ԱՄՆ-Ը ՉԻ ՀԱՄԱՁԱՅՆԵԼ ԱՆՎՏԱՆԳՈՒԹՅԱՆ ԵՐԱՇԽԻՔՆԵՐ ՏՐԱՄԱԴՐԵԼ ԿԻԵՎԻՆ
Վաշինգտոնն այդպես էլ չի համաձայնել անվտանգության այնպիսի երաշխիքներ տրամադրել Ուկրաինային, որոնք ցանկանում էր Կիևը՝ հայտարարել է նախագահ Վոլոդիմիր Զելենսկին։
«Մենք դեռևս ոչ մի երկրից դրանք չենք ստացել»,- նշել է նա CBS հեռուստաալիքին տված հարցազրույցում:
Կիևը պնդում է՝ անվտանգության երաշխիքները ենթադրում են Ուկրաինայի վրա հարձակման դեպքում ռազմական օգնություն տրամադրելու պատրաստակամություն։ Նախագահը, միաժամանակ, կարծիք է հայտնել, որ ՆԱՏՕ-ի անդամ երկրները Կիևին ռազմական ինքնաթիռներ չեն տրամադրի։
«Դրանք մեզ շատ կօգնեին: Ռուսաստանը առավելություն չէր ունենա երկնքում։ Հյուսիսատլանտյան դաշինքի ներկայացուցիչներն ասում են, որ ՆԱՏՕ-ի երկրները չեն կարող այս պատերազմի մաս լինել», - ընդգծել է Զելենսկին։
Նախագահն անդրադարձել է նաև ռուս-ուկրաինական բանակցություններին, նշել՝ Կիևի և Մոսկվայի ներկայացուցիչները մոտ են պայմանավորվածություններ ձեռք բերելուն, այդ թվում՝ երկրի ոչ միջուկային, ոչ դաշինքային և չեզոք կարգավիճակի հարցերում։ Նա միևնույն ժամանակ վստահություն է հայտնել, որ Կիևն անդամակցելու է ԵՄ-ին։
Բանակցություններում ռուսական պատվիրակության ղեկավար Վլադիմիր Մեդինսկին նախօրեին հայտարարել է, որ Ռուսաստանի և Ուկրաինայի միջև համաձայնագրի նախագիծը դեռ պատրաստ չէ՝ դրանք երկու երկրի ղեկավարներին ներկայացնելու համար։ «Ուկրաինան, այնուհանդերձ, ավելի իրատեսական մոտեցում է ցուցաբերում երկրի չեզոք և ոչ միջուկային կարգավիճակի հարցում»,- եզրափակել է պաշտոնյան։
ՈՒԿՐԱԻՆԱՅԻ ՌԱԶՄԱԿԱՆ ԵՆԹԱԿԱՌՈՒՑՎԱԾՔՆԵՐԻ ՄԵԾ ՄԱՍԸ ՈՉՆՉԱՑՎԵԼ Է
Ռուսաստանը մեծ հաճույքով կշարունակի Ուկրաինայի հետ բանակցությունները Բելառուսում, սակայն, Կիևը դեմ է դրան, հայտարարել է Ռուսաստանի նախագահի մամուլի խոսնակը։ Դմիտրի Պեսկովը շեշտել է Ուկրաինայի հետ ընդհանուր դիրքորոշումներ գտնելու կարևորությունը՝ անկախ բանակցությունների անցկացման վայրից։
Նրա խոսքով՝ Ռուսաստանի և Բելառուսի դեմ Արևմուտքի պատժամիջոցները մեծապես ազդել են դոլարի և եվրոյի հեղինակության վրա։
«Ավելի շատ երկրներ են անցնում ազգային արժույթների»,- ասել է նա և հավելել՝ գազի դիմաց ռուբլով վճարման համակարգը հետագայում կտարածվի Ռուսաստանից արտահանվող այլ ապրանքների վրա։
Կրեմլի խոսնակը նշել է նաև, որ Ուկրաինայի ապառազմականացումը շարունակվում է, երկրի ռազմական ենթակառուցվածքների մեծ մասը ոչնչացվել է։ Նա հույս է հայտնել, որ ռազմական գործողությունների բոլոր նպատակները կյանքի կկոչվեն։ «Ռուսաստանում հիշում են, որ Ուկրաինայի ներկայացուցիչները կարող են չկատարել պայմանավորվածությունները, հետևաբար համապատասխան քայլեր են ձեռնարկում»,- ընդգծել է Պեսկովը։
ԶԵԼԵՆՍԿԻՆ ԵԼՈՒՅԹ Է ՈՒՆԵՑԵԼ «ԳՐԵՄՄԻԻ» ՄՐՑԱՆԱԿԱԲԱՇԽՈՒԹՅԱՆԸ
Ուկրաինայի նախագահը նաև տեսակապի միջոցով ելույթ է ունեցել «Գրեմմիի» մրցանակաբաշխությանը։ Նա նշել է, որ ռազմական գործողությունների պատճառով ուկրաինացի երաժիշտները ստիպված են սմոքինգի փոխարեն զրահաբաճկոններ կրել։
«Աջակցեք մեզ ինչով կարող եք: Բայց մի՛ լռեք։ Եվ այդժամ խաղաղություն կհաստատվի»,- նշել է նա:
ՌՈՒՍ ԶԻՆՎՈՐԱԿԱՆՆԵՐԸ ԼՔԵԼ ԵՆ ԲՈՒՉԱՆ ԴԵՌ ՄԱՐՏԻ 30-ԻՆ. ՌԴ ՊՆ
Ռուսաստանի պաշտպանության նախարարությունը հերթական սադրանք է անվանել Կիևի շրջանի Բուչա քաղաքում խաղաղ բնակիչների սպանության համար ռուսական կողմին մեղադրելը։ Գերատեսչությունից հայտնել են, որ ռուս զինվորականները լքել են Բուչան դեռ մարտի 30-ին։
Ստեղծված իրավիճակի ֆոնին Ռուսաստանը պահանջել է ապրիլի 4-ին ՄԱԿ-ի Անվտանգության խորհրդի նիստ գումարել։
Նախօրեին Ուկրաինայի իշխանությունները և մի շարք լրատվամիջոցներ տեղեկատվություններ են տարածել Կիևի մերձակայքում գտնվող Բուչա քաղաքում խաղաղ բնակչության զանգվածային սպանությունների մասին։
ԴԱՎԻԹ ԶԱԼԿԱԼԻԱՆԻՆ՝ ԱՄՆ-ՈՒՄ ՎՐԱՍՏԱՆԻ ԴԵՍՊԱՆ
Վրաստանի արտաքին գործերի նախարար Դավիթ Զալկալիանին դադարեցնում է պաշտոնավարումը։ Նախարարի պաշտոնում նշանակվել է կառավարության աշխատակազմի նախկին ղեկավար Իլիա Դարչիաշվիլին։
«Դավիթ Զալկալիանին նշանակվել է Ամերիկայի Միացյալ Նահանգներում Վրաստանի արտակարգ և լիազոր դեսպան»,- հայտարարել է երկրի վարչապետ Իրակլի Ղարիբաշվիլին։
ՎԻԵՆՆԱՅԻ ԲԱՆԱԿՑՈՒԹՅՈՒՆՆԵՐՈՒՄ ԿՈՂՄԵՐԸ ՄՈՏ ԵՆ ՀԱՄԱՁԱՅՆՈՒԹՅԱՆԸ
Վիեննայում բանակցությունների կողմերը մոտ են 2015 թվականի միջուկային գործարքի վերականգնման շուրջ համաձայնության գալուն։ Այդ մասին ՄԱԿ-ի գլխավոր քարտուղար Անտոնիո Գուտերեշի հետ հեռախոսազրույցի ժամանակ հայտարարել է Իրանի արտգործնախարար Հոսեյն Ամիր Աբդոլլահիանը։ Վերջինիս խոսքով՝ Թեհրանը ներկայացրել է իր առաջարկները․ «Այժմ գնդակը ԱՄՆ-ի դաշտում է», - հավելել է նա։
Գուտերեշն, իր հերթին, կարևորել է Ավստրիայիում ընթացող բանակցությունները և հույս հայտնել, որ կողմերը հնարավորինս շուտ համաձայնության կգան։
Նշվում է, որ կողմերը ավելի քան երբևէ մոտ են համաձայնագրի կնքմանը, սակայն առկա են որոշ առանցքային հարցեր, որոնց հետ կապված կողմերը պետք է քաղաքական որոշումներ կայացնեն։
ՍԵՐԲԻԱՅԻ ՆԱԽԱԳԱՀԸ ՎԵՐԸՆՏՐՎԵԼ Է
Սերբիայի գործող նախագահ Ալեքսանդր Վուչիչը հայտարարել է նախագահական ընտրություններում իր հաղթանակի մասին, նա ստացել է ընտրողների ձայների մոտ 60 տոկոսը: «Ինձ հաջողվեց անել այն, ինչ Սերբիայում ոչ ոք երբևէ չէր կարողացել անել՝ երկու անգամ հաղթել եմ առաջին փուլում»,- ասել է Վուչիչը։
Նա հայտարարել է նաև, որ պատրաստվում է շարունակել չեզոքություն պահպանել Ուկրաինայի շուրջ ստեղծված իրավիճակի հարցում, որևէ ռազմական դաշինքի չի անդամակցի և բարեկամական հարաբերություններ կպահպանի Ռուսաստանի հետ։
ԽՈՐՀՐԴԱՐԱՆԱԿԱՆ ԸՆՏՐՈՒԹՅՈՒՆՆԵՐ ՀՈՒՆԳԱՐԻԱՅՈՒՄ
Հունգարիայում էլ խորհրդարանական ընտրություններ են անցել, որոնցում չորրորդ անգամ անընդմեջ և մեծ աառավելությամբ հաղթել է ներկայիս վարչապետ Վիկտոր Օրբանի Ֆիդեշ կուսակցությունը՝ ստանալով ձայների մոտ 54.5%, իսկ ընդդիմադիր 6 կուսակցությունների կոալիցիան՝ 34%։ Նոր խորհրդարանում Ֆիդեշը կունենա 199 տեղերից 135-ը:
«Մենք այնպիսի մեծ հաղթանակ տարանք, որ այն կարելի է տեսնել նույնիսկ լուսնից, և, իհարկե, Բրյուսելից»,- հայտարարել է նա։ Խոսելով Եվրամիության, միջազգային լրատվամիջոցների և Ուկրաինայի նախագահի մասին՝ Օրբանն ընդգծել է՝ մեր երկիրը դեռ երբեք այսքան շատ հակառակորդներ չէր ունեցել։
ՊԱԿԻՍՏԱՆԻ ՎԱՐՉԱՊԵՏԸ ԴԱԴԱՐԵՑՐԵԼ Է ՊԱՇՏՈՆԱՎԱՐՈՒՄԸ
Պակիստանի վարչապետ Իմրան Խանը դադարեցնում է պաշտոնավարումը, սակայն կշարունակի կատարել երկրի ղեկավարի լիազորությունները մինչև նոր վարչապետի նշանակումը։
Ապրիլի 3-ին Պակիստանի նախագահը նախարարների կաբինետի ղեկավարի առաջարկով ցրել է խորհրդարանը այն բանից հետո, երբ խորհրդարանի ստորին պալատի փոխխոսնակ Քասիմ Սուրին մերժել է ընդդիմության առաջարկը՝ քվեարկության դնելու Իմրան Խանին անվստահության քվե հայտնելու հարցը՝ նման քվեարկությունը անվանելով հակասահմանադրական։