ԱՄՆ-ԹՈՒՐՔԻԱ ՔՆՆԱՐԿՈՒՄ
ԱՄՆ նախագահի խորհրդականը և Թուրքիայի նախագահի խոսնակը հեռախոսազրույցի ընթացքում քննարկել են տարածաշրջանային հարցեր, այդ թվում՝ Թուրքիայի և Հայաստանի հարաբերությունների կարգավորմանն ուղղված ջանքերը՝ ասված է Սպիտակ տան Ազգային անվտանգության խորհրդի հայտարարության մեջ։
Ջեյք Սալիվանը և Իբրահիմ Քալընն անդրադարձել են նաև Ռուսաստանի հետ դիվանագիտական գործակցությանը, այդ թվում՝ «Ուկրաինայի դեմ Ռուսաստանի ենթադրյալ ագրեսիան զսպելու համատեղ ջանքերին»։
ԱՄՆ-Ը ՓՈԽԵԼ Է ԹՈՒՐՔԻԱՅԻՆ ԿՈՐԾԱՆԻՉ ՄԱՏԱԿԱՐԱՐԵԼՈՒ ԾՐԱԳԻՐԸ
Վաշինգտոնն արգելակում է Անկարային կործանիչներ մատակարարելու գործընթացը, հայտարարել է Թուրքիայի նախագահ Ռեջեփ Էրդողանը։
«Մենք ԱՄՆ-ին վճարել ենք 1 միլիարդ 450 միլիոն դոլար, բայց չենք ստացել F-35 կործանիչները։ Այժմ ամերիկացիները հարցը քննարկում են մեր պաշտպանության նախարարության հետ։ Կփորձենք լուծել այս խնդիրը՝ արդիականացնելով F-16 կործանիչները կամ ձեռք բերելով նորերը»,- նշել է Էրդողանը։
Ավելի վաղ ԱՄՆ-ը պաշտոնական ծանուցում էր ուղարկել Թուրքիային՝ վերջինիս F-35 կործանիչների մատակարարման ծրագրից դուրս մնալու մասին՝ Անկարայի կողմից ռուսական հակաօդային պաշտպանության Ս-400 համակարգեր գնելու պատճառով։ ԱՄՆ-ն առաջարկել է Թուրքիային F-35-երի փոխարեն գնել F-16 կործանիչներ։
ՔՆՆԱՐԿՎԵԼ Է ԼԱՎՐՈՎԻ ՆԱՄԱԿԸ
ԵՄ արտաքին գործերի և անվտանգության քաղաքականության հարցերով բարձր ներկայացուցիչ Ժոզեպ Բորելը, ԱՄՆ պետքարտուղար Էնթոնի Բլինքենը, ՆԱՏՕ-ի գլխավոր քարտուղար Ենս Ստոլտենբերգը և ԵԱՀԿ գործող նախագահ Զբիգնև Ռաուն հեռախոսային խորհրդակցություն են անցկացրել, որի ընթացքում քննարկել են Ուկրաինայում ստեղծված իրավիճակը և Ռուսաստանի արտգործնախարար Սերգեյ Լավրովի՝ անվտանգության երաշխիքների վերաբերյալ հունվարի 31-ի նամակը։
Կողմերը վերահաստատել են եվրոպական անվտանգության ճարտարապետության հիմնական սկզբունքների պահպանման անհրաժեշտությունը: «Պայմանավորվածություն է ձեռք բերվել շարունակել քննարկումները՝ հասցեագրելու անվտանգության ոլորտում առկա մարտահրավերները, այդ թվում՝ երկկողմ և բազմակողմ ձևաչափերով», - ասված է ԵՄ արտաքին քաղաքական գերատեսչության մամուլի ծառայության հաղորդագրության մեջ: Խորհրդակցության մասնակիցներն ընդգծել են նաև ԵԱՀԿ-ի՝ որպես անվտանգության հարցերի շուրջ բանակցությունների հարթակի կարևորությունը։
Ավելի վաղ ՌԴ ԱԳՆ ղեկավարն անվտանգության երաշխիքների վերաբերյալ նամակի մասին հաղորդագրությունները «թյուրիմացություն» է անվանել․ «Մոսկվան ԱՄՆ-ին և այլ երկրներին դեռևս չի ուղարկել իր վերջնական պատասխանը»,- ընդգծել է Լավրովը:
ՀՆԱՐԱՎՈՐ ԵՆ ԱՄՆ-ՌԴ ՇՓՈՒՄՆԵՐ ՈՒԿՐԱԻՆԱՅԻ ՀԱՐՑՈՎ
ՄԱԿ-ում Ամերիկայի Միացյալ Նահանգների մշտական ներկայացուցիչ Լինդա Թոմաս-Գրինֆիլդը հայտնել է, որ ԱՄՆ-ը պատրաստ է Ռուսաստանի հետ շփումների՝ Ուկրաինայում ստեղծված իրավիճակի հարցով։ Նա հավելել է նաև, որ ԱՄՆ-ը չի համարում, որ Ուկրաինայի շուրջ առճակատումն անխուսափելի է։ «Նախագահ Ջո Բայդենն արդեն երկու անգամ զրուցել է նախագահ Վլադիմիր Պուտինի հետ: Թեև ես ոչինչ չգիտեմ նոր հանդիպումների մասին, կարող եմ ասել, որ մենք պատրաստ ենք շարունակել քննարկումները բոլոր մակարդակներում», - նշել է նա:
ՄԱԿ-ում Ռուսաստանի մշտական ներկայացուցիչ Վասիլի Նեբենզյան էլ հայտարարել է, որ Ռուսաստանը նույնպես ցանկանում է ընդլայնել Միացյալ Նահանգների հետ գործակցության շրջանակը․ «Միացյալ Նահանգները, սակայն, սահմանափակել է շփումների շրջանակը՝ թողնելով միայն ընդհանուր հետաքրքրություն ներկայացնող ոլորտներ կամ էլ այնպիսի հարցեր, որտեղ ԱՄՆ-ն միակողմանի շահագրգռվածություն ունի»,- ընդգծել է նա։
ՄԵԾ ԲՐԻՏԱՆԻԱ-ՈՒԿՐԱԻՆԱ-ԼԵՀԱՍՏԱՆ. ԳՈՐԾԱԿՑՈՒԹՅԱՆ ՆՈՐ ՁԵՎԱՉԱՓ
Մեծ Բրիտանիայի վարչապետ Բորիս Ջոնսոնը և Ուկրաինայի նախագահ Վոլոդիմիր Զելենսկին Կիևում կայացած երկկողմ բանակցություններից հետո հանդես են եկել հայտարարությամբ։ Նրանք հայտարարել են, որ Ուսաստանի կողմից Ուկրաինա ենթադրյալ ներխուժումը ռազմավարական սխալ կլինի և հետևանքներ կունենա։
Ջոնսոնը և Զելենսկին հաստատել են Ուկրաինայի և Մեծ Բրիտանիայի միջև ռազմավարական գործընկերության ընդլայնման մտադրությունը փոխադարձ հետաքրքրություն ներկայացնող ոլորտներում։ Քաղաքական գործիչները պայմանավորվել են գործակցել Ուկրաինայի էներգետիկ անվտանգության ոլորտում։ Ավելի վաղ Գերագույն Ռադայում ելույթի ընթացքում Զելենսկին հայտարարել է նաև, որ նոր ձևաչափ է ստանում Մեծ Բրիտանիայի, Ուկրաինայի և Լեհաստանի գործակցությունը։
