Կառավարության առջև Ձեր կողմից ակցիաների կազմակերպումն ինձ համար մեծ ցավ է, և սա պրոբլեմ է մեր ժողովրդի, Զինված ուժերի, իրավապահ համակարգի և կառավարության համար, և միասին պետք է գտնենք լուծումներ։ Այդ մասին խաղաղ պայմաններում զոհված զինծառայողների ծնողների հետ հանդիպմանն ասաց վարչապետ Նիկոլ Փաշինյանը։
Նա հայտարարեց, որ պետք է գտնել լուծման նոր բանաձև, սակայն այն պայմանով, որ բոլորը պետք է ընդունեն այդ ճշմարտությունը՝ անկախ նրանից, թե ինչպիսին է այդ ճշմարտությունը։
«Ես այսօր խնդիր եմ դնելու, որ համաձայնության գալու արդյունքում Դուք պետք է դադարեցնեք ձեր ակցիաները։ Եթե, իհարկե, համաձայնության չգանք, Դուք կշարունակեք։ Ես ամեն շաբաթ պատրաստ եմ և ուզում եմ ձեզ ինչ-որ բան ասել, բայց իմ ասելիքը բովանդակություն պետք է ունենա»,- ասավ վարչապետը։
Նա առաջարկեց հարցի լուծման մի քանի տարբերակ․
1․Նշված քրործերը հանձնարարել այլ քննչական մարմնի, այլ քննիչների, որոնք նախկինում առնչություն չեն ունեցել այդ գործերի հետ
2․ Քննչական գործերով խորհրդակցություն հրավիրել վարչապետի մոտ, որը կհեռարձակվի ուղիղ եթերում, կլինեն հարցուպատասխաններ և եզրակացություններ
3․ Զինծառայողների ծնողները կարող են ձևավորել իրավապաշտպանների, իրավաբանների վստահելի խումբ, և քրգործերի քննությունը կիրականացնի այդ խումբը։ «Այսինքն, քրգործի ղեկավարին տաք հետախուզական և օպերատիվ հանձնարարականներ, օրինակ, ասեք՝ այս գործողությունը սխալ է արված, ուղղեք, կամ այս քննչական գործողությունն արված չէ՝ արեք և այլն»,- պարզաբանեց Փաշինյանը։
4․ Քնննիչները և դատախազները ներկայանա Ազգային ժողով, պատասխանեն պատգամավորների հարցերին, որի արդյունքում կրկին կտրվեն դատավարական, հետախուզական գործողությունների ցուցումներ։
5․ Վարչապետի հանձնարարությամբ կազմել միջգերատեսչական աշխատանքային խումբ, որում ներգրավված կլինեն նախաքննություն իրականացնող մարմինը, հսկողություն իրականացնող դատախազը, ՀԿ-ների ներկայացուցիչներ, իրավապաշտպաններ, որոնք կտան դատավարական, հետախուզական գործողությունների ցուցումներ։ «Բայց ես սրան կհամաձայնեմ միայն մեկ պայմանով՝ որ այդ գործողությունների արդյունքում ինչ եզրակացության գանք, դուք համաձայնեք դրա հետ»,- նշեց կառավարության ղեկավարը։
6․ Նկարահանել ֆիլմեր այդ քրգործերի վերաբերյալ և հանրության դատին ներկայացնել այդ գործերը։
«Այսքանը, ես երկար մտածել եմ այս հարցի շուրջ և այլ լուծում չեմ գտնում»,- ասաց Փաշինյանը։
Նա առաջարկեց, որ յուրաքանչյուրը գրի այն հարցերը, որոնց պատասխանները ինքը պետք է տա։ Բոլոր քրգործերը, վարչապետի խոսքով, կուսումնասիրվեն առանձին։
Վարչապետի առաջարկի շուրջ ծավալվեց քննարկում, Նիկոլ Փաշինյանը լսեց ծնողների հարցերն ու առաջարկությունները: Արդյունքում՝ վերը նշված առաջարկն արժանացավ հավանության և պայմանավորվածություն ձեռք բերվեց, որ ծնողները ապրիլի 10-ին գրավոր կներկայացնեն փաստաբանների իրենց թեկնածուներին: Նիկոլ Փաշինյանն առաջարկեց նաև մինչ ապրիլի 10-ը հանդիպել ևս մեկ անգամ՝ աշխատանքային կարգով քննարկումները շարունակելու նպատակով:
Հանդիպման ավարտին վարչապետը Մարտի 8-ի կապակցությամբ ծաղիկներ նվիրեց և շնորհավորեց զինծառայողների մայրերին։
