Հայաստանում կանանց 45 տոկոսը չի աշխատում և չի փնտրում աշխատանք՝ աշխատանքի և սոցիալական հարցերի նախարարության տվյալներն են: Նախարարությունը ՄԱԿ-ի Զարգացման ծրագրի և Էկոնոմիկայի նախարարության հետ համատեղ մեկնարկում է Platform #5 կանանց մասնագիտական ուսուցման ծրագիրը:
Վիկտորյա Այդինյան (ՀՀ աշխատանքի և սոցիալական հարցերի նախարարի խորհրդական) - Արդեն մեկնարկել է դիմումների հավաքագրման գործընթացը: Ծրագիրը նախատեսված է աշխատանք չունեցող կանանց համար, ովքեր ուզում են ունենալ աշխատանք բարձր արտադրողական ոլորտում ու արժանապատիվ վարձատրություն:
Ծրագրին հինգ օրում արդեն 200 կին է դիմել, բոլորն էլ՝ մարզերից: Մրցույթով ընտրվող 250 մասնակից կկարողանա 4-6 ամսում սովորել թվային մարքեթինգի հմտություններ և լավ վարձատրվող հեռավար աշխատանք ունենալ՝ համատեղելով այն տնային գործերի հետ: Ծրագրի շահառու են ընտանեկան կամ սոցիալական նպաստի համակարգում ընդգրկված, գործազուրկ, երեք և ավելի երեխաներ ունեցող, հաշմանդամություն ունեցող երեխայի կամ չափահաս անձի խնամակալ հանդիսացող կամ ընտանեկան բռնության, թրաֆիքինգի և շահագործման ենթարկված կանայք: Նախքան ծրագիրն սկսելը ուսումնասիրել և պարզել են, որ Հայաստանում թվային մարքեթինգի մասնագիտությունը մեծ պահանջարկ ունի:
Նարեկ Մանուկյան (ՄԱԶԾ ImpactAIM աքսելերատորի ղեկավար) - Թվային մարքեթինգի ծրագրին մենք հանգել ենք էդպիսի հետազոտության արդյունքում, երբ փորձել ենք հասկանալ, թե ինչ ծրագրեր կարող ենք իրականացնել, որոնք կարող են իրականացվել առցանց, ունենա տարաժամկետ փորձառություն, այսինքն պարտադիր չլինի, որ կանայք տարբեր գյուղերից կամ քաղաքներից նույն ժամին միանան, որ ծրագրին մասնակցեն իրենց հարմար պահին իրենց հարմար տեղից:
Ուսումն անվճար է: Դիմելու համար անհրաժեշտ է ունենալ սմարթֆոն և համակարգիչ՝ ինտերնետի հասանելիությամբ, ինչպես նաև թվային գրագիտության տարրական գիտելիքներ: Ընտրված մասնակիցները, որոնք կունենան տեխնիկայի խնդիր, նախարարությունը խոստանում է աջակցել նաև այդ հարցում: Փորձնական ծրագիրն իրականացնելու է «Սովորիր օնլայն» հարթակը, որն ընտրվել է մրցույթով: Մասնակիցներին հնարավորություն կտրվի ընտրել հարմար օրեր ու ժամեր, առաջադրանքները լինելու են թիմային:
Հայկ Հովակիմյան («Սովորիր օնլայն» հարթակի տնօրեն) - 250 հոգին բաժանվելու են 20-25 թիմի, էդ թիմերը ամեն բլոկն անցնելուց հետո ստանալու են պրակտիկ առաջադրանք, որը պետք է անեն կոնկրետ ձեռնարկատիրության վրա, այսինքն՝ իրենք գնալու են կոնկրետ բիզնես ու անելու են իրենց համար թվային մարքեթինգ:
Գրանցվելու համար պետք է մուտք գործել «Սովորիր. օնլայն» պլատֆորմ հինգ հարթակ և լրացնել տվյալները: Այնուհետև ծրագրի պատասխանատուները կկապվեն դիմումատուների հետ: Նախարարությունից հավաստիացնում են՝ եթե ծրագիրը հաջողեց, ապա ընդլայնվելու է, ավելանալու է մասնակիցների թիվը, որ ավելի շատ գործազուրկ կանայք ունենան աշխատանքի հնարավորություն:
Լուսինե Գրիգորյան
