Մայիսի 2-ին Կալիֆոռնիայի Դեմոկրատական կուսակցությունն ընդունել է Կալիֆոռնիայի նահանգի Դեմոկրատական կուսակցության կենտրոնական կոմիտեի անդամ և Լոս Անջելեսի Դեմոկրատական կուսակցության ընտրված անդամ Էլեն Ասատրյանի հեղինակած բանաձևը, որով դատապարտում է Թուրքիային և Ադրբեջանին իրենց գործած պատերազմական հանցագործությունների համար` սեպտեմբերի 27-ին Արցախի վրա հարձակումից հետո տեղի ունեցած 44-օրյա պատերազմի ընթացքում: Բանաձևը նաև հորդորում է ԱՄՆ Կոնգրեսին և Բայդենի վարչակազմին՝ պատժամիջոցներ կիրառել Թուրքիայի և Ադրբեջանի նկատմամբ և պահանջել, որ Ադրբեջանի իշխանություններն անհապաղ ազատ արձակեն բոլոր հայ ռազմագերիներին և գերեվարված քաղաքացիական անձանց:
Ավելին՝ այն նաև կոչ է անում Կալիֆոռնիայի պետական աշխատողների կենսաթոշակային գրասենյակին և Նահանգային ուսուցիչների կենսաթոշակային գրասենյակին՝ սոցիալական պատասխանատվություն ստանձնել և պետական աշխատողների կենսաթոշակային բոլոր միջոցները դուրս հանել Թուրքիայի և Ադրբեջանի կողմից թողարկված ներդրումային գործիքակազմից, քանի դեռ Թուրքիան չի ճանաչել 1915-1923 թվականների Հայոց ցեղասպանությունը, և քանի դեռ արցախցիներին չի տրվել իրենց պատմական հողի վրա ազատ ինքնորոշման հնարավորություն։ Բանաձևն ընդունվել է կիրակնօրյա համագումարի ընդհանուր նիստում՝ ձայների բացարձակ կողմ քվեարկությամբ՝ այսպիսով դառնալով կուսակցության 2021 թվականի գործունեության 13 առաջնահերթություններից մեկը։
«Այս բանաձևի ընդունումով որպես իր առաջնահերթություններից մեկը՝ Կալիֆոռնիայի դեմոկրատական կուսակցությունը հստակ հաղորդագրություն ուղարկեց Անկարային, Բաքվին, Վաշինգտոնին, ինչպես նաև Կալիֆոռնիայի պետական աշխատողների կենսաթոշակային գրասենյակին և Նահանգային ուսուցիչների կենսաթոշակային գրասենյակին, որ ժամանակն է անհապաղ քայլեր ձեռնարկել Ադրբեջանում պահվող հայ ռազմագերիների և գերեվարված քաղաքացիական անձանց անվտանգ վերադարձն ապահովելու համար և, ոչ միայն պատժամիջոցներ կիրառել Թուրքիայի և Ադրբեջանի նկատմամբ, այլ նաև զրկել այդ երկու երկրներին որևէ ներդրումային ծրագրից։ Աջակցությունները, առևտուրը և ներդրումներ իրականացնելը նշանակում է հանցակից դառնալ Թուրքիայի ցեղասպան քաղաքականությանն ու ցեղասպանության ժխտմանը, մասնակցել այն ռազմական հանցագործություններին, որ Թուրքիան և Ադրբեջանը շարունակում են իրականացնել մինչև այսօր։ Սա մարդասիրական ճգնաժամ է, որը պահանջում է մեր համարձակ նախաձեռնողականությունն ու մեր անմիջական ուշադրությունը: Մեր պարտքն ու բարոյական պարտականությունն է՝ ամուր դիրքորոշում ցուցաբերել մարդու իրավունքների ոտնահարումների դեմ, ցավի այս պահին զորակցություն ցույց տալ, ուժեղացնել մեր ազգային փոքրամասնությունների ձայները՝ հակառակ ճնշումների պաշտպանելով մարդու կյանքի, ազատության և արժանապատիվ գոյության հիմնարար արժեքները»,- նշում է Էլեն Ասատրյանն ու երախտագիտություն հայտնում այն բոլոր աջակիցներին, ովքեր սատարել են բանաձևի ընդունմանը:
«Շնորհակալ եմ այն ավելի քան 125 կազմակերպություններին և ղեկավարներին, քաղաքական և հասարակական գործիչներին, Դեմոկրատական կուսակցության անդամներին՝ իրենց երաշխավորագրերի և աջակցության համար։ Նրանց թվում են կոնգրեսական Ադամ Շիֆը, Լոս Անջելեսի քաղաքային խորհրդի անդամ Փոլ Կրեկորյանը, ԴԿԿԿ անդամներ Հանս Ջոնսոնը, Դոկտոր Սյուզի Աբաջյանը, Կև Աբազաջյանը, Մալկոլմ Ջոնսոնը, ինչպես նաև Ամերիկայի Հայ դատի հանձնախումբը, Ամերիկայի Հայ ազգային կոնգրեսը, Արևմտյան Ամերիկայի համահայկական խորհուրդն իր 24 տարածաշրջանային և ազգային հայ-ամերիկյան հոգևոր, քաղաքական և հասարակական կազմակերպություններով, Գլենդելի ուսուցիչների ասոցիացիան, նաև՝ կուսակցության բանաձևերի հանձնաժողովի անդամները և շուրջ 900 պատվիրակներ, ովքեր միաձայն կողմ քվեարկեցին 21-04.143 բանաձևին»,- նշել է Էլեն Ասատրյանը։
«Միանգամայն անընդունելի է, որ Լեռնային Ղարաբաղում պատերազմի ավարտից շատ ամիսներ անց հարյուրավոր հայ զինծառայողներ և խաղաղ բնակիչներ մնում են Ադրբեջանի կալանքի տակ: Քիչ հայտնի է նրանց վիճակի, վերաբերմունքի և բարեկեցության մասին»,- ասել է կոնգրեսական Ադամ Շիֆը, որը ցուցակագրվել է որպես սկզբնական բանաձևի առաջին հովանավոր: «ԱՄՆ-ը պետք է օգտագործի բոլոր դիվանագիտական լծակները` ապահովելու գերի ռազմագերիների և խաղաղ բնակիչների վերադարձը, և Ադրբեջանի վրա հետևանքներ են պարտադրում մարդու իրավունքների շարունակական ոտնահարումների համար: Ես հպարտ էի աջակցելու Էլեն Ասատրյանի աշխատանքին այս բանաձևի վերաբերյալ, որը կոչ է անում Բայդենի վարչակազմին և Կոնգրեսին՝ դատապարտել Թուրքիային և Ադրբեջանին և պահանջել, որ Ադրբեջանի իշխանությունները անհապաղ ազատ արձակեն բոլոր հայ ռազմագերիներին և գերեվարված խաղաղ բնակիչներին»,- ավելացրել է նա:
