ՀՀ Ազգային ժողովի 2021 թվականի հունիսի 20-ի արտահերթ ընտրություններով ընտրված նորընտիր Ազգային ժողովի առաջին նստաշրջանի հրավիրման օր է հայտարարվում 2021 թվականի օգոստոսի 2-ը՝ ժամը 10:00-ը:
Այս մասին Կենտրոնական ընտրական հանձնաժողովի նիստի ընթացքում հայտարարեց ԿԸՀ նախագահ Տիգրան Մուկուչյանը:
Մինչ այդ ԿԸՀ-ն ուժը կորցրած ճանաչեց արտահերթ խորհրդարանական ընտրություններին մասնակցած կուսակցությունների, կուսակցությունների դաշինքների ընտրական ցուցակներում ընդգրկված ինքնաբացարկ ներկայացրած պատգամավորի թեկնածուների գրանցումը:
«Քաղաքացիական պայմանագրից» ինքնաբացարկ է ներկայացրել 17, «Հայաստան» դաշինքից՝ 3 անձ:
ԿԸՀ-ն հաստատել է նաև ԱԺ պատգամավորներ գրանցելու և մանդատներ տրամադրելու արձանագրությունը:
Խորհրդարանն ունենալու է 107 պատգամավոր: 71 մանդատ կունենա «Քաղաքացիական պայմանագիրը», 29 մանդատ՝ «Հայաստան» դաշինքը, 7 մանդատ՝ «Պատիվ ունեմ» դաշինքը: