Մեր ժողովուրդը պետք է հասկանա՝ ինչ է ուզում անել ընդդիմությունը՝ ի դեմս ԱԺ երկու խմբակցությունների: Այս մասին Ազգային ժողովում ՀՀ կառավարության 2021-2026 թվականների՝ 2024 թվականի կատարման ընթացքի և արդյունքների մասին զեկույցի քննարկման ժամանակ ասաց «Քաղաքացիական պայմանագիր» խմբակցության պատգամավոր, առողջապահության հարցերի մշտական հանձնաժողովի նախագահ Արսեն Թորոսյանը՝ անդրադառնալով ընդդիմության քննադատություններին:
Նրա խոսքով՝ ընդդիմությունը ցանկանում է իրենց ներքաշել այն բանավեճի մեջ, թե «ով է ավելի շատ թուրք»:
Ըստ Թորոսյանի՝ իրականում շատ դժվար է դիմանալ գայթակղությանը և չներքաշվել այդ բանավեճի մեջ, սակայն պետք է դրսևորել քաղաքական հասունություն:
«Չպետք է մտնել այդ բանավեճի մեջ, հարգելի՛ գործընկերներ և սիրելի՛ ժողովուրդ, որովհետև այդ բանավեճն է, որ մեզ կործանել է միշտ»,- հայտարարեց նա:
Վերլուծելով ընդդիմության գործողությունները՝ Թորոսյանը նկատեց՝ ընդդիմությունը ցանկանում է, որ մենք չունենանք անկախություն կամ լինենք հնարավորինս կախված ինչ-որ մի պետությունից, չեն ցանկանում, որ Հայաստանն ունենա սահման:
Անդրադառնալով ընդդիմադիր պատգամավոր Քրիստինե Վարդանյանի քննադատություններին, թե ՔՊ-ն է վարչությունով որոշել Հայաստանի սահմանը, հակադարձեց՝ նշելով, թե իրենք չեն որոշել ու չեն էլ ուզում որոշել:
«ՀՀ պետական սահմանը որոշվել է Հայաստանի Հանրապետությունը անկախանալիս, որին դուք դեմ եք եղել և մինչև հիմա դեմ եք: ՀՀ սահմանը Հայաստանի Խորհրդային Սոցիալիստական Հանրապետության վարչական սահմանն է: Ուզեք թե չուզեք, դա է ՀՀ-ի սահմանը, և մենք, այո՛, գնալու ենք և սահմանազատելու ենք այդ սահմանը մինչև վերջ, ինչպես սկսել ենք: Դուք չեք ուզում, որ մենք ունենանք սահման, որ հեշտ լինի մեզ տարբեր պետությունների տակ պառկեցնելը:
Ինչպես իմ գործընկերները նշեցին, դա ամենալուրջ ձեռքբերումն է եղել 2024-ին»,- ասաց Թորոսյանը:
Անդրադառնալով ընդդիմության քննադատություններին, թե կորցնելու ենք Սյունիքը, նկատեց՝ եթե չափեն, թե ովքեր են Ալիևի կամ Ադրբեջանի ԱԳՆ-ի հայտարարությունները մեջբերել ամենից շատ, հաղթելու է «Հայաստան» դաշինքը:
Նա մեղադրեց ընդդիմությանը Ալիևի նարատիվները Հայաստանում տարածելու համար:
«Ո՞վ է ուզում, որ Սյունիքը կորի: Նա, ով խոսում է Սյունիքի կորստի մասին: Ո՞վ է ուզում, որ լինի Արևմտյան Ադրբեջան. ով խոսում է Արևմտյան Ադրբեջանի մասին: Մեր ժողովուրդը շատ լավ գիտակցում է այս ամենը»,- հայտարարեց Արսեն Թորոսյանը:
