Քննչական կոմիտեում ավարտվել է սպանություն նախապատրաստելու, հանցավոր համագործակցություն ստեղծելու, ղեկավարելու, մասնակցելու, ապօրինի կերպով զենք ձեռք բերելու, պահելու, կրելու դեպքի առթիվ հարուցված քրեական գործով երեք մեղադրյալի մասով նախաքննությունը:
Պարզվել է, որ Վաղարշապատի բնակիչ, «Դոն Պիպո» մականվամբ հայտնի Արթուր Ասատրյանը և նրա կնոջ ազգականը ստեղծել ու ղեկավարել են հանցավոր համագործակցություն, և հանցագործություններ կատարելու նպատակով հավաքագրել մտերիմներին: Հանցավոր գործունեությունը քողարկելու նպատակով նրանք հիմնել են իբրև պահնորդական ծառայություններ մատուցող ընկերություն և աշխատանքի անցնելու պատրվակով տարբեր անձանց առաջարկել որպես պահնորդ աշխատանքի անցնել այդ ընկերությունում:
Հավաքագրված մասնակիցները, այդ թվում՝ «Սենսեյ Արթուր» մականվամբ հայտնի անձը, ընդգրկվել և մասնակցել են ստեղծված հանցավոր համագործակցությանը, կատարել հանցավոր համագործակցության ղեկավարների ցուցումներն ու հրահանգները, այդ թվում՝ առանձնապես ծանր հանցագործություններ կատարելու: Մասնավորապես, ապօրինի կերպով ձեռք են բերել մարտական և ոչ մարտական հրազեն, փամփուշտներ, ռազմամթերք, որոնք տեղից-տեղ փոխադրելով պահել են տարբեր վայրերում:
2021-ի մարտին Դոն Պիպոյի և խմբի անդամներից մի քանիսի հարաբերությունները լարվել են: Համաքաղաքացիներին հրապարակայնորեն պատժելու և նրանցից վրեժխնդիր լինելու համար նա մարտի 14-ի երեկոյան Վաղարշապատում գործող ռեստորանային համալիրում հանդիպել է նրանցից մեկին ու նրա մտերիմներին: Հրազեններով և ռազմամթերքով զինված խմբավորումները կռվի են բռնվել միմյանց հետ, տարբեր տրամաչափի հրազեններից կրակոցներ արձակել միմյանց ուղղությամբ, որի ընթացքում միջադեպին մասնակիցներից մեկը գլխի շրջանում վնասվածք է ստացել:
Արթուր Ասատրյանը համախոհներին հանձնարարել է ատրճանակների հետքերը վերացնել, աշխատանքի չհաճախելով թաքնվել իրավապահներից: Այս, ինչպես նաև մեկ այլ սպանության դեպքից հետո, Դոն Պիպոն և նրա կնոջ ազգականը մեկնել են Հայաստանից, որից հետո հանցավոր համագործակցության ղեկավարի դերակատարությունը ստանձնել է վերջիններիս հավատարիմ և համախոհ անձանցից Սենսեյ Արթուրը:
Հանդես գալով Դոն Պիպոյի անունից՝ նա պատվիրել է խոշոր գումարի դիմաց Ռուսաստանում և Հայաստանում սպանել Դոն Պիպոյի և նրա կողմնակիցների հետ թշնամական հարաբերություններ ունեցող, իրենց համոզմամբ կատարված սպանությունների մեջ մեղավոր անձանց և նրանց համախոհներին: Այդ նպատակով նա իր երկու ծանոթներին սկսել է մարզել: Սակայն որոշ ժամանակ անց նրանք հայտնել են, որ հրաժարվում են իրագործել սպանությունները:
Սենսեյ Արթուր անունով անձին և հանցավոր խմբի ստեղծմանը մասնակցած 2 այլ անձանց մեղադրանք է առաջադրվել Քրեական օրենսգրքի մի շարք հոդվածներով՝ այդ թվում մի խումբ անձանց կամ կազմակերպված խմբի կողմից սպանություն նախապատրաստելու, հանցավոր համագործակցություն ղեկավարելու, կազմակերպված խմբի կողմից ապօրինի կերպով հրազեն, ռազմամթերք, փամփուշտներ, պայթուցիկ նյութեր կամ պայթուցիկ սարքեր ձեռք բերելու, իրացնելու, պահելու, փոխադրելու համար:
Նրանց վերաբերող մասը վարույթն իրականացնող խմբի որոշմամբ անջատվել է առանձին վարույթ, և ուղարկվել է դավարական հսկողություն իրականացնող դատախազին: Որոշվել է հանցավոր համագործակցության պարագլուխներ Արթուր Ասատրյանին և նրա կնոջ ազգականին որպես մեղադրյալ ներգրավել. նրանց նկատմամբ որպես խափանման միջոց ընտրվել է կալանավորումը և հայտարարվել հետախուզում: Որպես մեղադրյալ է ներգրավվել նաև հանցավոր համագործակցության ևս 5 անդամ: Յոթ մեղադրյալի մասով նախաքննությունը շարունակվում է:
