Ժամը 14:30-ի դրությամբ Գյումրիում գրանցվել է 19 խախտում, Փարաքարում՝ 14: Մասնավորապես՝ արձանագրել ենք վիճաբանության 4 դեպք, բաց քվեարկության՝ 3, դիտորդի իրավունքների խախտման 2 դեպք, որից 1-ը՝ Փարաքարում, 1-ը՝ Գյումրիում: Այդ մասին հայտարարեց «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը՝ ժամը 14:30-ի դրությամբ ներկայացնելով «Անկախ դիտորդ» դաշինքի շրջիկ դիտորդական առաքելության տվյալները:
«Փարաքարինը այդքան լուրջ չէր, Գյումրիինը 31/37 ընտրական տեղամասում լուրջ էր: Դրա հետ կապված՝ գլխավոր դատախազին հանցագործության մասին հաղորդումն արդեն հասցեագրել ենք. խոսքը մեր դիտորդի մասին է»,- ասաց նա:
6 դեպք է արձանագրվել, երբ ընտրատեղամասում գտնվելու իրավունք չունեցող անձը շարունակաբար գտնվել է տեղամասում: 6 դեպքերից 5-ն արձանագրվել է Գյումրիում, 1-ը՝ Փարաքարում:
Վստահված անձի կողմից իրականացվող ընթացակարգային խախտումներից 9 դեպք է գրանցվել, որոնցից կեսը՝ կոնկրետ 1 կուսակցության մասով: Դանիելա Իոաննիսյանը մինչև 20:00-ն կոռեկտ չհամարեց հայտարարել, թե կոնկրետ որ կուսակցության մասին է խոսքը, և խոստացավ խոսել այդ մասին 20:00-ից հետո:
Վիճաբանության 4 դեպք է գրանցվել որոնցից 1-ը՝ Փարաքարում, 3-ը՝ Գյումիրում: Քվեաթերթիկ չտալու մի դեպք է արձանագրվել, բայց կասկած կա, որ այդ երևույթը պարբերական բնույթ է կրել տվյալ ընտրատեղամասում:
«Այդ արձանագրումից հետո ընտրողներ հայտնվեցին, որոնք ասացին, որ իրենք էլ էին պակաս քվեաթերթիկ ստացել, և կոնկրետ 1 կուսակցության քվեաթերթիկ էին պակաս ստացել»,- ասաց Իոաննիսյանը:
31/70 ընտրատեղմասում տեղի է ունեցել քվեարկության կտրոնի հափշտակության դեպք: Այս դեպքով ոստիկանները հետապնդել են քաղաքացուն:
«Քաղաքացին հափշտակել է ինքն իր քվեարկության կտրոնը: Ոստիկանները փորձեցից նույնիսկ հետապնդել: Առանձին քննարկման առարկա է ոստիկանների պահվածքը, քանի որ 3 ոստիկաններից մեկը փորձում էր բռնել, բայց դա չէր ստացվում, իսկ մյուս ոստիկանները՝ համայնքային ոստիկանության լեյտենանտը, ոստիկանության զորքերի սերժանտը, ուղղակի չէին օգնում իրենց ծառայակցին, և ավելի շատ հետաքրքրված էին նրանով, որ լրագրողները չնկարեին տեղի ունեցողը. շատ մտահոգիչ էր ոստիկանների պահվածքը»,- ասաց նա:
Ըստ Իոաննիսյանի՝ մտահոգիչ են եղել նաև երեկ ու այսօր լռության ռեժիմի խախտման հետ կապված դեպքերը: Քվեարկության նախորդ օրը և մինչև 20:00-ն արգելվում է քարոզչությունը, բայց եղել են մի շարք սուբյեկտներ՝ թե՛ կուսացություններ, թե՛ քաղաքացիներ, որոնք բացահայտ նախընտրական քարոզչություն են արել:
Իոաննիսյանը նկատեց, որ «կրիմինալը» ևս ընտրությունների նկատմամբ անտարբեր չէ: Առավոտյան Գյումրիի մի շարք ընտրատեղամասերում մասնացության պիկ է գրանցվել, ինչը, ըստ նրա, խնդրահարույց է:
«Որոշակի ինդիկատորներ ունենք, որոնք վկայում են, որ, այո՛, կրիմինալն ընտրությունների նկատմամբ անտարբեր չէ»,- ասաց նա:
