Մեկ տարվա ակտիվ գործունեության ընթացքում ավելի քան 1000 քրեական վարույթ, 58 դատական գործ՝ ներկա և նախկին պաշտոնատար անձանց վերաբերյալ, բազմադրվագ կոռուպցիոն գործեր: Հակակոռուպցիոն կոմիտեն արդեն մեկ տարի է՝ գործում է: Հակակոռուպցիոն պայքարը Կառավարության ամենակարևոր հանրային պարտավորություններից է. շեշտեց վարչապետը:
Նիկոլ Փաշինյան (ՀՀ վարչապետ) - Երկու առումով մենք չենք կարող ասել, որ լիարժեք գոհ ենք մեր կատարած աշխատանքներից, էլի եմ ասում՝ երկու պատճառով, որ, այնուամենայնիվ, մեր քաղաքացիները պետական ու տեղական ինքնակառավարման մարմինների հետ իրենց շփումներում հանդիպում են կոռուպցիոն երևույթների, իհարկե, այդ կոռուպցիոն երևույթները բացահայտվում են, չեն հովանավորվում պետության կամ Կառավարության կողմից: Մյուս պարագայում՝ ասացի, որ հանրության ակնկալիքների և նաև մեր ակնկալիքների օբյեկտիվ մի հատված մենք իրապես չենք կարողացել իրագործել:
ԱՃԵԼ Է ԻՐԱՎԱՊԱՀ ՀԱՄԱԿԱՐԳԻ ՆԿԱՏՄԱՄԲ ՎՍՏԱՀՈՒԹՅՈՒՆԸ. ԽԱՉԱՏՐՅԱՆ
Եթե մինչև կոմիտեի ձևավորումը Հատուկ քննչական ծառայությունը քննել է 565 քրեական գործ, ապա ձևավորումից հետո այդ թիվը կրկնապատկվել է՝ ներկայացնում է Հակակոռուպցիոն կոմիտեի նախագահը: Սասուն Խաչատրյանը արձանագրեց, որ կոռուպցիայի դեմ հետևողական պայքարը հասարակության մեջ որոշ չափով ամրապնդել է կոռուպցիոն հանցագործությունների համար պատասխանատվության անխուսափելիության համոզմունքը և իրավապահ համակարգի նկատմամբ վստահությունը։
Սասուն Խաչատրյան (Հակակոռուպցիոն կոմիտեի նախագահ) - Դրա դրսևորումներից են քաղաքացիների այն բազմաթիվ դիմում-հաղորդումները, որոնցում նրանք տեղեկացնում են հանրային ծառայության մեջ գտնվող տարբեր անձանց առերևույթ չարաշահումների մասին։ Հատկանշական է, որ հենց պետական մարմինների ծառայողներն իրենք են սկսել բարձրաձայնել իրենց կառույցներում կոռուպցիոն դրսևորումների մասին, ինչը, անխոս, նպաստում է կոնկրետ մարմնում կոռուպցիոն ռիսկերից զերծ, անաչառ ծառայության ապահովմանը։
Ըստ Սասուն Խաչատրյանի՝ կոռուպցիայի դեմ պայքարի ոլորտում մեր երկրի արձանագրած դրական ցուցանիշի մասին արդեն իսկ փաստում է Արևելյան գործընկերության ինդեքսի 2020-21 թթ. զեկույցը, որով արձանագրվել է Հայաստանի էական առաջընթացը կոռուպցիայի դեմ պայքարի ոլորտում:
ՕՐԵՆՔԻ ԱՌԱՋ ԲՈԼՈՐԻ ՀԱՎԱՍԱՐՈՒԹՅՈՒՆԸ ՊԵՏՔ Է ԱՊԱՀՈՎՎԻ. ՎԱՐՉԱՊԵՏ
Վարչապետը նշեց՝ Հակակոռուպցիոն կոմիտեի ձևավորումը շատ կարևոր և քաղաքական կամք պահանջող ինստիտուցիոնալ բարեփոխում է:
Նիկոլ Փաշինյան - Որովհետև, նախ, առաջին հերթին, մենք ձևավորեցինք Հակակոռուպցիոն կոմիտե, որի ձևավորման պրոցեսը տարբերվում է մեր ունեցած պատկերացումներից, և, ընդհանրապես, գործունեության ոլորտը շատ կոնկրետացված է` հենց հատկապես հակակոռուպցիոն գործերով է զբաղվում, և մեր առաջին քննչական մարմինն է, որը, բացի քննչական գործունեությունից, նաև օպերատիվ-հետախուզական գործունեություն ծավալելու հնարավորություն ունի:
Կոռուպցիայի դեմ պայքարի` իշխանության ինստիտուցիոնալ կամքի դրսևորումն է նաև Կոռուպցիայի կանխարգելման հանձնաժողովի, դատական համակարգի հակակոռուպցիոն ճյուղի, ապօրինի գույքի բռնագանձման ստորաբաժանման ձևավորումը, հայտարարագրման համակարգում արված փոփոխությունները՝ շեշտեց վարչապետը: Ընդգծեց՝ կոռուպցիոն դրսևորումները բացահայտելու քաղաքական կամքը ոչ մի միլիմետրով չի նվազել, նույնիսկ ավելացել է:
Նիկոլ Փաշինյան - Որովհետև այն ժամանակ գուցե մենք ի վիճակի չէինք, նույնիսկ ընդդիմադիր լինելով, գնահատել, թե կոռուպցիան ինչպիսի խոր և ողբերգական հետևանքներ է ունեցել և ունենում մեր իրականության վրա: Հիմա մենք դա գիտենք առավել մանրամասն, մենք ամեն օր առնչվում ենք այդ պրոբլեմի հետ, մենք ամեն օր մեր մաշկի վրա դա զգում ենք` որպես պատասխանատու մարդիկ, ովքեր պետք է երկրի ճակատագրի հետ կապված խնդիրներ լուծեն: Ամեն անգամ, երբ գնում ենք որևէ հարց լուծելու, տեսնում ենք, որ այդ հարցը լուծելու գործիքը չկա, կամ այդ գործիքի կաղապարը կա, իսկ ներսի, այսպես ասած, կատալիզատորը չկա, ինչպես պատերազմի ժամանակ դեպքերի առնչվեցինք, երբ պարզվեց, որ, ասենք, ահասարսուռ անուններով հրթիռների միջից, կարող է, պլատաներ են հանել, որոնց մեջ ոսկի կա: Եվ սա արտահայտում է ամբողջը:
Նիկոլ Փաշինյանը 2019-ի տվյալը հիշեցրեց, երբ ՀՔԾ-ի ամբողջ գործունեության ընթացքում պետությանը հասցված վնասի վերականգնման ամենից մեծ ծավալն արձանագրվեց՝ 4.2 մլրդ դրամ:
Նիկոլ Փաշինյան - Սա որպես վիճակագրություն հետաքրքիր է, բայց ուզում եմ ասել, որ հիմա թվերի կարգերը պետք է փոխվեն, որովհետև մենք գիտենք, որ այդ թվերը կան ինչ-որ տեղերում, ծվարած են, այդ գույքերը, այդ թվերը, այդ մարդիկ:
Վարչապետը նշեց՝ կոռուպցիայի դեմ պայքարում նախկին և ներկա պաշտոնյաներ չկան, օրենքի առաջ բոլորի հավասարությունը պետք է անվերապահորեն ապահովվի:
Նիկոլ Փաշինյան - Ես կոնկրետ՝ որպես Կառավարության ղեկավար, որպես ժողովրդի մանդատը ստացած պաշտոնյա, արձանագրում եմ, որ մենք այլևս չունենք ասելու` վայ, գիտեք՝ օրենքի այս կետը կարծես, բանկային գաղտնիքը, դատական համակարգը և այլն: Հակակոռուպցիոն համակարգ է ձևավորվել, պետք է այս մեխանիզմը լիարժեք աշխատի, և կոռուպցիայի՝ մեր երկրին հասցված վնասը պետք է վերականգնվի:
Սա ոչ թե քաղաքական նպատակահարմարության խնդիր է այլ, ըստ վարչապետի, պետության ինքնիշխանության, անկախության, անվտանգության ապահովման կարևորագույն գործիք:
Իրավակարգի և օրինականության ամրապնդման գործում ներդրած ավանդի համար վարչապետի հուշամեդալով են պարգևատրվել Հակակոռուպցիոն կոմիտեի աշխատակիցներ:
Հեղինակ` Տաթև Խաչատրյան
