ՀՀ կրթության, գիտության, մշակույթի և սպորտի նախարարությունը Իրավական ակտերի նախագծերի e-draft.am միասնական հարթակում հանրային քննարկման է ներկայացրել Սյունիքի մարզի Կապան համայնքում ֆուտբոլի մարզադաշտի տարածքի նկատմամբ հանրային գերակա շահ ճանաչելու վերաբերյալ որոշման նախագիծը՝ նույն տարածքում միջազգային չափանիշներին համապատասխանող ժամանակակից մարզական համալիրի ստեղծման նպատակով։
Նախագծի վերաբերյալ ԿԳՄՍ նախարարությունն այսօր կազմակերպել է նաև հանրային լսումներ, որը վարել է սպորտի քաղաքականության վարչության պետ Նարինե Շահբազյանը: Հանդիպմանը մասնակցել են Կապանի համայնքապետարանի, մարզադաշտի սեփականատերերի և շահագրգիռ այլ կառույցների ներկայացուցիչներ:
Հանդիպման ընթացքում ներկայացվել են նախագծի հիմնական նպատակներն ու ակնկալվող արդյունքները, քննարկվել դրա իրականացմանն առնչվող հարցեր։ Մասնակիցներն անդրադարձել են մարզական համալիրի կառուցման համար անհրաժեշտ տարածքին և ենթակառուցվածքներին, առկա գույքային և իրավական հարաբերություններին, ինչպես նաև հետագա աշխատանքների կազմակերպմանը։
Քննարկման ընթացքում կարևորվել են Կապանի մարզադաշտի հարուստ մարզական ավանդույթներն ու բազմաֆունկցիոնալ նշանակությունը։ Ընդգծվել է, որ մարզադաշտը տասնամյակներ շարունակ եղել է Սյունիքում թեթև աթլետիկայի հիմնական մարզումային և մրցումային կենտրոններից մեկը։ Այստեղ մարզվել և ձևավորվել են հանրապետական ու միջազգային մրցաշարերում հաջողություններ գրանցած մարզիկներ, իսկ այդ ավանդույթներն այսօր շարունակում են Կապանի աթլետիկայի մասնագիտացված մանկապատանեկան մարզադպրոցի սաները։ Այս համատեքստում առաջարկվել է նոր համալիրում ապահովել նաև թեթև աթլետիկայի համար անհրաժեշտ ենթակառուցվածքներ՝ համապատասխան վազքուղիներով, ցատկային հատվածներով և մարզումային այլ հնարավորություններով։ Նշվել է, որ բազմաֆունկցիոնալ մոտեցումը հնարավորություն կտա պահպանելու Կապանում ձևավորված մարզական ավանդույթները և ժամանակակից պայմաններ ստեղծելու մարզիկների նոր սերունդների պատրաստման համար։
Անդրադարձ է կատարվել նաև մարզադաշտի՝ ՈՒԵՖԱ-ի չափանիշներին համապատասխանության անհրաժեշտությանը։ Ընդգծվել է, որ ժամանակակից պահանջներին համապատասխանող մարզադաշտի ստեղծումը հնարավորություն կտա Կապանում անցկացնելու միջազգային հանդիպումներ և նոր խթան կհաղորդի պրոֆեսիոնալ ու մանկապատանեկան ֆուտբոլի զարգացմանը։
Քննարկվել են նաև մարզահամալիրի հետագա կառավարման հնարավոր ձևաչափերը։ Առաջարկվել է դիտարկել պետություն-համայնք համագործակցության սկզբունքով կառավարման մոդելը՝ ապահովելով համայնքի մասնակցությունը, համալիրի հանրային հասանելիությունը և տարբեր մարզական կազմակերպությունների ու շահառուների կողմից օգտագործման հնարավորությունը։
Քննարկման ընթացքում ընդգծվել է նաև շահագրգիռ կողմերի հետ շարունակական համագործակցության, նրանց առաջարկությունների ու դիտարկումների համակողմանի ուսումնասիրման, ինչպես նաև առկա փաստաթղթերի և ելակետային տվյալների ամբողջական ուսումնասիրության կարևորությունը։
Ակնկալվում է, որ ժամանակակից մարզական համալիրի ստեղծումը կնպաստի Սյունիքում սպորտի զարգացմանը, հանրապետական և միջազգային մարզական միջոցառումների անցկացման հնարավորությունների ընդլայնմանը, ինչպես նաև մարզի սոցիալ-տնտեսական ու զբոսաշրջային զարգացմանը և ճանաչելիության բարձրացմանը։
Հանրային լսումների ընթացքում հնչած առաջարկներն ու դիտարկումները կուսումնասիրվեն և սահմանված ընթացակարգով կդիտարկվեն նախագծի հետագա լրամշակման շրջանակում։
