Վոլոդիմիր Զելենսկին հայտարարել է, որ Ուկրաինայի ռազմարդյունաբերական համալիրը պետք է մեծացնի անօդաչու թռչող սարքերի արտադրությունը: Նրա խոսքով՝ հարկավոր է Ռուսաստանի դեմ օրական 1000 ԱԹՍ արձակել: Ուկրաինայի նախագահը նշել է, որ այժմ միջինում 300 սարք են արձակում:
«Ռուսներն ընտրել են ահաբեկչությունն ուժեղացնելու մարտավարություն։ Կիևում անդադար օդային տագնապներ են հնչում»,- մտահոգություն է հայտնել Զելենսկին։
Այնուհանդերձ, ըստ նախագահի՝ ուկրաինական հարվածներն էլ արդյունք են տալիս, օրինակ՝ Ռուսաստանում վառելիքի պակաս կա:
Զելենսկին նաև տեղեկացրել է, որ Վաշինգտոնից տեղեկություն են ստացել վերջերս ամերիկյան և ռուսական կողմերի շփումների մասին, որոնք տեղի են ունեցել Մոսկվայում:
«Շնորհակալ ենք Ռուսաստանի հետ շփումներում ճիշտ տոնայնության համար: Վաշինգտոնը բավականին իրատեսական ըմբռնում ունի, թե ուր է հարկավոր շարժվել»,- եզրափակել է Զելենսկին:
