Հալէպահայերու ոչ թէ մեծամասնութիւնը այլ անխտիր բոլորը Մեծ Եղեռնին Արևմտահայաստանէն բռնագաղթածներու սերունդներն են: Անոնք ականատեսի հարազատութեամբ կը յիշեն իրենց տատիկներու ու պապիկներու վկայութիւնները: Ապրիլ ամսուն հալէպահայ զանազան միութիւններու կողմէ Հալէպի մէջ տասնեակներով ձեռնարկներ կը կազմակերպուին` ոգեկոչումներ, յուշահանդէսներ, ջահերթեր, արեան տուչութիւն, ծաղկամատոյց, և դեռ այլ ծրագիրներ: Ժողովրդային ջահերթը այս միջոցառումներու շարքին ամէնէն ազդեցիկներէն մէկն է:
Պողոս Բարդակչյան (Կազմակերպող մարմնի ներկայացուցիչ) - 107 տարիներ ետք Սուրիոյ պատերազմը եղաւ և մայր գաղութը ծանր հարուածներ ստացած նոյն թշնամիէն, բայց մեր երիտասարդներու սիրոյն այս գաղութը շարունակեց իր գոյութիւնը և պիտի շարունակէ պայքարը Սուրիոյ մէջ, հայրենիքի մէջ, Արցախի մէջ և ամէն ջանք պիտի թափէ այս երիտասարդութիւնը իր նպատակին հասնելու:
Ջահերթի մասնացող հալէպահայութիւնը Արամ Մանուկեան Ժողովրդային Տունէն քալեց մինչև Ազգային Գերեզմանատուն:
Պարգև Ավագյան - Մինչև այն ատեն, որ կայ անարդարութիւն կը նշանակէ կայ շարունակուող պայքար, մեր երիտասարդներուն խրատը այն է, որ մեր դրօշը և մեր ջահը կարենան պարկեշտութեամբ փոխանցել մինչև արդարութեան իրականացումը:
Հայ երեք համայնքապետերը, ՀՀ Հալէպի հիւպատոսը, ազգային երեք կազմակերպութիւններու ներկայացուցիչները, Սուրիոյ խորհրդարանի երեսփոխանը, ազգային մարմիններու և միութիւններու ներկայացուցիչները ջահերթը կ՛առաջնորդէին:
Միհրան Վարդապետյան - Պահանջատէր սերունդը պիտի մնայ իր ուխտին վրայ: Պահանջատէր ենք մինչև վերջ, մինչև որ հասնինք մեր իտէալին` ազատ, անկախ և միացեալ Հայաստանին, Նախիջևանով, Արցախով, Ջաւախքով և Արևմտահայաստանով:
Մասնակցողներու խիտ շարքերը Ազգային գերեզմանատուն հասնելէ ետք միջոցառումը կազմակերպող Սուրիոյ Երիտասարդական Միութիւնը ներկայացուց գեղարուեստական յայտագիր:
Զեփյուռ Ռեիսյան - Մեր առօրիայի անբաժան մասնիկն են Ցեղասպանութեան հետևեանքները, կը կրենք մեր մարմնին վրայ և այնքան ատեն, որ կը կրենք չենք դադրիլ պահանջատէր ըլլալէ: Պէտք է գիտնանք, որ միայն Ապրիլ ամիսը չէ, Ցեղասպանութեան հանդէպ անարդարութեան պահանջատիրութիւնը մեր ամէնօրեայ կենցաղին մաս պիտի կազմէ:
Բերիոյ Հայոց թեմի առաջնորդը իր խօսքին մէջ յոյս ներշնչեց և հաստատեց հայ ժողովուրդի պահանջատիրական ուխտը:
Տ. Մասիս եպիսկոպոս Զոպույան (Բերիո հայոց թեմի առաջնորդ) - Հայ ժողովուրդը ողջ պատմութեան մէջ մերժած է մահը և կառչած է կեանքին, անմահութեան լոյսին և հաւատքին և այս գիտակցութեամբ հայ ժողովուրդը քալեց Հայաստանի մէջ, Արցախի մէջ, Տէր Զօրի մէջ: Հայ ժողովուրդը ուր որ ալ գնաց ամէն մակարդակի վրայ արդարութիւն պահանջեց և վկայ են հզօր պետութիւնները: Սուրիոյ պատերազմը վկայ է, թէ մեր ժողովուրդի զաւակները նոյն թշնամիին կողմէ հալածուեցան: Այսօր մեր հաւաքական ներկայութիւնը այստեղ յարութեան պատգամն է ուղղուած թուրք ժողովուրդին, որ հակառակ իր բոլոր կոտորածներուն հայը, Հայաստանը, Արցախը, Սուրիան կը մնան կենդանի այս ջահին պէս:
Յուզիչ էր 1915-ի արևմտահայ մտաւորական համարեա բոլոր նահատակներու նկարներու ցուցադրումը գերեզմանատան մէջ:
Բերլա Սաղպազարյան - Ես Մարաշը կը սիրեմ և կ՛ուզեմ:
Նատալի Բեբեջյան - Ես Արևմտահայաստանէն եմ և կ՛ուզեմ մեր հողը վերադառնալ:
Միջ-համայնքային հանդիսութիւնը այս տարի, համաձայն հերթին, Հայ կաթողիկէ համայնքի կողմէ կազմակերպուեցաւ: Օրուան բանախօս Սարգիս Պուրունսուզեան իր խօսքին մէջ նշեց, որ Հայոց Ցեղասպանութիւնը միայն ցեղային բնաջնջումի նպատակ չէր հետապնդեր այլ տնտեսական և մշակութային:
Սարգիս Պուրունսուզյան (Բանախոս) - Հայերուն ձեռքերուն մէջ կը կեդրոնանար Օսմանեան Պետութեան ներքին առևտուրի 60%-ը և արտաքին առևտուրի 40%-ը: Վեց հայկական վիլայէթներու արդիւնաբերութեան, առևտուրի ճիւղերու և զանազան արհեստներու 69%-էն մինչև 86%-ը հայոց ձեռքերուն մէջ էր:
Հանդիսութեան գեղարուեստական յայտագիրը ընդգրկեց համայնքի «ԱԼԵՄՇԱՀ» երգչախումբի ելոյթը, երգ, ասմունք և նուագ:
Ձեռնարկը կազմակերպող Հայ Կաթողիկէ համայնքի համայնքապետ Տէր Պետրոս Արք. Միրիաթեան իր խօսքին մէջ ընդգծեց, որ ժողովուրդ մը, որ կը մոռնայ իր անցեալը ապագայ չունի, ժողովուրդ մը, որ չի յիշեր իր պատմութիւնը դատապարտուած է ձուլումի և որ չի յիշեր իր նահատակները արժանի չէ ապրելու:
Տ. Պետրոս արքեպիսկոպոս Միրիաթյան (Հայ Կաթողիկե համայնքի համայնքապետ) - Մենք որպէս հայ ժողովուրդ կ՛ապրինք ու տակաւին պիտի ապրինք որովհետև կը յիշենք մեր անցեալը, իր մութ և լուսաւոր էջերով, փառաւոր և արիւնոտ դէպքերով: Թուրքին ոճրագործութիւնը և ցեղասպանութիւնը կը մնայ մինչև այսօր անպատիժ: Պիտի յիշենք, պիտի յիշեցնենք ու պիտի պահանջենք:
Հանդիսութիւնը փակուեցաւ երեք համայնքապետերու աղօթքով:
