Հայաստանի կառավարության ծրագիրը երկու հիմնասյուն ունի՝ երկրում օրենքի ու իրավունքի դիկտատուրայի հաստատում և տարածաշրջանում ու Հայաստանում խաղաղ զարգացման դարաշրջանի ձևավորում. «Արդար Հայաստան» կուսակցության նախագահ Նորայր Նորիկյանի գնահատականն է:
Նա նկատում է, որ կառավարության ծրագրում տեղ են գտել դրույթներ, որոնք եղել են իր կուսակցության նախընտրական ծրագրում, ինչն իրեն ուրախացնում է:
Նորայր Նորիկյան («Արդար Հայաստան» կուսակցության նախագահ) - Մեզ որակապես նոր ազգային անվտանգության ռազմավարություն է պետք, որակապես նոր ազգային անվտանգության դոկտրին է պետք:
Մի փակագիծ բացեմ, որ ինքս եմ բարձրացրել մարտական հերթապահություն իրականացնող ստորաբաժանումները սահմանապահ զորքերով փոխարինելու մասին հարցը: 2021-2026 թվականների զարգացման ծրագիրը բաղկացած է 6 հիմնական մասից, սակայն Նորիկյանի գնահատմամբ՝ այնտեղ չկա հեղափոխական մոտեցում, որն արմատական ու որակական փոփոխություններ կբերի հասարակության կյանքում, իսկ Հայաստանի անվտանգային իրավիճակն այլ բան է թելադրում:
Նորայր Նորիկյան - Մենք չենք տեսնում, թե 5 տարի հետ ինչպիսի պետություն ենք ունենալու, զարգացման ինչպիսի պատկեր ենք ունենալու:
Արտախորհրդարանական ընդդիմության ներկայացուցիչ Գևորգ Գորգիսյանն էլ կարծում է, որ Նիկոլ Փաշինյանի կառավարության ներկայացրած ծրագրում առաջընթաց կա՝ 2019 թ. ծրագրի համեմատությամբ: Նա հաշվել է՝ 2019 թ. կառավարության ծրագրում 90-ից ավելի «պետք է» ձևակերպումն է եղել: Սակայն Գորգիսյանին այս պահին այլ բան է անհանգստացնում:
Գևորգ Գորգիսյան («Լուսավոր Հայաստան» կուսակցության փոխնախագահ) - Արցախի հիմնախնդրի հետ կապված ձևակերպումը, որ մեզ համար առաջնահերթություն է, Արցախի բնակչության, ընդ որում՝ ոչ թե Արցախ, այլ Լեռնային Ղարաբաղ ձևակերպմամբ, անվտանգությունը, մշակութային ու կրոնական ժառանգության պահպանումը, այստեղից չի բխում, որ մենք ուզում ենք Արցախի անկախություն, միջազգային ճանաչում: Փաշինյանը միշտ ասել է, որ միայն անկախությունն է, որ կարող է երաշխավորել Արցախի բնակչության անվտանգությունը:
Կառավարության ծրագրում գիտության, գյուղատնտեսության զարգացման հետ կապված լավ տեսլական կա, բայց այդ ծրագրերի իրականացումը կառավարության կառուցվածքային փոփոխություն է ենթարդրում՝ շարունակեց Գևորգ Գորգիսյանը: Միևնույն ժամանակ հիշեցրեց, որ ծրագրում տեղ են գտել դրույթներ, օրինակ՝ գյուղատնտեսական վարկերը, որոնք իրենց չեն արդարացրել:
Գևորգ Գորգիսյան - Գյուղատնտեսական ամբողջ ծրագրերը, որոնք գրված են, որպեսզի իրականացվեն, դրանց համար առնվազն գյուղատնտեսության նախարարություն է հարկավոր, որ դրանով զբաղվի:
«Ալյանս» կուսակցության նախագահ Տիգրան Ուրիխանյանն էլ կցանկանար կառավարության ծրագրում ավելի շատ տեսնել սոցիալական ուղղվածություն: Նրա խոսքով՝ կառավարության ծրագրում մի շարք կարևոր հարցերի ընդամենը հպանցիկ անդրադարձ է կատարված:
Տիգրան Ուրիխանյան («Ալյանս» կուսակցության նախագահ) - Ժամ առաջ պետք է սկսել, քանի որ Հայաստանում անհրաժեշտ է ստեղծել վերգետնյա ջրային ցանցի ակումուլացիայի գործընթաց, միկրոջրամբարների կառուցում, դրանով իսկ չվերամշակվող գյուղատնտեսական նշանակության հողատարածքներ, որոնք 70 տոկոս են, տարածքը կիսելու գործընթացը:
Կառավարության ծրագիրն Ուրիխանյան լավն է որակում, բայց իրականացման հետ կապված մտավախություն ունի, քանի որ ծրագիրը ներկայացրել է մի կառավարություն, որը թիկունքում չիրականացված խոստումներ ունի:
Տիգրան Ուրիխանյան - Խոստումներից առաջինն ընտրակարգի փոփոխությունն էր, բայց մենք երկու ընտրություն անցկացնում ենք հին ընտրակարգով, երկրորդն այն է, որ նախկինում երկիրը քայքայած բոլոր արատավոր երևույթների ու դրանց մեղավորների վերացում կամ առնվազն պատիժ, բայց այսօր երկիրը քայքայածները ձեռք ձեռքի տված խորհրդարանում աշխատում են:
Կառավարության ծրագրի թիրախներն ու դասավորվածությունը ճիշտ են՝ կարծում է Քրիստոնեա-ժողովրդավարական կուսակցության նախագահ Լևոն Շիրինյանը՝ շեշտելով, որ առաջին տեղում ազգային անվտանգությունն ու արտաքին քաղաքականությունն են, ինչը բխում է Հայաստանի այս օրերի իրականությունից: Սակայն նա վստահ է, որ լավագույն ծրագիրն անգամ կյանքի չի կոչվի, եթե երկրում արտաքին ու ներքին կայունություն չլինի:
Լևոն Շիրինյան (Քրիստոնեա-ժողովրդավարական կուսակցության նախագահ) - Ռևանշիզմը մնում է իր էության մեջ, հակապետական ու հակահայկական, դա իշխանափոխություն է, որը նշանակում է պետականության լիկվիդացում, Ռուսաստանի խուտորի վերածում Հայաստանը:
Լևոն Շիրինյանին չի գոհացրել, որ ծրագրում մեծ դեր է տրված ՌԴ-ին, գոհացնում է, որ արժևորվել է Եվրամիության ու Միացյալ Նահանգների հետ հարաբերությունների ամրապնդումը:
Լևոն Շիրինյան - Գնահատելի է չափազանց Միացյալ Նահանգների դերի գնահատականը գեոստրատեգիական իմաստով: Ճշգրիտ է ռազմավարական երկխոսությունը, սա շատ բարձր մակարդակ է, եթե նկատի ունենանք ԱՄՆ-ի պոտենցիալն աշխարհում ու ակտիվությունը Հայաստանում՝ ի դեմս դեսպանի:
Արտախորհրդարանական ուժերը որոշ հարցերում համակարծիք են՝ ծրագիրը լավն է, սակայն կառավարությունում չկան կադրեր՝ այն կյանքի կոչելու համար: Նրանք կառավարությունից ակնկալում են պատասխան՝ ինչպես են հասնելու այս կամ այն նպատակին, քանի որ, ըստ նրանց, ինչպես հարցի պատասխանը բացակայում է:
Հեղինակ՝ Անի Օհանյան
