Ազգային ժողովում ընտրական օրենսդրության փոփոխությունների քննարկումն ուղեկցվեց սուր բանավեճով։
Ընդդիմադիր պատգամավորներ Արծվիկ Մինասյանից և Արթուր Խաչատրյանից հետո ամբիոնին մոտեցավ ՔՊ խմբակցության պատգամավոր Ծովինար Վարդանյանը, որն իր ելույթը սկսեց՝ դիմելով ընդդիմադիր գործընկերներին:
«Բարև ձեզ: Ուզում եմ իմանամ՝ ինչի՞ եք եկել։ Ճիշտն ասած՝ ընդդիմությանն է հարցը ուղղված, որովհետև մենք սովորել էինք, որ դուք այլևս այստեղ չեք ներկայանում, բայց պարզ է՝ ինչի՞ եք եկել. ընտրությունների ժամանակ ձեր մի թևի համար, այսպես ասած, ընտրական տուրիզմի եկած քաղաքացիների մասով, որի արդյունքում այդ հանրային պահանջը ձևավորվել է:
Այ, այդտեղ է խնդիրը. դուք հանրությանը չեք լսում, դրա համար էլ կիսվել է ձեր խմբակցությունը, հաջորդ գումարմանը կեսով է ներկայանալու։ Որ հանրությանը լսեք, չե՞ք ասի՝ որտե՞ղ է այդ հանրային պահանջը»,- ասաց նա՝ զարմանք հայտնելով, որ ընդդիմադիրները եկել են աշխատանքի:
Ինչ վերաբերում է ընդդիմադիրների՝ նախագծի հակասահմանադրականության վերաբերյալ հայտարարություններին, ասաց՝ գոյություն ունեն պատկան մարմիններ, որոնք կտան դրա գնահատականը:
«Քննարկման մենք միշտ բաց ենք եղել: Ամեն դեպքում, բարի գալուստ, չնայած սա ձեր վերջինն է»,- նկատեց Վարդանյանը:
Այնուհետև, ի պատասխան նրա ելույթի, «Հայաստան» խմբակցության անունից հանդես եկավ Արծվիկ Մինասյանը. «Տիկի՛ն Վարդանյան, այս տեմպով դուք շուտով արդեն հաց ուտելն էլ կորոշեք՝ ով հաց ուտի, և ով չուտի, ով ջուր խմի, ով չխմի։ Դուք ո՞վ եք, որ ասեք՝ ինչի՞ եք եկել։ Ո՞վ եք ընդհանրապես։ Չէ՛, ես ուզում եմ հասկանամ, էլի, Դուք Ձեզ իրավունք եք վերապահում… Ո՞վ եք Դուք»։
Մինասյանի խոսքով՝ ինքը չի հասկանում՝ ոնց է ձևավորվել հանրային պահանջը:
Նրա ելույթին արձագանքեց ԱԺ նախագահ Ալեն Սիմոնյանը, որը հիշեցրեց՝ Ծովինար Վարդանյանը ՀՀ ընտրված պատգամավոր է՝ իշխող մեծամասնության ներկայացուցիչ:
«Այն թիմի ներկայացուցիչն է, որը Ձեզ և ձեր թիմին առնվազն երկու անգամ ջախջախել է ընտրություններում, ուստի խնդրում եմ՝ կոռեկտության սահմանների մեջ Ձեզ պահեք»,- ասաց Սիմոնյանը:
Նրան տեղից արձագանքեց Մինասյանը՝ հարցնելով, թե նա՛ ինչի է եկել:
«Պարո՛ն Մինասյան, ի տարբերություն ձեզ՝ մենք գործի ենք գալիս, իսկ դուք գալիս եք՝ չգիտեմ ինչի համար»,- նկատեց ԱԺ նախագահը:
Հիշեցնենք՝ խորհրդարանում քննարկվում է նախագծերի փաթեթ, որով առաջարկվում է ընտրություններին և հանրաքվեներին մասնակցելու համար սահմանել քվեարկության կամ հանրաքվեի օրվան նախորդող 48-րդ օրվա դրությամբ, իսկ Ազգային ժողովի արտահերթ ընտրությունների կամ նոր քվեարկության դեպքում՝ 28-րդ օրվա դրությամբ՝ համապատասխանաբար դրանց նախորդող 365 օրվա ընթացքում Հայաստանի Հանրապետությունում փաստացի 183 և ավելի օր գտնվելու պահանջ՝ բացառություն սահմանելով այն դեպքերում, երբ բացակայությունը պայմանավորված է եղել ՀՀ հանրային ծառայության մեջ գտնվող անձի ծառայողական նպատակներով արտերկրում գտնվելու կամ արտերկրում ԲՈՒՀ-ում ուսումնառության հանգամանքներով:
