Իրանի արտաքին գործերի նախարարության խոսնակ Էսմայիլ Բաղաեին հայտարարել է, որ Իրանը մերժել է հրադադարի նոր առաջարկը, այն բանից հետո, երբ ԱՄՆ նախագահ Դոնալդ Թրամփը երկուշաբթի պահանջել էր, որ Թեհրանը վերաբացի Հորմուզի նեղուցը՝ հայտնում է IRNA-ն։
Իրանին և ԱՄՆ-ին էր ուղարկվել Եգիպտոսի, Պակիստանի և Թուրքիայի մշակած առաջարկի նախագիծը, որը 45-օրյա հրադադարի և Հորմուզի նեղուցի վերաբացման կոչ է անում։
Առաջարկի նպատակն է ժամանակ ստեղծել ավելի լայն բանակցությունների և հնարավոր է՝ ավելի երկարատև խաղաղության համաձայնագրի համար։ Պակիստանն այն կիրակի ուշ երեկոյան ուղարկել էր Իրանի արտաքին գործերի նախարար Աբբաս Արաղչիին և ԱՄՆ հատուկ դեսպանորդ Սթիվ Ուիթքոֆին։
IRNA գործակալությունը գրում է, որ Թեհրանը մերժել է ժամանակավոր հրադադարի առաջարկը՝ փոխարենը պահանջելով հակամարտության մշտական դադարեցում՝ իր պայմաններով։
Վաշինգտոնը դեռևս չի արձագանքել հրադադարի առաջարկին։
