Արտախորհրդարանական ուժերի հետ գործադիր իշխանության նախաձեռնած գործակցության ձևաչափը գոհացնում է խորհրդարան չանցած ուժերին: «Ինքնիշխան Հայաստան» կուսակցության ղեկավարի գնահատմամբ՝ ընտրության արդյունքում վերընտրված իշխանությունը ձեռք է մեկնել արտախորհրդարանական ուժերին՝ փորձելով երկրի առջև ծառացած խնդիրներին համատեղ ու կոնսոլիդացիոն լուծումներ գտնել:
Դավիթ Սանասարյան («Ինքնիշխան Հայաստան» կուսակցության ղեկավար) - Վարչապետի պաշտոնակատարի կողմից արտախորհրդարանական ուժերին ձեռք է մեկնվել, և փորձում են խնդիրները, որոնք կան մեր երկրում, համատեղ քննարկեն, ու հասկանանք, թե ինչ լուծումներ են հարկավոր:
Վարչապետի պաշտոնակատար Նիկոլ Փաշինյանի ու արտախորհրդարանական քաղաքական ուժերի հետ հանդիպմանը քննարկվել է սահմանադրական բարեփոխումների ու 44-օրյա պատերազմի հանգամանքները քննող հանձնաժողով ստեղծելու հարցը, ինչի շուրջ քաղաքական ուժերը, գրեթե, միակարծիք են եղել: Նիստին արծարծված որոշ հարցեր արդեն շրջանառվում են որպես կատարողական, ինչը վկայում է՝ քննարկման բոլոր կողմերը տրամադրված են ակտիվ ու արդյունավետ աշխատանքի. արձանագրեց Հայաստանի քրիստոնեա-դեմոկրատական կուսակցության նախագահ Լևոն Շիրինյանը:
Լևոն Շիրինյան (Հայաստանի քրիստոնեա-դեմոկրատական կուսակցության նախագահ) - Տարածված է, որ վարչապետը մարդու չի լսում, բայց քննարկումները լինում են բարեկիրթ ու առանց որևէ մեծ բանավեճի, որին հայությունը սովորում է, որ մինչև իր տեսակետը չանցկացնի, չավարտի:
Այս ձևաչափը հնարավորություն է տալիս վերընտրված իշխանությանը հաղորդակից լինել հանրության այն շերտի մտահագություններին, որը խորհրդարանում իր ներկայացուցիչները չունի, հավելեց Շիրինյանը: Ուշագրավ է, որ համագործակցության խորհրդակցական ժողովի մասնակից քաղաքական ուժերը գաղափարական տարբեր հենքեր ունեն՝ արտաքին քաղաքականությունից մինչև հանրային կյանքի կառավարման տարբեր ոլորտներ, սակայն այս հանգամանքը դեռևս առողջ քննարկումների համար խոչընդոտ չի ստեղծել:
Դավիթ Սանասարյան («Ինքնիշխան Հայաստան» կուսակցության ղեկավար) - Ոչ թե լինում է խորը բանավեճ, ոչ էլ կոալիցա ենք կազմել: Օրինակ՝ 44-օրյա պատերազմի հետ կապված գրեթե որևէ մեկը դեմ չէր, որ նման քննիչ հանձնաժողով ստեղծվի, գաղափարական բան չխանգարեց, որ կոնսենսուս լինի, սահմանադրականի մասով էլ գրեթե կոնսենսուսային էր: Այս ուժերի հետ չենք պատրաստվում որևէ ձևով դաշինքի շրջանակում կամ այլ հարթակներով գնանք համագործակցության:
Լևոն Շիրինյան - Գաղափարական տարբերությունները կխանգարեն, երբ հարց լինի հայաստանակենտրոնության հարցով, ուրեմն ինձ հետ բախումներ կունենա:
Իշխանության հետ Հայաստանի խնդիրները քննարկում են, մարտահրավերները՝ մատնանշում, բայց սա դեռ չի նշանակում, որ իրենք ընտրություններում հաղթած «Քաղաքացիական պայմանագրին» ընդդիմություն չեն: Ընդդիմադիր եղել են ու կմնան, սակայն կառուցողական դաշտում. պնդեց թե՛ Շիրինյանը, թե՛ Սանասարյանը: Վարչապետի պաշտոնակատար Նիկոլ Փաշինյանի և արտախորհրդարանական քաղաքական ուժերի ղեկավարների մասնակցությամբ առաջիկայում էլ նիստեր տեղի կունենան՝ ամիսը մեկ անգամ պարբերականությամբ:
Հեղինակ՝ Անի Օհանյան
