ինքնիշխանության փոխադարձ ճանաչման կոպտագույն խախտում է»,- ասաց նա, ապա, խոսքն ուղղելով հարց տվողին, հետաքրքրվեց. «Ինձ շատ հետաքրքիր է՝ որտեղի՞ց գիտեք այդ արտահայտությունը, որտե՞ղ եք կարդացել... Տեսե՛ք, դուք վաշինգտոնյան համաձայնությունների մասին եք խոսում, բայց օգտագործում եք բառապաշար, որը Վաշինգտոնի որևէ փաստաթղթի մեջ չկա, չի եղել, և ավելի վնաս է բերում խաղաղության գործընթացին, որովհետև ուղիղ կերպով խախտում է պայմանավորվածությունները, և դուրս է օգտագործվող լեգիտիմ բառապաշարից»:
Փաշինյանը ևս մեկ անգամ հիշեցրեց՝ Վաշինգտոնում կողմերը պայմանավորվել են, որ տարածաշրջանի հաղորդուղիները կբացվեն երկրների տարածքային ամբողջականության, ինքնիշխանության, իրավազորության հիման վրա և փոխադարձության սկզբունքով, ապա ընդգծեց, որ Հայաստանը Ադրբեջանի համար, Ադրբեջանը Հայաստանի համար այդ հաղորդուղիները պետք է բացի և՛ ներքին, և՛ երկկողմ, և՛ միջազգային հաղորդակցությունների համար: Նաև հիշեցրեց, որ Հայաստանի տարածքում գործելու է «Թրամփի ուղին», և որ այս փաստաթղթի տակ ստորագրել է նաև Ադրբեջանի նախագահը:
«Հետևաբար, իմ կոչն ու ակնկալիքն է, որ օգտագործվի բացառապես լեգիտիմ բառապաշար, իսկ Ադրբեջանի գործընկերներից ակնկալում եմ, որ նրանք քարտեզի վրա ցույց տան, թե որտեղ նկատի ունեն, ո՞ր հատվածն են անվանում «Զանգեզուրի միջանցք»: Եթե դա որևէ կերպ վերաբերում է ՀՀ ինքնիշխան տարածքին, ապա, կներեք, ՀՀ տարածքում անուններ որոշելու իրավունք ունի միայն ՀՀ-ն: Հակառակ գործելակերպը նշանակում է Հայաստանի ինքնիշխանության խախտում, ինչի շուրջ բարձրագույն մակարդակով հրապարակային ձեռք է բերվել պայմանավորվածություն:
Էլի եմ ասում, ՀՀ տարածքի պարագայում կարող են օգտագործվել միայն այնպիսի անուններ, բառամթերք, որ սահմանված է կա՛մ ՀՀ կառավարության, կա՛մ խորհրդարանի, կա՛մ համապատասխան մարմինների կողմից, կա՛մ համաձայնեցված է Հայաստանի կառավարության հետ:
Հետևաբար, թույլ տվեք ասել՝ ես խստորեն դատապարտում եմ Ձեր կողմից ապալեգիտիմ բառապաշարի օգտագործումն այս հեղինակավար դահլիճում և ինստիտուտում»,- ասաց Փաշինյանը՝ խոսքն ուղղելով հարց տվողին:
