Ադրբեջանը հերքում է, որ Լաչինի միջանցքը արգելափակված է, սակայն բոլորս էլ քաջ գիտենք, որ իրականացվում է շրջափակում։ ԵԽԽՎ-ում Լաչինի միջանցքի շրջափակման մարդասիրական հետևանքների վերաբերյալ քննարկման ժամանակ հայտարարել է հույն պատգամավոր Ջորջ Կատրուգալոսը:
«Այն փաստը, որ որոշ ծայրահեղ դեպքերում Կարմիր խաչի մեքենաներով հիվանդներ են տեղափոխվում Հայաստան, չի նշանակում, թե միջանցքը բաց է: Շրջափակման մասին են վկայում նաև Միացյալ Նահանգների և Ֆրանսիայի նման պետությունների կողմից միջանցքի շրջափակումը դատապարտող հայտարարությունները»,- նշել է պատգամավորը:
Նա առաջարկել է դատապարտել շրջափակումը, ինչպես դա արել է Եվրոպական խորհրդարանը և կողմերին կոչ անել՝ հարգել միջազգային իրավունքը, հատկապես Ադրբեջանին, որն էլ չի կատարում եռակողմ հայտարարություններով ստանձնած պարտավորությունները:
