Ադրբեջանի նախագահ Իլհամ Ալիևը, ելույթ ունենալով «Դեպի նոր աշխարհակարգ» թեմայով համաժողովում, անդրադարձել է Հայաստանի հետ հարաբերություններին: Ալիևի խոսքով՝ եթե Հայաստանն ու Ադրբեջանը ստորագրեն խաղաղության պայմանագիր, ապա դա կարող է համագործակցության մեկնարկի համար ազդանշան լինել:
«Հայաստանի հետ որևէ տնտեսական ինտեգրման մասին խոսելը վաղաժամ է, իսկ արագ բարեկամանալն՝ անիրատեսական, սակայն առաջին քայլերը հնարավոր է անել»,- նշել է Ալիևը:
Նա նշել է, որ վրացական կողմը մի քանի նախաձեռնություն է առաջարկել, որոնց Բաքուն դրական է արձագանքել, և այժմ սպասում են Երևանի պատասխանին։
«Խոսքը լրագրողների փոխայցելությունների և անդրսահմանային գետերի հարցով համատեղ քննարկումների մասին է»,- նշել է Ադրբեջանի նախագահը:
Ալիևը հայտարարել է նաև, որ Բաքուն չի կատարի Մարդու իրավունքների եվրոպական դատարանի կայացրած որոշումները: Նա բացատրել է, որ դրա պատճառը Եվրոպայի խորհրդի խորհրդարանական վեհաժողովում ադրբեջանական պատվիրակության լիազորությունների դադարեցումն է։
«Եթե պատվիրակությունը չմասնակցի Վեհաժողովի նիստերին և չկարողանա քվեարկել Մարդու իրավունքների եվրոպական դատարանի դատավորների ընտրության օգտին, ապա Ադրբեջանի վերաբերյալ այս դատարանի որոշումները կհամարվեն անվավեր։ Մենք զրկված ենք ձայնի իրավունքից»,- հայտարարել է Ալիևը:
Ադրբեջանի նախագահը համաժողովում անդրադարձել է նաև Իրանի հետ Բաքվի հարաբերություններին: Խոսելով Իրանում Ադրբեջանի դեսպանատան դեմ իրականացված զինված հարձակման մասին՝ Ալիևը նշել է, որ Բաքուն չի մոռանում ողբերգական իրադարձությունը․
«Մեր երկրների միջև հարաբերությունները լիովին կարգավորելու համար անհրաժեշտ է, որ այդ ահաբեկիչը և նրա թիկունքում կանգնածները պատասխանատվության ենթարկվեն և պատժվեն»։
Ալիևը նաև հայտնել է, որ այս ամիս նախատեսվում է Իրանի նախագահի այցն Ադրբեջան, ինչը կարևոր է երկկողմ հարաբերությունների և տարածաշրջանի զարգացման տեսանկյունից։
«Մենք ցանկանում ենք լավ հարաբերություններ ունենալ մեր բոլոր հարևանների, այդ թվում՝ Իրանի հետ։ Թեհրանի հետ ունենք տրանսպորտային և տնտեսական լայն օրակարգ»,- հայտարարել է Ադրբեջանի նախագահը:
Միջազգային նորությունները՝ Մերի Ներսիսյանի ռեպորտաժում։
