2025 թվականի բյուջետային հայտով դատական իշխանության կողմից ներկայացվել էր շուրջ 19,1 մլրդ դրամի ֆինանսավորման հայտ՝ շուրջ 39 մլն դրամով պակաս 2024-ի հաստատված բյուջեից: Սակայն Կառավարության կողմից հաստատված նախագիծը 2024-ի հաստատված բյուջեից և 2025-ի բյուջետային հայտից պակաս է շուրջ 1,8 մլրդ դրամով կամ 9,6 տոկոսով, որից ոչ ֆինանսական ակտիվների գծով կապիտալ ծախսերը նվազել են 299 մլն դրամով կամ 39,5 տոկոսով: Այդ մասին Ազգային ժողովում 2025 թվականի պետբյուջեի նախնական քննարկման ժամանակ ասաց Դատական դեպարտամենտի ղեկավար Նաիրի Գալստյանը:
Ընթացիկ ծախսերը նվազել են 716,2 մլն դրամով կամ 25,7 տոկոսով, որի գերակշիռ մասը կազմում են փոստային ծառայությունների ձեռքբերման գծով ծախսերը:
«Նվազեցումը 574,6 մլն դրամ է կամ 45,2 տոկոս, ինչը էլեկտրոնային ծանուցումների միասնական հարթակի պայմաններում 2025 թվականին կհանգեցնի դատական համակարգի բնականոն գործունեության խաթարմանը, ուստի անհրաժեշտ կլինի փոստային ծառայությունների կրճատված մասը վերականգնել, քանի դեռ Կառավարության կողմից հանարապետությունում չի ներդրվել փոստային ծառայություններին այլընտրանք հանդիսացող էլեկտրոնային համակարգ»,- ասաց նա:
Ըստ Նաիրի Գալստյանի գնահատականի՝ ֆինանսների նախարարության կողմից ԲԴԽ բյուջեի՝ 2025 թվականի նախագիծը ներկայացվել է 2025-2027 թթ. հաստատված ՄԺԾԾ-ի նկատմամբ առավելագույնը 4 տոկոս նվազեցումով՝ ի տարբերություն այլ պետական մարմինների, որոնց բյուջեն կրճատվել է մինչև 4 տոկոսով, իսկ ուժային և տեսչական մարմինների դեպքում բյուջեն ընդհանրապես չի նվազել, որոշ դեպքերում անգամ ավելացել է:
«Արդյունքում աշխատանքի վարձատրությանն ուղղվող գումարներն ընդհանուր առմամբ նվազել են շուրջ 750 մլն դրամով կամ միջինում 4,9 տոկոսով, որի պարագայում հաստիքային միավորների ամբողջական համալրվածության դեպքում հնարավոր չի լինի ապահովել աշխատակիցների սոցիալական երաշխիքը, ինչն էլ կհանգեցնի դատական համակարգի բնականոն գործունեության խաթարմանը»,- ասաց նա:
Միայն վերջին 2 տարիների ընթացքում շուրջ 2600 հաստիքակազմի պայմաններում մոտ 1100 անձ, իր դիմումի համաձայն, ազատվել է դատական համակարգում զբաղեցրած պաշտոնից, ինչը, ըստ Նաիրի Գալստյանի, հետևանք է գերծանրաբեռնված աշխատանքի պայմաններում անհամաչափ ցածր, ոչ մրցունակ վարձատրության:
«Աշխատավարձը մեր ամենացավոտ կողմն է, մեր աշխատակիցները շատ ծանրաբեռնված են, անմարդկային ծանրաբեռնված են, անմարդկային էլ ցածր են, շատ ցածր են [ստանում]: Շուրջ 600-700 կարգադրիչ 110-120 հազար դրամ է ստանում:
Դատավորի աշխատակազմը կազմված է դատավորի օգնականից և գործավարից: Գործավարը ստանում է 120, 130, 150 հազար դրամ՝ փորձառությունից ելնելով: Խայտառակ թվեր են սրանք, ու միշտ ծանրաբեռնված են»,- ասաց նա և հավելեց, որ նման պարագայում է, որ աշխատավարձի ֆոնդը 750 մլն դրամով կրճատվել է: Որոշումը չի ընդունվել ԲԴԽ-ի կողմից, վերջինիս վերաբերյալ արձանագրային որոշում է կայացվել և ներկայացվել ֆինանսների նախարարություն:
