Չեմ կարող չարձագանքել պարոն Խաչատրյանի («Հայաստան» խմբակցության պատգամավոր Արթուր Խաչատրյան խմբ.) մի քանի հայտարարության: Երբ կարդում եք Կառավարության ծրագիրը և խոսում եք այդ ծրագրում տեղ գտած ձևակերպումների մասին Ղարաբաղի վերաբերյալ, խոսեք այն մասին, թե ինչով էին զբաղված Ղարաբաղի ղեկավարների հետ նույն Դաշնակցությունը և ձեր քաղաքական շրջանակները, երբ այնտեղ պալատական հեղաշրջում էին անում և ոգևորված մտածում էին, որ հեսա հեղաշրջումը կներմուծեն նաև Հայաստան, ու շնորհավորում էին, ու մի քանի օր հետո լուծարում էին Ղարաբաղը, բա էդ ժամանակ դուք ասելու բան չունեի՞ք:
Այս մասին ՀՀ Ազգային ժողովի «Քաղաքացիական պայմանագիր» պատգամավորական խմբակցության անունից ելույթում հայտարարեց խմբակցության ղեկավար Հայկ Կոնջորյանը՝ ի պատասխան ընդդիմադիր պատգամավորի մեղադրանքների, թե Հայաստանը նոր վարկային միջոցներ է ներգրավում:
«Հիմա եկել եք, այս վարկային ծրագրի քննարկման ժամանակ խոսում եք Կառավարության ծրագրի այն կետի վերաբերյալ, որտեղ Կառավարությունը բազմաթիվ քայլեր է արել, բազմաթիվ հայտարարություններ է արել, որպեսզի մենք կարողանանք այդ իրավիճակը ճիշտ կառավարել:
Եվ ամեն հայտարարությունից հետո, այդ թվում՝ վարչապետի՝ այս ամբիոնից արված հայտարարություններից հետո, Դուք և Ղարաբաղում ձեր գործընկերները տորպեդահարում էիք տարատեսակ հայտարարություններով, որ ա՛յ, տեսե՛ք, հեսա մենք կգնանք, սա կանենք, նա կանենք: Վերջում տեսաք՝ ինչ արեցիք»,- ասաց նա:
Կոնջորյանը, դիմելով Խաչատրյանին, հարց ուղղեց՝ կո՞ղմ են քվեարկելու նախագծին, թե՞ ոչ:
Հիշեցնենք, որ Ազգային ժողովը քննարկում է մի նախագիծ, համաձայն որի՝ Ղարաբաղից բռնի տեղահանված ընտանիքների բնակարանային աջակցության պետական ծրագրի ֆինանսավորման համար ԱԶԲ-ից 250 մլն դոլարի վարկ կներգրավվի: Ընտանիքները ծրագրի պայմանները բավարարելու դեպքում կարող են դիմել և ստանալ հավաստագրեր՝ իրենց նախընտրած բնակավայրում գնելով նախընտրած բնակարանը կամ բնակելի տունը:
