Արցախի Սահմանադրության 103-րդ հոդվածի համաձայն՝ նախագահի պաշտոնը ստանձնելուց հետո քսանօրյա ժամկետում պետք է ձևավորվի նոր կառավարություն: Արայիկ Հարությունյանը ԱՀ նախագահի պաշտոնում իր առաջին ուղիղ եթերում խոսել է կադրային առաջին նշանակումների մասին:
Նա նշեց, որ Սամվել Բաբայանի հետ արդեն իսկ ստորագրվել է համագործակցության հուշագիր, Մասիս Մայիլյանի հետ նույնպես արդյունավետ գործակցություն կա: Ա.Հարությունյանը հորդորեց քաղաքական գործիչներին չվիրավորել Արցախի պետականաշինության գործում դեր ունեցած մարդկանց, չփորձել պիտակավորել ազգի ապագայի համար ձեռք բերված համաձայնությունը:
«Ոչ մեկ չի ծախվել, ոչ մեկին չեն առել, այլ այդ բառերն օգտագործողներն են ծախվողները: Հանուն ազգի և հանուն ապագայի է ամեն ինչ կատարվում: Պաշտոն չենք տալիս ոչ մեկին և պաշտոն չենք տալիս ոչ մեկին, այլ մենք առաջարկում ենք պատասխանատվություն ստանձնել երկրի ապագայի նկատմամբ»,- ասաց ԱՀ նախագահը:
Ա.Հարությունյանն ասաց, որ համագործակցելու են բոլորի հետ, ձեռք է մեկնելու բոլորին, որոնք վստահության քվե են ստացել ընտրություններին:
Նա նշեց, որ կառավարության կառուցվածքում փոփոխություններ են լինելու: ԱՀ նախագահը կարևորեց նոր՝ ռազմահայրենասիրության, երիտասարդության և սպորտի նախարարության գոյությունը, հասարակություն-բանակ կապի ամրապնդումը, ռազմահայրենասիրության քարոզումը:
Փոփոխություններ կլինեն տարածքային կառավարման և զարգացման նախարարությունում, նախագահի վերահսկողական ծառայությունը դառնալու է պետական վերահսկողական ծառայություն:
Ա.Հարությունյանն ասաց, որ պետական համակարգում ծանոթ-բարեկամ-խնամի կապը պետք է վերանա, և որտեղ կան նման կապեր, պետք է 7-օրյա ժամկետում լուծել այդ հարցը, արգելել: «Նման երևույթները խիստ պատժվելու են, ուստի կոչ եմ անում բոլոր ղեկավարներին 7-օրյա ժամկետում ազատել նրանց»,- ընդգծեց նա:
Կադրային նշանակումների մասով Ա.Հարությունյանն ասաց, որ այսօր խորհրդակցություն է հրավիրել, շատերին հրաժեշտ կտան, կլինեն նոր նշանակումներ: Նա վստահեցրեց, որ մինչև հունիսի 1-ը նոր կառավարությունը ձևավորված կլինի: «Աշխատանքը սկսվելու է 09.00-ին, եթե որևէ մեկին ձեռք չի տալիս, խնդրում եմ՝ հաշվի առեք: Այդպես են սկսվում կարգապահությունը, աշխատանքի նկատմամբ վերաբերմունքը: Արգելվելու է շքեղություններից օգտվել: Եթե այդ սկզբունքը ձեռք չի տալիս, հրաժարվեք, որ վաղը ստիպված չլինեմ որոշում կայացնել: Պետք է հարգվեք ժողովրդի կողմից, և բոլորի աշխատանքում հաշվետվողականությունը պետք է ամենակարևորը լինի»,- եզրափակեց Ա.Հարությունյանը: