Կառավարությունը մոտ 1.7 մլրդ դրամ է հատկացրել Այնթափ-Մխչյան-Արտաշատ-Այգավան հանրապետական նշանակության ավտոճանապարհի հատվածների հիմնանորոգման համար: Վարչապետն այսօր այցելել է Արարատի մարզ, ծանոթացել նաև համաֆինանսավորմամբ համայնքային ճանապարհների նորոգման ընթացքին:
Վարչապետի առաջին կանգառը Արարատի մարզում Դեղձուտ համայնքում էր, որտեղ երկրի ղեկավարը ծանոթացել է մոդուլային դպրոցի կառուցման աշխատանքների ընթացքին, շրջայց կատարել շինհրապարակում:
Կառուցման աշխատանքները սկսվել են 2020 թվականից, կավարտվի այս տարի: Մինչ այդ համայնքի մոտ 80 աշակերտ ուսումը շարունակում է համայնքապետարանի շենքում: Դպրոցը նախատեսված է 120 աշակերտի համար։
Կառուցման աշխատանքներին ծանոթանալուց հետո երկրի ղեկավարը դպրոցի ուսուցիչներին խոստացավ, որ տարեվերջին նրանք արդեն կաշխատեն բարեկարգ պայմաններում։
Նիկոլ Փաշինյան (ՀՀ վարչապետ) - Պիտի խնդրեմ, որ պատրաստվեք և ատեստավորմանը մասնակցեք, դա շատ կարևոր է, որ մենք էլ հանգիստ զգանք, որ մեր ուսուցիչները պատշաճ աշխատավարձ են ստանում, ու հետո մենք ծրագրեր ենք մտածելու որ էլի բաներ լինեն, էլի անընդհատ հնարավորություն լինի, որ ուսուցիչն ինքն իր վրա աշխատի, իր աշխատավարձը բարձրացնի:
Ծրագրի արժեքը 799 մլն դրամ է: Վարչապետը մանկավարժներին նաև տեղեկացրել է, որ նոր կառուցվող դպրոցում հին գույք չի լինելու:
Նիկոլ Փաշինյանը զրուցել է նաև տեղի բնակիչների հետ, լսել նրանց խնդիրները:
Երկրի ղեկավարը բնակիչներին հորդորել է օգտվել կառավարության բոլոր ծրագրերից, որոնք ուղղված են ժամանակակից գյուղատնտեսություն հիմնելուն, այդ թվում՝ կաթիլային ոռոգման ծրագրից:
Նիկոլ Փաշինյան - էդ կաթիլային ոռոգման, որ անցնում է մինչև 3 հա-ն, հետո ինչքան դուք ծախս եք անում, բայց էդ ծախսը պիտի ՀԴՄ-ներով-բանով հիմնավորվի: Դրա 50 տոկոսը վերադարձնում ենք ձեզ: Պրոբլեմն ինչն է, ժողովուրդ, որ կլիման փոխվում է, ջուրը շատ գոլորշիանում է, հողը ավելի շատ ջուր է ուզում, և դրա համար կաթիլային մենք ինչի համար ենք ասում, որ կաթիլայինի անցնենք, այդտեղ խորամանկություն կա: Իրականում, որ կաթիլայինի եք անցնում, 5 տարի փող չեք տալիս, մենք էլ փողի կեսը հետ ենք տալիս մեկ է` էլի շահում են:
Վարչապետը նշել է՝ երկրում գործող գյուաղատնտեսական կոլեկտիվ չկա, ըստ նրա՝ այս իրավիճակը հաղթահարելու համար պետք է գյուղում համախմբվելու մեխանիզմներ գտնել:
Ներկաներին տեղեկատվություն է ներկայացրել նաև Էկոնոմիկայի փոխնախարար Արման Խոջոյանը:
Արման Խոջոյան (ՀՀ էկոնոմիկայի նախարարի տեղակալ) - Կաթիլային ոռոգումը պարզապես ծակերով խողովակը չի, այստեղ շատ կարևոր է, որ մենք հասկանանք, որ դա տեխնոլոգիա է, և մասնագետների հետ աշխատենք:
Վարչապետի հաջորդ կանգառը Բերդիկ-Այգեստան ավտոճանապարհահատվածում էր, որտեղ ծանոթացել է իրականացվող աշխատանքներին:
Պետական նշանակության ավտոճանապարհների հիմնանորոգման ծրագրի շրջանակում իրականացվում են ջրահեռացման, ասֆալտապատման աշխատանքներ։ Ճանապարհը նախատեսվում է շահագործման հանձնել այս տարվա նոյեմբերին: Ծրագրի արժեքը 360 մլն դրամ է:
Այնուհետև վարչապետ Փաշինյանն այցելել է Վերին Դվին համայնք, շրջայց կատարել պետական օժանդակությամբ մասնավոր հատվածի կողմից հիմնված գյուղմթերքի պահպանման սառնարանային տնտեսության տարածքում:
Էկոնոմիկայի փոխնախարարի տեղեկացմամբ` 5000 տոննա տարողությամբ սառնարանային տնտեսության հիմնմանը կառավարությունն օժանդակել է ագրոպարենային լիզինգային ծրագրի շրջանակում: Ծրագրի արժեքը 400 մլն դրամ է, որից 300-ը տրամադրել է պետությունը: Ողջունելով տնտեսության հիմնումը` երկրի ղեկավարը ընդգծել է՝ կառավարությունը շարունակելու է տարբեր ծրագրերի միջոցով օժանդակել գյուղացիական տնտեսություններին:
Վերին Դվին համայնքում վարչապետը ծանոթացել է նաև կրկին մասնավոր ներդրմամբ ժամանցի կենտրոնի կառուցման աշխատանքներին: Արդեն ներդրվել է 1,2 մլն դոլար:
Վարչապետն այցելել է նաև Այգեզարդ համայնք, ծանոթացել սուբվենցիոն ծրագրով նորոգված այգու պայմաններին, որի հարակից տարածքում կառուցվել են նաև ֆուտբոլի, թենիսի և բասկետբոլի ժամանակակից խաղադաշտեր: Ծրագրի ընդհանուր արժեքը 44 մլն դրամ է: Այստեղ վարչապետը եւս զրուցել է բնակիչների հետ, ծանոթացել նրանց խնդիրներին:
Նիկոլ Փաշինյանը եղել է նաև համայնքում մասնավորի հիմնած հրաձգարանում, ծանոթացել ստեղծված պայմաններին: Երկրի ղեկավարը հետևել է նաև Այնթափ-Մխչյան-Արտաշատ-Այգավան հանրապետական նշանակության ավտոճանապարհի հատվածների հիմնանորոգման աշխատանքներին: Աշխատանքները նախատեսվում է ավարտել այս տարվա նոյեմբերին: Ծրագրի արժեքը 1 մլրդ 699 մլն դրամ է:
Վարչապետին է ներկայացվել նաև Եղեգնավան-Այգավան ճանապարհի հիմնանորոգման աշխատանքների ընթացքը, որը ևս շահագործման կհանձնվի տարեվերջին: Ծրագրի համար ծախսվել է 259 մլն դրամ: Նիկոլ Փաշինյանի վերջին կանգառը եղել է Արարատ քաղաքում, որտեղ շրջել է սուբվենցիոն ծրագրով վերակառուցված զբոսայգում: Ծրագրի արդյունքում սալիկապատվել է այգու ամբողջ տարածքը, վերանորոգվել է շատրվանն ու ամֆիթատրոնը, փոխվել են նստարանները, անցկացվում է ոռոգման ցանց և լուսավորության համակարգ:
Հեղինակ` Տաթև Խաչատրյան
