70 կողմ ձայնով Ռուբեն Ռուբինյանն ընտրվեց ԱԺ նախագահի առաջին տեղակալ: «Հայաստան» ու «Պատիվ ունեմ» դաշինքները քվերակությանը չեն մասնակցել: Մինչ ընտրությունն իշխանության՝ ԱԺ փոխնախագահի թեկնածու Ռուբեն Ռուբինյանը շնորհավորեց ընդդիմադիր գործընկերներին՝ խորհրդարանում ներկայություն ունենալու համար:
Ռուբեն Ռուբինյան. ԱԺ «Քաղաքացիական պայմանագիր» խմբակցության պատգամավոր - Եթե ես երբևիցե այս ամբիոնից վիրավորեմ կամ զրպարտեմ մեր ընդդիմադիր գործընկերներին, դա կլինի վիրավորանք նրանց վստահություն քվե տված մեր քաղաքացիների մի մասին, ինչպես և մեր ընդդիմադիր գործընկերների կողմից այս ամբիոնից ինձ կամ իմ թիմակիցներին վիրավորելն ու զրպարտելը կլինի վիրավորանք մեծամասնությանը քվեարկած քաղաքացիներին:
Պատասխան չի ակնկալում, բայց հարցն ուղղում է Ռուբեն Ռուբինյանին «Պատիվ ունեմ» խմբակցության պատգամավոր Աննա Մկրտչյանը: Նա հայտարարեց՝ Ռուբինյանն իր կյանքի որոշակի հատված անցկացրել է Թուրքիայում, ինչը թաքցվել է: Ռուբինյանը հակադարձեց՝ երբեք չի թաքցրել, որ որոշակի ժամանակահատված հետազոտություններ է իրականացրել Թուրքիայում։
Ռուբեն Ռուբինյան - 2017 թվականին թուրք ազգայնականի կողմից սպանված հայազգի լրագրող Հրանտ Դինքի անվան հիմնադրամի ծրագրի շրջանակներում մի քանի ամիս իրականացրել եմ հետազոտություն: Ի դեպ, երբեք չեմ թաքցրել, փոխնախարար նշանակվելուց հետո հայտարարել եմ, որ հեղափոխությունից առաջ եղել եմ Թուրքիայում։
«Հայաստան» խմբակցության պատգամավոր Արմենուհի Կյուրեղյանն էլ խոսեց պարգևավճարներից՝ մեղադրելով իշխանությանը երկրի ծանր պայմաններում պարգևավճար ստանալու համար:
Արմենուհի Կյուրեղյան, «Հայաստան» խմբակցության պատգամավոր - 30 տոկոս պաշտոնական աղքատություն ունեցող երկրում մեկ տարվա ընթացքում ԱԺ-ում տրամադրվել է 1.5 մլրդ դրամին համարժեք պարգևավճար, իսկ պատերազմից հետո ստացել եք, թե ոչ, դա մանիպուլացիա է, մինչև այդ ստացել եք:
Մանուպուլացիա չէ, այլ փաստ է՝ պատերազմից հետո պարգևավճար պատգամավորները չեն ստացել, ավելին՝ վերջին անգամ պարգևավճար ստացել են 2020 թվականի փետրվարին՝ արձագանքեց Ռուբեն Ռուբինյանը:
Ռուբեն Ռուբինյան - Ինչ վերաբերում է Ձեր նշած թվին, ԱԺ-ում աշխատում են ոչ միայն պատգամավորներ, ԱԺ-ն ունի մոտ 700 աշխատակից՝ այգեպաններ, պահականեր, անվտանգության աշխատակիցներ, քարտուղարներ: Այո՛, կարծում եմ, որ իրենք արժանի են ստանալ պարգևավճար:
Ազգային ժողովի օրակարգում խորհրդարանի փոխխոսնակների ու ԱԺ հանձնաժողովների նախագահների ընտրության հարցերն են: «Քաղաքացիական պայմանագիր» խմբակցությունն ԱԺ նախագահի մյուս տեղակալի պաշտոնում առաջադրել է Հակոբ Արշակյանի թեկնածությունը, ընդդիմության թեկնածուն «Հայաստան» խմբակցության պատգամավոր Իշխան Սաղաթելյանն է: Առաջինը Հակոբ Արշակյանի թեկնածության քննարկումն է:
Հակոբ Արշակյան, ԱԺ փոխնախագահի թեկնածու - Որպես խորհրդարանական գործունեության հիմնական ուղղություն դիտարկում եմ կառավարության ծրագրերի բովանդակության, բովանդակային համահունչության սինխրոնացման՝ թե՛ իշխող ուժի նախընտրական ծրագրի, թե՛ Հայաստանի զարգացման հնարավորությունների ռազմավարության հետ:
Որպես ԱԺ փոխխոսնակ մտադի՞ր եք վերանայել Ազգային ժողովում լրագրողների աշխատանքի փոփոխությունների հարցը. Արշակյանից հետաքրքրվեց «Հայաստան» խմբակցության պատգամավոր Աղվան Վարդանյանը: Արշակյանն էլ պատասխանեց, թե կատարվող փոփոխությունները սահմանափակումներ չեն, այլ ինստիտուցիոնալ վերափոխումներ:
Հակոբ Արշակյան - Մեզանից յուրաքանչյուրը միշտ ազատ է լինելու շփվել լրագրողների հետ թե՛ ԱԺ տարածում, թե՛ այն տարածքում, որը հատկացված է լրագրողներին: Կազմակերպվածության այդ գործողությունը, որ պետք է տեղի ունենա, ես չէի համարի լրագրողների գործունեության սահմանափակում, իրենք ազատ են նյութեր գրելու մեջ, պատգամավորների հետ շփումներում:
Ընդդիմադիր պատգամավոր Արեգնազ Վարդանյան էլ Արշակյանին հարցեր ուղղեց մինչև պաշտոնյա դառնալն արված քայլերից:
Արեգնազ Մանուկյան, «Հայաստան» խմբակցության պատգամավոր - Մինչև 2018 թվականն ակտիվ հակառուսական գործունեություն եք ծավալել, հակառուսական ակցիաներ եք իրականացրել՝ պաշտպանելով Ալեքսեյ Նավալնուն ու դեմ եղել ՌԴ նախագահ Վլադիմիր Պուտինին։ Հիմա հավականում եք բարձր պաշտոնի ու ձեր կարծիքն եմ ուզում ճշտել Ալեքսեյ Նավալնու հետ կապված:
Արշակյանը հորդորեց որակումներ չտալ, թե ինքը որ երկրի դեմ կամ կողմ է երբևէ ակցիա արել:
Հակոբ Արշակյան - Որևէ միջոցառում, որին ես մասնակցել եմ, որևէ պետության դեմ չի եղել։ Այն, ինչի մասին դուք խոսում եք, մոտ 10 տարի առաջ է տեղի ունեցել և իրավիճակային միջոցառում է եղել։ Չեմ ցանկանա այդ մասով մեկնաբանություն տալ։ Ես ՀՀ քաղաքացի եմ և ելնում եմ ՀՀ շահերից, իսկ Ռուսաստանը Հայաստանի ռազմավարական գործընկերն է, ինչը նշանակում է, որ մեր շահերը զուգահեռվում են, այլ ոչ թե խաչվում։ Իմ գործունեությամբ ամեն ինչ անելու եմ, որ այդ գործընկերական հարաբերություններն ավելի խորացվեն:
Վարման կարգով խոսելիս պատգամավորները երկրի անվտանգությունից մինչև լրագրողների ԱԺ աշխատանքների սահմանափակմանն անդրադարձան: Ընդդիմության որոշ ներկայացուցիչներ դժգոհեցին Ազգային ժողովի անվտանգության խստացված ռեժիմից, ինչին արձագանքեց իշխանական պատգամավոր Գևորգ Պապոյանը, բայց նրա պատասխանը բարկացրեց «Հայաստան» խմբակցության պատգամավորներին, միջամտեց ԱԺ նախագահ Ալեն Սիմոնյանը:
Գևորգ Պապոյան, «Քաղաքացիական պայմանագիր» խմբակցության պատգամավոր - Հպարտորեն ասում ենք, որ նախկինում ուժեղացված չի եղել: Շատ վատ է, որ ուժեղացված չի եղել, եթե լիներ, հաստատ 99-ի հոկտեմբերի 27-ին մի խումբ ռոմանտիկներ չէին կարողանա մտնել այս դահլիճ:
ԱԺ երկրորդ փոխնախագահի քվերակությունը տեղի կունենա վաղը, կքննարկվեն նաև ընդդիմադիր փոխխոսնակի և ԱԺ հանձնաժողովների նախագահների ընտրության հարցերը:
