Հայ գիրի ու դպրութեան ռահվիրաները սրբացուած են հայ ազգի կողմէ, բնականաբար, որովհետև հայոց լեզուն ինքնին ազգային սրբազնագոյն արժէքներէն համարուած է: Հալէպի մէջ աւանդութիւն դարձած է ամէն տարի Սրբոց Թարգմանչաց տօնը նշել եկեղեցական արարողութեամբ: Այս տարի եւս տօնակատարութիւնը սկիզբ առաւ Սուրբ Գրիգոր Լուսաւորիչ եկեղեցիէն և շարունակուեցաւ Ազգային Ճեմարանին մէջ:
Վեհան Բարսումյան («Ազգային Քարեն Եփփե» ճեմարանի քարտուղար) - Թարգմանչացը տաղաւար տօնի մը չափ մեծ նշանակութիւն ունի մեզի համար, որովհետև Հայաստանի ամէնէն օրհասական պահերուն յանձինս Մեսրոպ Մաշտոցի և իր աշակերտներուն ծնունդ առաւ մեր ոսկեղենիկը, որ առ այսօր կը պահէ մեզի ձուլման վտանգէն:
Արարողութենէն ետք տօնակատարութեան մասնակիցները ուղղուեցան Ազգային Գերեզմանատուն և հոն հայ ժողովուրդի բարեկամ, բարերար, Ճեմարանի հիմնադիր Քարէն Եփփէի և Հայ մեծագոյն քննադատ, գրականագէտ, ուսուցչապետ Յակոբ Օշականին շիրիմներուն մօտ անոնց հոգիներու խաղաղութիւն հայցեցին Ամէնակալէն:
Արփի Սանոսյան (Բերիո Հայոց թեմի ուսումնական խորհրդի անդամ) - Այսօր Թարգմանչաց տօնն է, մեր բոլորին համար սրբազանագոյն տօնն է: Մաշտոց մեզի համար մեծ դիւանագէտ է, ամենամեծ մանկավարժն է, առաջին ուսուցիչն է, հայ դպրութեան հիմնադիրն է, հայ ժողովուրդին նոր հորիզոններ բացաւ և փրկութեան լաստը եղաւ:
Ազգային Քարէն Եփփէ Ճեմարանի նորանշանակ տնօրէն Զեփիւռ Րէիսեան անդրադարձաւ հայրենիքն ու սփիւռքը սպառնացող վտանգներուն, այսուհանդերձ հայասէր Եփփէի յոյսով ու աւագ թէ կրտսեր թարգմանիչներու ոգիով ներշնչուած հաստատեց, որ հայու ինքնութեան տէր կանգնելու գործը պիտի շարունակուի:
Զեփյուռ Րեիսյան («Ազգային Քարեն Եփփե» ճեմարանի տնօրէն) - Այսօր մեր աշխարհը ալեկոծուած է, բայց մեր պարտականութիւնն է մեր ուսուցիչներու ջամբած հայեցի կրթութեամբ չկորսնցնենք մեր յոյսը: Այսօր մենք պարտաւոր ենք բազմապատկուած ճիգերով, մեր թարգմանիչներու ոգիով շարունակել մեր գոյութիւնը, պահել մեր գիրը և գրականութիւնը, որովհետև այնքան ատեն որ հայ լեզուն կ՛ապրի մեր մէջ, որքան ալ ալեկոծ ըլլայ մեր չորս դին մենք անպայման կը շարունակենք գոյութիւնը մեր և կը հասնինք մեր նպատակին:
Հալէպի հայկական վարժարաններու աշակերտները կը գիտակցին թէ օտար ափերու վրայ հայու ոգին կենդանի պահելու համար հայ դպրոցին ու ուսուցիչին ինչ դեր վերապահուած է:
Մայք Գևոյան («Ազգային Քարեն Եփփե» ճեմարանի 11-րդ դասարանի աշակերտ) - Ս.Թարգմանչաց տօնը նաև տօնն է հայ ուսուցիչին և հայ դպրոցին ուր սերունդներ ամբողջ դաստիարակուեցան հայրենասիրութեամբ և հայեցի կրթութեամբ, կը կարծեմ առանց հայ դպրոցին և յատկապէս հայ ուսուցիչին չէինք կրնար մեր տառերը փոխանցել յաջորդ սերունդներուն:
Ամէն տարի Հոկտեմբեր ամսուան երկրորդ շաբաթը Հալէպի հայկական վարժարաններուն մէջ Մեսրոպ Մաշտոցի և Սահակ Պարթևի յիշատակը կ՛ոգեկոչուի, գիրերու գիւտին նուիրուած ձեռնարկներ կը կազմակերպուին և հայերէնը կը վերաթարմանայ սփիւռքահայ աշակերտներու շրթներուն վրայ:
Մարի Ռոզ Քեոշկերյան («Ազգային Քարեն Եփփե» ճեմարանի 11-րդ դասարանի աշակերտ) - Հայ դպրոցը մտքի դարբնոց դարձաւ շնորհիւ իր գիւտարարի Մեսրոպ Մաշտոցին, որպէսզի մեր ինքնութիւնը պահենք համայն աշխարհին մէջ:
Ողջունելի վերաբերմունք է այն, որ իւրաքանչիւր տարի Թարգմանչաց տօնի առթիւ կը յիշատակուին Ազգային Ճեմարանի հիմնադրութենէն ցայսօր, որպէս տնօրէն, կրթական մշակ կամ խնամակալ` ճեմարանին ծառայած հանգուցեալներուն անունները և անոնց հոգիներու խաղաղութեան համար պատարագող քահանան աղօթք կը բարձրացնէ առ Աստուած:
Աննա Պետրոսյան («Ազգային Քարեն Եփփե» ճեմարանի 11-րդ դասարանի աշակերտ) - Գրերու գիւտէն ետք Մաշտոցի առաջին գործը եղաւ հիմնել դպրոց մը Ամարաս շրջանին մէջ, և այս մէկը ամենամեծ ապացոյցն է, որ հայ դպրոցն է այբուբենի յենարանը:
Թարգմանչաց տօնի առթիւ կազմակերպուած արարողութիւնը հանդիսապետեց Բերիոյ Հայոց Թեմի Առաջնորդի տեղապահ Հայր Մանուկ Աբեղայ Պարիխանեան, մասնակցութեամբ Բերիոյ Հայոց Թեմի Ազգային Վարչութենէն, Թեմի ուսուսնական խորհուրդէն, Ճեմարանի Խնամակալութենէն ներկայացուցիչներու և Ազգային Քարէն Եփփէ Ճեմարանի աշակերտներու ու կրթական մշակներու: