ԱՄՆ Սենատի մի խումբ անդամներ հայտարարել են, որ համաձայնության են եկել Սպիտակ տան հետ՝ Ռուսաստանի դեմ պատժամիջոցները խստացնելու մասին օրինագծի ընդունման վերաբերյալ: Այս մասին գրավոր հայտարարություն են տարածել սենատորներ Ջին Շահինը, Ռիչարդ Բլումենթալը, Ռոջեր Ուիքերը և Լինդսի Գրեհեմը, որոնք ներկայացնում են ինչպես իշխող Հանրապետական, այնպես էլ ընդդիմադիր Դեմոկրատական կուսակցությունները:
Քննարկվող օրինագիծը ներկայացվել է 2025 թվականի ապրիլի սկզբին Սենատի երկկուսակցական անդամների խմբի կողմից։ Գրեհեմը և Բլումենթալը հիմնական հեղինակներն էին։ Նախաձեռնությունը ներառում է երկրորդական պատժամիջոցներ Ռուսաստանի առևտրային գործընկերների նկատմամբ։ Օրենսդիրների առաջարկը ներառում էր 500% ներմուծման մաքսատուրք այն երկրներից ԱՄՆ ներմուծման համար, որոնք գնում են նավթ, գազ, ուրան և այլ ապրանքներ Ռուսաստանից։
Միևնույն ժամանակ, ԱՄՆ սենատոր Ռենդ Փոլն անցյալ տարի Responsible Statecraft պորտալում հրապարակված հոդվածում զգուշացրել էր, որ այս օրինագծի հնարավոր ընդունումից «ամենաշատը կտուժի» Միացյալ Նահանգները՝ «թե՛ տնտեսապես, թե՛ ռազմավարական առումով»։ ԱՄՆ ֆինանսների նախարար Սքոթ Բեսենթն այս տարվա հունվարին հայտարարել էր, որ Վաշինգտոնի վարչակազմն այս օրինագիծը համարում է ավելորդ, քանի որ ԱՄՆ նախագահ Դոնալդ Թրամփն արդեն իսկ ունի բոլոր անհրաժեշտ լիազորություններն այս ոլորտում։
