ԱՄՆ նախագահ Դոնալդ Թրամփը նախատեսել է իր ներկայացուցիչներին գործուղել Մոսկվա և Կիև: Հատուկ դեսպանորդ Սթիվ Ուիթքոֆը Թրամփի հանձնարարությամբ կմեկնի Մոսկվա՝ հանդիպելու Ռուսաստանի նախագահ Վլադիմիր Պուտինի հետ՝ համաձայնեցնելու Ուկրաինայի հարցով խաղաղության ծրագրի վերջնական տարբերակը: Ամենայն հավանականությամբ, Ուիթքոֆին կուղեկցի Թրամփի փեսա և խորհրդական Ջարեդ Քուշները, որը նույնպես ներգրավված է գործընթացում:
Միևնույն ժամանակ, ԱՄՆ բանակի նախարար Դանիել Դրիսկոլը, որին Թրամփը նշանակել է Ուկրաինայի հարցով բանակցող, նույն թեմայով խորհրդակցություններ կանցկացնի ուկրաինական կողմի հետ՝ Կիևում: Այդ մասին Թրամփը հայտարարել է իր Truth Social-ի էջում:
«Միացյալ Նահանգների մշակած 28 կետից բաղկացած սկզբնական խաղաղության ծրագիրը լրամշակվել է՝ երկու կողմի լրացուցիչ առաջարկներով, մնացել է տարաձայնություններ առաջացնող ընդամենը մի քանի կետ»,- գրել է Թրամփը:
