Եթե անկեղծ լիներ մեր ընդդիմությունը, առնվազն կարձանագրեր, որ քաղաքական մեծամասնությունը թափանցիկության ու հաշվետվողականության առումով մեկ քայլ առաջ է արել: Այդ մասին Ազգային ժողովի՝ մայիսի 13-ի նիստին ասաց «Քաղաքացիական պայմանագիր» խմբակցության պատգամավոր Վահագն Ալեքսանյանը՝ իր խոսքում շնորհակալություն հայտնելով ՔՊ-ին նրա համար, որ խորհրդարանում ստեղծել է ձևաչափ, որի համաձայն՝ ԱԺ-ի առաջ հաշվետու են ՔԿ-ի նախագահը, Հակակոռուպցիոն կոմիտեի նախագահը:
Դիմելով ընդդիմադիր գործընկերներին՝ նկատեց՝ ինքը կարող է պատկերացնել, թե ինչ կարող էր տեղի ունենալ, եթե նրանց իշխանության ժամանակ Քննչական կոմիտեի նախագահը գար, կանգներ ԱԺ ամբիոնի մոտ, ինչ հարցեր կտրվեին, ու ինչ խայտառակ տեսարաններ կունենային:
Անդրադառնալով ընդդիմադիր պատգամավոր Արթուր Խաչատրյանի քննադատությանը, թե ինչու չի բացահայտվում Պողոս Պողոսյանի սպանությունը, հիշեցրեց՝ ինչ է տեղի ունեցել այդ սպանության դեպքով:
«Պողոս Պողոսյանը, ըստ հրապարակումների, սրճարանում տեսել է Ռոբերտ Քոչարյանին, ասել է՝ պրիվետ, Ռոբ, դրանից հետո Քոչարյանի թիկնապահները տարել են զուգարան և սկսել են ծեծել Պողոս Պողոսյանին: Պողոսյանը մահացել է: Ըստ դատաբժշկական փորձաքննության՝ մահացել է սրտի կանգից: Այսինքն՝ մարդուն տարել են զուգարան, սկսել են ծեծել ձեր կուսակցական ընկերոջը, մարդը մահացել է: Ուղղակի զարմանալի զուգադիպությամբ իր ծեծվելու ընթացքում սիրտը կանգնել է: Ոնց որ ծեծողները այդքան էլ մեղավոր չեն, սիրտն է կանգնել: Հիմա ասում եք՝ ինչի չեք բացահայտում: Ուզում եմ հասկանամ՝ ի՞նչը պետք է բացահայտել այսքան տարի հետո, ո՞նց պետք է դա բացահայտել»,- դիմելով Խաչատրյանին՝ ասաց Ալեքսանյանը:
Նրա խոսքով՝ կա օբյեկտիվ իրականություն՝ ակնհայտ է, որ նոր դատաբժշկական փորձաքննություն կատարելը ֆիզիկապես անհնար է:
«Գրեթե անհնար է այդ գործը նորմալ բացահայտելը»,- հավելեց Ալեքսանյանը՝ նշելով, որ դա կարող է տեղի ունենալ միայն այն դեպքում, եթե ծեծողներից մեկը խոստովանի, որ այնքան են ծեծել, մինչև Պողոսյանը մահացել է:
Անդրադառնալով Խաչատրյանի՝ անմեղության կանխավարկածը հարգելու հայտարարությանը, ՔՊ պատգամավորը հարց ուղղեց՝ ում անմեղության կանխավարկածը՝ Ռոբերտ Քոչարյանի՞, որը համաձայնել է իր գործը ոչ արդարացնող հիմքով կարճել:
«Ի՞նչ անմեղության կանխավարկած կա այդտեղ: Կներեք, բայց չկա: Չի՛ կարող այդտեղ անմեղության կանխավարկած լինել: Այդտեղ ավելի շատ մեղավորության կանխավարկած կա, պարո՛ն Խաչատրյան: Դա մեղավորության կանխավարկած է, եթե մարդը համաձայնում է իր մասնակցությամբ գործը ոչ արդարացնող հիմքով կարճել»,- ասաց նա:
Ինչ վերաբերում է Խաչատրյանի պնդումներին, թե իշխող ուժի կողմից կոռուպցիայի մասին անհասցե մեղադրանքներ են հնչեցվում, պատասխանեց՝ դրանից ավելի հասցեական չի լինում:
«Այդ ապօրինի գույքերը, այդ կոռուպցիայի դրսևորումները մեր քաղաքացիները, մենք էլ ներառյալ, անգիր գիտենք: Շենքի նախագծով կարող են ասել՝ որ տունն ումն է: Ամենօրյա ռեժիմով Հակակոռուպցիոն դատարանը վճիռներ է կայացնում ապօրինի գույքի բռնագանձման մասին, ու սա այլևս անդառնալի է ձեզ համար, քանի որ ձեր վերջին մարտը հանուն ապօրինի գույքի ՍԴ-ում տանուլ տվեցիք: Կարելի է ասել, դա ձեր Վատերլոոն էր, հարգելի գործընկիերներ: Վստահեցնում եմ ձեզ, որ այդ Վատերլոոյի հետևանքերը դուք դեռ երկար եք քաշելու, որովհետև սա անշրջելի պրոցես է»,- հավելեց պատգամավորը:
Նրա խոսքով՝ անհնար է լինել կոռուպցիայի դեմ պայքարող մարդ ու պայքարել, որ ապօրինի գույքի բռնագանձման մասին օրենքը ճանաչվի հակասահմանադրական: Այդ դեպքում ստացվում է, որ պայքարում ես ոչ թե կոռուպցիայի դեմ, այլ հանուն կոռուպցիայի:
Ինչ վերաբերում է շինարարության ոլորտում արձանագրված թերությունների մասին ընդդիմադիրների մեղադրանքներին՝ պատգամավորը, դիմելով ընդդիմադիր գործընկերներին, նկատեց՝ շինարարության 70-80 տոկոսը պատկանում է երկու խմբակցությունների հետ փոխկապակցված մարդկանց:
Որպես օրինակ՝ Ալեքսանյանը բերեց Ռոբերտ Քոչարյանի խնամու շինարարական ընկերությունը, որը տենդերներ է շահում ու ճանապարհներ կառուցում:
