Առաջարկում ենք նոր ծրագիր սկսել, որը վերաբերելու է Ղարաբաղից տեղահանված մեր հայրենակիցներին, որոնք իրավունք ունեն այս պահի դրությամբ ստանալ այն հավաստագրերը, որոնք տրամադրում ենք, բայց, ընտանեկան կամ այլ կարգավիճակից ելնելով, չեն կարողանալու: Այդ մասին Կառավարության՝ դեկտեմբերի 25-ի նիստին ասաց ԱՍՀ նախարար Արսեն Թորոսյանը:
«Դրանք հիմնականում փոքրաթիվ ընտանիքներն են՝ 1-3 անդամ ունեցող, որոնք ունեն խոր հաշմանդամության կամ ծանր հաշմանդամության կարգ, կամ բարձր տարիքի են, և մենք նրանց այլընտրանք ենք առաջարկում այս ծրագրով: Այլընտրանքը հետևյալն է. որ եթե նրանք բավարարում են այն բոլոր պայմանները, որոնք թույլ են տալիս նրանց օգտվել հավաստագրից (դա հիմնականում քաղաքացիության պահանջն է), բայց չեն կարողանալու, որովհետև այն գումարը քիչ է լինելու, ասենք՝ 1 կամ 2 հոգանոց ընտանիք է, և նույնիսկ ամենաբարձր թվով՝ գումարով, չեն կարողանալու հավաստագիրը իրացնել, մենք նրանց հնարավորություն ենք տալու գրանցվել մեր սոցիալական բնակարանային ֆոնդի ծրագրի հերթացուցակում՝ որպես բնակարանային ֆոնդի պոտենցիալ շահառու:
Բայց քանի որ այդ պահին հավանաբար չենք կարողանալու տալ նրանց այդ բնակարանային ֆոնդը, որովհետև այդքան բնակարան դեռ չունենք, նրանց տալու ենք վարձավճարի մասնակի փոխհատուցում՝ 40 հազար դրամի չափով 10 տարի ժամանակով: 10 տարվա ընթացքում, եթե իրենց բնակության մոտ գտնվող և իրենց կենսական շահերին մոտ գտնվող վայրում կունենան սոցիալական բնակարան, մենք նրանց առաջարկելու ենք որևէ փուլում տեղափոխվել այդ բնակարան՝ որպես ավելի կայուն ապրելու վայր: Եթե նրանք կհրաժարվեն այդ պահին, ապա կզրկվեն այդ միջոցառումից: Եթե կհամաձայնեն, կշարունակեն ապրել մեր սոցիալական բնակարանային ֆոնդում»,- ասաց նա:
Ըստ նախարարի՝ խոսքն այնպիսի ընտանիքների մասին է, որոնք բաղկացած են միայն անժամկետ՝ առաջին կամ երկրորդ խմբի հաշմանդամություն ունեցող կամ ֆունկցիոնալության գնահատման համակարգով խոր կամ ծանր աստիճան ունեցող, կամ 60 և ավելի տարեկան անդամներից: Օրինակ, 1 մարդ կարող է լինել 40 տարեկան և ունենալ 1-ին խմբի հաշմանդամություն, մյուս ընտանիքի անդամը կարող է լինել 60 տարեկան: Այս նախագծի տրամաբանությունն այն է, որ այդ քաղաքացիները հավանաբար չեն կարողանալու աշխատել, հավելյալ միջոցներ գեներացնել, հիփոթեքի գումար վճարել: Սա մի կարգավորում է:
Մյուս կարգավորման համաձայն՝ եթե երկու հոգանոց ընտանիք է, նրանց գումարային տարիքը պետք է գերազանցի 115 տարին: Եթե յուրաքանչյուր անձի հաշվով հաշվարկվի, ապա մի քաղաքացին կարող է լինել, ասենք, 57 տարեկան, մյուսը՝ 59: Իսկ եթե 3 հոգանոց ընտանիք է, ապա պետք է գերազանցի 175 տարին: Սրանով մենք լուծում ենք փոքրաթիվ ընտանիքների բնակապահովման հարցը:
Համակարգը կմեկնարկի 2026 թվականի հուլիսի 1-ից:
Վարչապետ Նիկոլ Փաշինյանը խոսեց նաև չզեկուցվող հարցերի մեջ ընդգրկված երկու այլ որոշումների նախագծերից, որոնք ևս վերաբերում են ԼՂ-ից տեղահանվածների աջակցությանը: Մեկը վերաբերում է սոցիալական որոշակի խմբերի, որոնց Կառավարությունն աջակցում է բնակվարձի հարցում: Այս ծրագիրը պետք է ավարտվեր դեկտեմբերի 31-ին, քանի որ կար կանխավարկած, որ վերջիններս բնակապահովման ծրագրից կօգտվեն, և բնակարանի վարձավճար տալու անհրաժեշտություն չի լինի: Ըստ այդմ՝ որոշվել է, որ բնակարան ձեռք չբերածների համար ծրագիրը կերկարացվի առնվազն մինչև 1 տարով: Բայց պայմանն այն է, որ բնակարանի ձեռքբերում տեղի է ունենա:
Եվս մեկ որոշում, որը կնպաստի ԼՂ-ից տեղահանվածների զբաղվածության խթանմանը. դա վերաբերում է ԼՂ-ից տեղահանված այն քաղաքացիներին, որոնք օգտվել են բնակապահովման ծրագրից՝ փոքր բիզնես հիմնելու տրամաբանությամբ: Նրանց կտրամադրվի աջակցություն, որպեսզի որոշակի տնտեսական գործունեություն ծավալեն: Աջակցությունը կլինի նախասիրությունների շրջանակում դասընթացների տեսքով, պրոֆեսիոնալ մենթորի կցումով. վերջինս կուղեկցի նրանց բիզնես ստեղծելու և հաջողություն ունենալու պրոցեսում: Նաև նախատեսվում է սարքավորումների ձեռքբերման համար աջակցություն:
