Երկաթուղու հետ կապված քննարկում չի եղել, բայց երկաթուղու հետ կապված մեր դիրքորոշումը շարունակում է մնալ նույնը։ Դա մեր սեփականությունն է, և ՀՀ-ն պետք է հնարավորություն ունենա այդ երկաթուղին օգտագործել այնպես, ինչպես ինքն է նպատակահարմար գտնում։ Ես ուզում եմ շատ հստակ լինել այս հարցով՝ այլընտրանք չկա սրան։ Այդ մասին ճեպազրույցի ժամանակ ասաց վարչապետ Նիկոլ Փաշինյանը:
Հարցին, թե որքան պետք է սպասեք, Փաշինյանը պատասխանեց. «Բավարար չափով, բայց ոչ անվերջ։ Այդ հարցը պետք է լուծվի։ Ես ուզում եմ, որ շատ հստակ լինի։
Էլի եմ ասում՝ հիմա շատ քննարկում են, փորձում են ինչ-որ բաներ, հիմնականում Հայաստանի ընդդիմությունը կալուգացի օլիգարխի միջոցով՝ սա կթանկանա, այն կթանկանա։ Հայաստանում էլ կան բաներ, որ անվճար են։ Կարող է պարզվի, որ թանկանում է, կարող է՝ բաներ կան, որ Հայաստանում գոյություն ունեն 30 տարի անվճար։ Կարող է պարզվի, որ Հայաստանը կսկսի դրանց համար տարեկան 2 մլրդ դրամ ուզել և ասել՝ տարեկան 2 մլրդ վարձավճար մուծեք։
Երկաթուղու մասին ակնարկի բան չկա։ Ես պարզ ասում եմ՝ դա ՀՀ սեփականությունն է, և ուրիշ տարբերակ չկա։ Մենք ուզում ենք բարեկամական ձևով այդ խնդիրը լուծել, բայց նաև այդ խնդիրը բոլոր դեպքերում պետք է լուծենք: Կարող է հարց ծագել, որ մենք դե յուրե որոշում կայացնենք։ Եթե անհամաձայնություն կա, կգնանք արբիտրաժ և կքննարկենք։
Իմիջիայլոց, արբիտրաժի մասին հիշո՞ւմ եք՝ այստեղ ինչ խոսակցություն էր տեղի ունենում, որ ՀԷՑ-ի նախկին սեփականատերերը՝ կալուգացի օլիգարխը, արբիտրաժում հաղթել է։ Երբ շենքում պարզվեց, որ մարդ ունեին, երբ այդ մարդուն շենքից դուրս հրավիրեցինք, արբիտրաժում... Բա ասում եք՝ կոռուպցիա, դա կոռուպցիա չէ՞։ Որևէ մեկը հետաքննե՞լ է այդ մարդու գործունեությունը։
Գրություն էր գրել, իր գրության հիման վրա աղմուկ էր բարձրացել։ Որևէ մեկը քննե՞լ է։ Ես իրավապահ մարմիններին եմ դիմում։ Մեկ ամսից հայտնվեց եռագլուխ կուսակցության պոչում։ Որևէ մեկը քննել է՝ սա կոռուպցիա՞ է, թե՞ կոռուպցիա չէ, ինչ կապեր են գործել։
Հիմա ես հրապարակային, առիթից օգտվելով, հաղորդում եմ տալիս հանցագործության մասին։ Որևէ մեկի անմեղության կանխավարկածը չեմ ուզում խախտել, բայց կարծում եմ՝ Կոռուպցիայի կանխարգելման հանձնաժողովը և իրավապահ մարմինները պետք է քննարկեն։
Ինչպե՞ս կարող է պարզվել, որ այս շենքում մասնավոր ընկերության շահերը սպասարկող մարդ է եղել, հետո գնացել է։ Պետք է ստուգվեն հաշիվները, ունեցվածքը։ Տեսնենք՝ այդ մարդը ինչ էր անում, այստեղից լուրեր ու քաղաքական դաշտին ինֆորմացիանե՞ր էր տալիս և անտրամաբանական գրություններ գրում։
«Կառավարությունը արբիտրաժում պարտվեց, պարտվելու է»։ Բա ինչո՞ւ չեք լուսաբանում, որ ջախջախվել են արբիտրաժում, որովհետև տրոյական ձին հանել ենք շենքից դուրս։
Հիմա իրավապահ մարմիններին հաղորդում եմ տալիս, որ տրոյական ձիու գործունեությունը քննեն։ Կոռուպցիայի կանխարգելման հանձնաժողովը քննե՞լ է։ Ես նաև պատասխան եմ պահանջում ինստիտուտներից՝ քննե՞լ են այդ դեպքը, թե՞ չեն քննել։
Կառավարության դիրքորոշմանը հակասող գրություններ է գրել այդ մարդը, վարչապետի հանձնարարականին հակասող գրություններ է գրել։ Հետո գնացել է, հայտնվել եռագլուխ կուսակցության պոչի ցուցակում։ Սա պատահակա՞ն է։ Այդպես պատահական ստացվե՞ց։
Հետո պարզվեց, որ եռագլուխ կուսակցության պոչը ինչ-որ տեղերից ֆինանսավորում է ստանում։ Դա պատահականությո՞ւն է։ Ոչ ոք չի հետաքննում դա, նույնիսկ պետական մարմինները։
Ես պատասխան եմ ակնկալում։ Կոռուպցիայի կանխարգելման հանձնաժողովն այս կոնկրետ դեպքով զբաղվե՞լ է։ Դրանից ավելի լավ կոռուպցիա եք ուզո՞ւմ»։
