Արագածոտնի մարզում վարչապետը ծանոթացել է 2023-ին իրականացված աշխատանքներին և ընթացքի մեջ գտնվող ծրագրերի ընթացքին

Վարչապետ Նիկոլ Փաշինյանն այցելել է Արագածոտնի մարզ, ծանոթացել 2023 թվականին իրականացված աշխատանքներին և ընթացքի մեջ գտվող ծրագրերին:

Նիկոլ Փաշինյանի առաջին կանգառը եղել է Աշտարակ համայնքում: Սուբվենցիոն ծրագրով համայնքի 25 բնակավայրերում իրականացվել են 22.4 կմ ասֆալտապատման աշխատանքներ: Ծրագրի ընդհանուր արժեքը 2 մլրդ 142,5 մլն դրամ է, որից կառավարությունը հատկացրել է 749,8 մլն դրամ:

Աշտարակում կառավարության ղեկավարն այցելել է նաև նոր կառուցված խաղադաշտ: Ընդհանուր առմամբ Աշտարակ և Բազմաղբյուր բնակավայրերում կառուցվել է 4 խաղադաշտ: Ծրագրի արժեքը 267,3 մլն դրամ է, որից 93,5 մլն դրամը հատկացրել է Կառավարությունը:

Հաջորդիվ՝ վարչապետին Աշտարակում ներկայացվել են տուֆ քարով սալապատված փողոցները: Նման աշխատանքներ են իրականացվում նաև համայնքի Ավան, Բյուրական, Լեռնարոտ, Ոսկեվազ, Վերին Սասունիկ և Ուջան բնակավայրերում։ Ծրագրի արժեքը 265 մլն 920 հազար դրամ է, որից Կառավարությունը հատկացրել է 132,9 մլն դրամը: Սալապատված փողոցների ընդհանուր երկարությունը կլինի 2.5 կմ:

Կառավարության ղեկավարի հաջորդ կանգառը եղել է Սասունիկում, որտեղ կառուցվում է միջնակարգ դպրոց՝ Սեյսմիկ անվտանգության բարելավման ծրագրի շրջանակում՝ Ասիական զարգացման բանկի և ՀՀ կառավարության համաֆինանսավորմամբ: Ծրագրի ընդհանուր արժեքը կազմում է 2 մլրդ 350 մլն դրամ: Երկհարկանի դպրոցը նախատեսված է 432 աշակերտի համար: Շինարարական աշխատանքներն ավարտին կհասցվեն 2025 թվականին:

Այնուհետև Նիկոլ Փաշինյանը ծանոթացել է Աշտարակի բժշկական կենտրոնի վերակառուցման աշխատանքներին: Ծրագիրը ֆինանսավորվում է ՀՀ պետական բյուջեի միջոցներով, արժեքը 1 մլրդ 289 մլն դրամ է: Ծրագրի իրականացման արդյունքում կստեղծվի վերակառուցված և կահավորված հիվանդանոց: Աշխատանքներն ավարտին կհասցվեն 2025 թվականին:

Կառավարության ղեկավարին է ներկայացվել Մ-3 միջպետական նշանակության ավտոճանապարհի 3,9 կմ հատվածի հիմնանորոգման աշխատանքների ընթացքը։ Ծրագրի նպատակով Կառավարությունը հատկացրել է 1 մլրդ 798 մլն դրամ: Աշխատանքները կավարտվեն մոտ ժամանակներս:

Ապարան համայնքում վարչապետը ծանոթացել է Շենավան բնակավայրում սուբվենցիոն ծրագրով նոր մանկապարտեզի կառուցման աշխատանքներին։ Ծրագրի արժեքը 282,9 մլն դրամ է, որից 198 մլն դրամը հատկացրել է Կառավարությունը: Մանկապարտեզը նախատեսված է 60 երեխայի համար: Արդեն իսկ կատարվել է շինարարական աշխատանքների 85%-ը:

Կառավարության ղեկավարին ներկայացվել են Ապարան, Արագած, Արայի, Ափնագյուղ, Եղիպատրուշ, Ծաղկաշեն, Լուսագյուղ, Կայք, Չքնաղ, Թթուջուր, Ձորագլուխ, Վարդենիս, Վարդենուտ, Մելիքգյուղ, Քուչակ, Հարթավան, Շենավան,Սարալանջ և Նիգավան բնակավայրերի ներհամայնքային ճանապարհների ասֆալտապատման աշխատանքները: Ծրագրի արժեքը 772 մլն դրամ է, որից 386 մլն դրամը տրամադրել է Կառավարությունը: Ծրագրի իրականացման արդյունքում Ապարան քաղաքի փողոցների և բնակելի շենքերի բակային տարածքների և Ապարան համայնքի 19 գյուղական բնակավայրերում իրականացվում են 9,7 կմ երկարությամբ ասֆալտապատման աշխատանքներ:

Ճանապարհաշինարարական ծրագրերի շրջանում Նիկոլ Փաշինյանին ներկայացվել են նաև Տ-1-44,/Մ-3/ (Ապարան)-Լուսագյուղ ավտոճանապարհի 3 կմ հատվածի հիմնանորոգման աշխատանքները: Ծրագրի արժեքը 892,5 մլն դրամ է։ Աշխատանքները ընթացքի մեջ են, ավարտը նախատեսված է մոտ ժամանակներս: Վերը ն՛շված ճանապարհը հետագայում կշարունակվի մինչև Հանքավան։

Ալագյազ համայնքի Ռյա-Թազա բնակավայրում վարչապետը շփվել է գյուղացիների հետ, ծանոթացել կաթի մթերման գործընթացին: Նիկոլ Փաշինյանը նկատել է, որ կաթի մթերման գնի հետ կապված գրեթե ամեն տարի առաջանում են խնդիրներ: Վարչապետի խոսքով՝ լուծումը անցումն է դեպի «խելացի անասնագոմ», որի արտադրական շղթայում մարդու ձեռքը չի կպնում, ինչը միանգամից ազդում է գնի վրա: Կառավարության ղեկավարը շեշտել է, որ վերոնշյալ ծրագրի առավելությունն ու արդյունավետությունն ակնհայտ է:

Վարչապետն այցելել է նաև /Մ-3/ - Լեռնապար ավտոճանապարհի հիմնանորոգված 3,8 կմ հատված: Ծրագրի արժեքը 537,8 մլն դրամ է։

Մարզային այցի շրջանակում վարչապետի հաջորդ կանգառը եղել է Ալագյազի մոդուլային մանկապարտեզում, որի կառուցումը ֆինանսավորվում է ՀՀ պետական բյուջեի միջոցներով: Ծրագրի նպատակով Կառավարությունը հատկացրել է 863 մլն դրամ: Նախատեսվում է կառուցել 144 տեղ հզորությամբ մանկապարտեզ: Կառույցի հենակմախքը մետաղական է, հիմքերը՝ երկաթբետոնից, ժապավենային: Մանկապարտեզի մասնաշենքը մեկհարկանի է: Այն շահագործման կհանձնվի այս տարվա ընթացքում:

Ալագյազում կառավարության ղեկավարը ծանոթացել է նաև համայնքային կենտրոնի կառուցման աշխատանքների ընթացքին։ ՀՀ կառավարության և Համաշխարհային բանկի համաֆինանսավորմամբ Սոցիալական ներդրումների և տեղական զարգացման ծրագրի ընդհանուր արժեքը կազմում է 348,1 մլն դրամ: Համայնքի կողմից ներդրման չափը կազմում է 4% կամ 13,9 մլն դրամ: Կառուցվում է միահարկ համայնքի կենտրոն, որը ըստ իր ֆունկցիոնալ յուրահատկության բաժանված կլինի երեք հատվածամասերի: Կոնստրուկտիվ առումով ևս շենքը բաղկացած կլինի երեք մասնաշենքից՝ մուտքային հատված, դահլիճային մասնաշենք և խոհանոցային մասնաշենք: Աշխատանքները մեկնարկել են 2023 թվականին: Ավարտը նախատեսված է ընթացիկ տարում: Ալագյազում կառուցման փուլում են նաև ըմբշամարտիկներ Ռոման և Մալխաս Ամոյանների անվան մարզադպրոցը, իսկ հանրակրթական դպրոցի նախագծման աշխատանքներն ընթացքի մեջ են:

Շամիրամ համայնքում իրականացվել են ներհամայնքային փողոցների ասֆալտապատման աշխատանքներ։ Ծրագրի արժեքը 32,8 մլն դրամ է, որից 11,5 մլն դրամը հատկացրել է Կառավարությունը: Վարչապետը նաև զրուցել է Շամիրամի բնակիչների հետ:

Վարչապետին են ներկայացվել Հյուսիս-հարավ մայրուղու ներդրումային ծրագրի (Տրանշ 2) շրջանակում իրականացվող Մ1 Երևան-Գյումրի-Բավրա ավտոճանապարհի 34 կմ հատվածի շինարարական աշխատանքները: Ծրագրի արժեքը 75,9 մլն դոլար է: Աշխատանքների ավարտը նախատեսված է 2025 թվականին:

Մեծաձոր խոշորացված համայնքում վարչապետին ներկայացվել է, որ «Սոցիալական ներդրումների և տեղական զարգացման ծրագրի լրացուցիչ ֆինանսավորում» շրջանակում կոմունալ ծառայությունների բարելավման կապակցությամբ համայնքին տրամադրվել է 1 միավոր տրակտոր, 1 միավոր ձեռքի խոտհնձիչ և 1 միավոր խոտի հակավորիչ: Պայմանագրի արժեքը 15,9 մլն դրամ է:

Նույն համայնքում Նիկոլ Փաշինյանը ծանոթացել է Մեծաձոր և Օթևան բնակավայրերի խմելու ջրի ներքին ցանցի կառուցման աշխատանքներին։ Ծրագրի արժեքը 10,2 մլն դրամ է, որից 8,1 մլն դրամը տրամադրել է Կառավարությունը: Ծրագրի իրականացման արդյունքում Մեծաձոր համայնքի Մեծաձոր և Օթևան բնակավայրերում իրականացվել են խմելու ջրի ներքին ցանցի կառուցման աշխատանքներ: Մեծաձոր բնակավայրում կառուցվել է 500մ խմելու ջրագիծ, իսկ Օթևանում՝ 600 մ ջրագիծ:

Մեծաձոր և Օթևան բնակավայրերում իրականացվել են նաև ներհամայնքային փողոցների սալարկման աշխատանքները: Ծրագրի արժեքը 34,3 մլն դրամ է, որից 25,7 մլն դրամը հատկացրել է Կառավարությունը:

Կառավարության ղեկավարն այնուհետև ծանոթացել է Թալինի ավագ դպրոցի մարզադահլիճի կառուցման աշխատանքներին և ստեղծված պայմաններին։ Նշվել է, որ ծրագիրը ֆինանսավորվում է ՀՀ պետական բյուջեի միջոցներից, արժեքը 189,2 մլն դրամ է։

Վարչապետն այցելել է նաև Արևուտ խոշորացված համայնք, որտեղ Սոցիալական ներդրումների և տեղական զարգացման ծրագրի շրջանակում համայնքի կոմունալ ծառայությունների բարելավման նպատակով համայնքին տրամադրվել է 1 միավոր բազմաֆունկցիոնալ էքսկավատոր, 1 միավոր հիդրոմուրճ, 1 միավոր փոքր շերեփ: Ծրագրի արժեքը 28,3 մլն դրամ է:

Վարչապետը հաջորդիվ ծանոթացել է Տ-1-63,/Հ-81/ (Թաթուլ) – Կանչ – Հակո ավտոճանապարհի 12,1 կմ հատվածի հիմնանորոգման աշխատանքների ընթացքին։ Ծրագրի արժեքը 1 մլրդ 337,4 մլն դրամ է։ Աշխատանքների ավարտը նախատեսված է ընթացիկ տարում:

Կառավարության՝ կրթական օբյեկտների շենքային պայմանների բարելավում ծրագրի շրջանակում Արտենիի թիվ 1 միջնակարգ դպրոցի հանդիսությունների դահլիճի վերանորոգման աշխատանքներն են ներկայացվել վարչապետի մարզային այցի շրջանակում։ Ծրագրի արժեքը 9,8 մլն դրամ է: Դահլիճի ամբողջական կահավորման համար դպրոցի միջոցներից 5,5 մլն դրամի հատկացմամբ ձեռք է բերվել գույք։ Ծրագրի իրականացման արդյունքում դպրոցի հանդիսությունների դահլիճն ամբողջությամբ վերանորոգվել է: Այստեղ վարչապետ Փաշինյանին են ներկայացվել նաև 2023 թվականին Արագածատնի մարզում իրականացված դպրոցների վերանորոգման և վերակառուցման աշխատանքները:

Նիկոլ Փաշինյանն այցելել է նաև Արագածավանի թիվ 1 միջնակարգ դպրոց, ծանոթացել կառուցման աշխատանքներին: 432 աշակերտի համար նախատեսված դպրոցը կառուցման արժեքը 2 մլրդ 327,3 մլն դրամ է: Ծրագիրն իրականացվում է ՀՀ կառավարության և Ասիական զարգացման բանկի համաֆինանսավորմամբ: Շինաշխատանքների ավարտը նախատեսվում է 2025 թ․-ին:

Վարչապետի վերջին կանգառը եղել է Արագածավանի ինտենսիվ այգիներում, որոնք ստեղծվել են պետության սուբսիդավորմամբ գյուղատնտեսական վարկի միջոցով: Ըստ այդմ՝ «Կովկասի Ագրո» ընկերության կողմից ստեղծվել է 100 հա տանձենու այգի, որի համար տրամադրվել է 1 մլրդ 490 մլն գյուղատնտեսական վարկ՝ 13.5 %-ով, որից 9.5 % սուբսիդավորվում է պետության կողմից: «Ֆան Ֆրութ» ընկերության կողմից ստեղծվել է 100 հա տանձենու այգի, որի համար տրամադրվել է 1 մլրդ 980 մլն գյուղատնտեսական վարկ՝ 13.5 %-ով, որից 9.5 % սուբսիդավորվում է պետության կողմից: 82 հա դեղձի այգի հիմնելու համար էլ տրամադրվել է 1 մլրդ 500 մլն գյուղատնտեսական վարկ՝ 14 %-ով, որն ամբողջությամբ սուբսիդավորվում է պետության կողմից:

Դիտումների քանակ78