ՀՀ կրթության, գիտության, մշակույթի և սպորտի նախարարի տեղակալ Արթուր Մարտիրոսյանը մասնակցել է «Կոկա-կոլա ՀԲՔ Արմենիա» ընկերության «Երիտասարդների զարգացում» ծրագրի նոր փուլի մեկնարկին:
Ծրագրի բացման արարողությունը տեղի է ունեցել Հայաստանում ֆրանսիական համալսարանում: ԿԳՄՍ նախարարի տեղակալ Արթուր Մարտիրոսյանը շնորհակալություն է հայտնել «Կոկա-կոլա ՀԲՔ Արմենիա» ընկերությանը՝ Հայաստանում ոչ ֆորմալ կրթական ծրագրերի իրականացմամբ երիտասարդների ներուժի բացահայտմանը միտված նախաձեռնության համար:
ԿԳՄՍ փոխնախարարն ընդգծել է, որ ՀՀ Կառավարության 2021-2026 թթ. ծրագրում առանձին բաժնով ներկայացված են երիտասարդական քաղաքականության կարևոր ուղղությունները: «Պետության առաջնահերթություններից է ստեղծել առավելագույն հնարավորություններ երիտասարդների ներուժի բացահայտման և կարողությունների զարգացման համար: Այս նպատակով դրամաշնորհային հատկացումների միջոցով իրականացվում են տարբեր միջոցառումներ, այդ թվում՝ մեդիագրագիտության, ֆինանսական գրագիտության, ձեռներեցության, փափուկ հմտությունների զարգացման դասընթացներ:
Առանձնակի շեշտադրված են մարզաբնակ երիտասարդների ներգրավման, հմտությունների ձեռքբերման հանգամանքները, ինչի նպատակով մարզերում երիտասարդական կենտրոններ են բացվում: Առաջիկա ամիսներին 2 կենտրոն կբացվի՝ մեկը Տավուշում` Իջևանում, մյուսը՝ Սյունիքում` Մեղրիում: Մինչև 2026 թվականը նախատեսվում է ՀՀ ամբողջ տարածքում բացել 25 երիտասարդական կենտրոն»,- ասել է Արթուր Մարտիրոսյանը: Ըստ նախարարի տեղակալի՝ կրթությունը դինամիկ գործընթաց է և ֆորմալ կրթությունը միշտ չէ, որ հասցնում է կյանքի պահանջներին համապատասխան ընթանալ: Նրա խոսքով՝ տարբեր հմտությունների զարգացումը լրջագույն խնդիր է, որը ֆորմալ կրթության միջոցով հասանելի կլինի հանրակրթական նոր չափորոշիչների կիրառմամբ:
«Ոչ ֆորմալ կրթական ծրագրերը նպաստում են հմտությունների և գիտելիքների բարելավմանը` ապահովելով կրթական ծրագրերում շարունակականության բաղադրիչը: Երիտասարդական քաղաքականության իրականացման գործընթացում պետությունը միակ դերակատարը չէ. քաղաքացիական հասարակությունը, հասարակական կազմակերպությունները, միջազգային գործընկերները ևս այն կարևոր օղակներն են, որոնք լրացնում են ոչ ֆորմալ կրթության պահանջը»,- նշել է նա:
Ամփոփելով ելույթը՝ Արթուր Մարտիրոսյանը կոչ է արել երիտասարդներին ակտիվ մասնակցություն ունենալ հանրային կյանքի բարեփոխումների գործընթացում` մարդկային կապիտալի զարգացումը ծառայեցնելով պետության առաջընթացին: ՀՖՀՀ ուսումնագիտական գծով պրոռեկտոր Զարուհի Սողոմոնյանը ևս ողջունել է ներկաներին՝ նշելով, որ երիտասարդների կարողությունների զարգացման նախաձեռնությունները միշտ կարևորվում են ՀՖՀՀ-ի կողմից, քանի որ դրանք ևս մեկ հնարավորություն են ընձեռում երիտասարդներին՝ ձեռք բերելու աշխատաշուկային անհրաժեշտ փափուկ հմտությունները:
Միջոցառման ընթացքում «Երիտասարդների զարգացում» ծրագրի մանրամասները և 2023 թվականին սպասվող անելիքները ներկայացրել է «Կոկա-կոլա ՀԲՔ Արմենիա» ընկերության Հասարակական գործերի և կայունության կենտրոնի տնօրեն Էլինա Մարգարյանը:
««Երիտասարդների զարգացում» ծրագիրը «Կոկա-կոլա ՀԲՔ Արմենիա» ընկերության առանցքային ուղղություններից մեկն է: Լինելով հասարակության պատասխանատու անդամ՝ մենք նպաստում ենք երիտասարդների հմտությունների և ինքնակրթության զարգացմանը, նրանց համար ստեղծվող հնարավորությունների ընդլայնմանը, որն էլ, իր հերթին, միտված է Հայաստանում գործազրկության նվազեցմանը։ 2022 թվականին «Երիտասարդների զարգացում» ծրագրի դասընթացաշարերին մասնակցել և հավաստագիր է ստացել Հայաստանի բոլոր մարզերում բնակվող շուրջ 11.000 երիտասարդ»,- նշել է Էլինա Մարգարյանը։
«Երիտասարդների զարգացում» ծրագիրը մեկնարկել է 2018 թվականին՝ ՀՀ կրթության և գիտության նախարարության և «Կոկա-կոլա Հելլենիկ Բոթլինգ Քամփնի Արմենիա» ընկերության միջև ստորագրված փոխըմբռնման հուշագրի շրջանակում: Այն միտված է 16-30 տարեկան երիտասարդների ոչ ֆորմալ կրթության հնարավորությունների ընդլայնմանն ու մասնագիտական հմտությունների զարգացմանը, ինչպես նաև զբաղվածության խթանմանը:
