Լիբանանը համայնքային երկիր է: Լիբանանի խորհրդարանը կը բաղկանայ 128 աթոռէ, որուն ըստ 1989 թ. Թաիֆի Համաձայնութեան 64 աթոռ վերապահուած է քրիստոնեաներուն և 64 իսլամներուն։ Հայ համայնքը կը նկատուի Լիբանանի 7 գլխաւոր համայնքներէն մէկը, անոր վերապահուած է վեց աթոռ, 5 Հայ Առաքելական և 1 Հայ Կաթողիկէ։ Այս տարի երեսփոխանական ընտրութիւնները տեղի պիտի ունենան մայիս 15ին, 15 ընտրաշրջանի միջոցաւ։
Լիբանանահայութեան կեդրոնացումը պիտի ըլլայ Մէթնի ընտրաշրջանը, առաջին Պէյրութի ընտրաշրջանն ու առաջին Պէքայի ընտրաշրջանը։ Առաջին Պէյրութի ընտրաշրջանին մէջ լիբանանահայութիւնը պիտի ունենայ չորս ներկայացուցիչ, Մէթնի մէջ մէկ ներկայացուցիչ և Պէքայի մէջ մէկ ներկայացուցիչ։
Այս երեսփոխանական ընտրութիւններուն թեկնածուներու ճամբով իրենց մասնակցութիւնը պիտի բերեն Լիբանանի հայ քաղաքական կուսակցութիւններէն Հայ Յեղափոխական Դաշնակցութիւնն ու Սոցիալ Դեմոկրատ Հնչակեան կուսակցութիւնը։
Հակոբ Բագրատունի (Լիբանանի խորհրդարանի պատգամավոր, պատգամավորի թեկնածու, ՀՅԴ) - Հայ երեսփոխանը երկեակ պարտականութիւն ունի Լիբանանի մէջ՝ նախ իբրև լիբանանցի երեսփոխան, իբրև համայն լիբանանցի ժողովուրդը ներկայացնող երեսփոխան երկրի դիմագրաւած զանազան հարցերուն մէջ օրէնսդրական իր դերակատարութիւնը կատարելու փտածութեան, գողցուած դրամներու վերադարձի, անօրէնութեան, օրէնքի վերահաստատման, երկրի ընկերային, տնտեսական, ելևմտական կացութեան բարելաւման ընթացքին ժողովուրդի առօրեայ կենցաղային կեանքի բարելաւելու իմաստով: Երկրորդ պարտականութիւնը զուտ հայկական պարտականութիւն է, որովհետև մենք հոս Լիբանանի եօթը գլխաւոր համայնքներէն մէկն ենք, և երկիրը իբրև համայնքային երկիր տակաւին կարևորութիւն ունի, որ իւրաքանչիւր համայնքի երեսփոխան իր համայնքի հետ կապուած հարցերուն մէջ աւելի միջամուխ ըլլայ, առնչակից ըլլայ ճանչնայ իր համայնքը և ատկէ մեկնած համայնքային իրաւունքներու և համայնքային կարիքներու հաւասարակշռութիւնը ընելով կարենայ պաշտպանել իր համայնքը։
Հիմա եթէ երբեք այլ համայնքներու պարագային զուտ կրօնական համայնքային իրաւունքի հարց է, մեր պարագային նաև ազգային նկարագրի հարց է, այսինքն Լիբանանի հայ երեսփոխանը լիբանանեան իր պարտականութիւններու կողքին պարտաւոր է նաև ազգային ինքնուրոյնութեան ազգային հայկականութեան պահպանման գործը կատարել, որովհետև համայնքը ամուր կը մնայ եթէ այդ տարբերութիւնը կարենայ ապահովել:
Խորհրդարանական ընտրութիւններուն առաջադրուած մէկ այլ թեկնածու՝ Արամ Մալեանի խոսքով էլ կարևոր է թեկնածուներու կապը համայնքի հետ, այն ինչը որ հնարաւորութիւն կու տայ լաւագոյնս սպասարկելու անոր շահերը:
Արամ Մալյան (Լիբանանի խորհրդարանի պատգամավորի թեկնածու, Սոցիալ-դեմոկրատ հնչակյան կուսակցություն) - Մենք բնականաբար ընտրութեան մասնակցեցանք յաղթելու նպատակով և այդ ուղղութեամբ է, որ կ'ընթանան բոլոր աշխատանքները, որպէսզի կարենանք գաղութը ճիշդ ձևով ներկայացնել Լիբանանի խորհրդարանէն ներս։ Գաղտնիք մը չէ, որ Լիբանանը կը գտնուի դժուար վիճակի մէջ, և իրապաշտ պէտք է ըլլանք և ըսել, որ լուծումը դիւրին չէ, բայց պէտք է որ որոշ տեղէ մը սկսիլ լուծումի դժուար գործը։ Այո՛, չենք կրնար ըսել, որ ընտրուելու պարագային պիտի փոխուի ամէն ինչ, բայց վստահութեամբ կրնանք ըսել որ խորհրդարան հասնելով ժողովուրդը ներկայացնելու պարագային վստահ պիտի աշխատինք ժողովուրդին վիճակը բարելաւելու ուղղութեամբ։ Երեսփոխան կրնայ դառնալ այն, որ միայն իսկապէս իր գաղութի ծոցէն ծնունդ առած է, այսինքն միշտ եղած է իր գաղութին հետ, միշտ աշխատած է իր գաղութին համար։
Ընտրապայքարին կը մասնակցին նաև անկախ թեկնածուներ:
Գրիգոր Մարտիկյան (Լիբանանի խորհրդարանի պատգամավորի անկախ թեկնածու) - Այո՛, ես իբր անկախ իջած եմ և որևէ մէկ կուսակցութիւն չեմ ներկայացներ կոր ո՛չ հայ, ո՛չ ներկայ կուսակցութիւններէն, անկախ իջած եմ և յուսամ և հասնիմ և կրնամ հայութեան կողքը ըլլամ, ժողովուրդին կողքը ըլլամ և ամէն բան պիտ չի կրնամ ընել, բայց կրցածիս չափ ժողովուրդին կողքը ըլլամ։ Ինչպէս որ գիտէք, մեր կացութիւնը շատ ցաւալի կացութիւն մըն է մանաւանդ ժողովուրդին կացութիւնը և երկրին կացութիւնը շատ ցաւալի է: Յուսամ երբ որ կրնամ երեսփոխան ըլլալ, այսինքն որչափ որ կրնամ օգնել ժողովուրդին և ժողովուրդին քովը ըլլամ և նոր շունչ տանք այս երկրին և նոր արիւն ըլլայ:
Խորհրդարանական ընտրութիւններուն աշխոյժ մասնակցութեան հարցին անդրադարձաւ նաև Արամ Ա. կաթողիկոսը իր Ս. Զատկուան պատգամին մէջ: Ան լիբանանահայութեան կոչ ուղղեց մասնակցիլ ընտրութիւններուն և ընտրել համայնքի արժանաւոր զաւակները, որոնք կայտառ գործունէութիւն ծաւալած են մեր գաղութային կեանքէն ներս և մօտ են եկեղեցւոյ։
Լիբանանի այս ճգնաժամային օրերուն գալիք երեսփոխանական ընտրութիւնները վճռորոշ են ու յոյս կը ներշնչեն Լիբանանի ժողովուրդին ընտրելու իր արժանի ներկայացուցիչները, որոնք տնտեսական, ապահովական, ընկերային և քաղաքական բարեկարգումներու պիտի ձգտին։
Հեղինակ՝ Փաթիլ Մկրտիչեան
