Ապրիլի 8-ի հրադադարի ուժի մեջ մտնելուց հետո ԱՄՆ-ի և Իրանի միջև տեղի է ունեցել ամենամեծ ռազմական բախումներից մեկը։ Հունիսի 2-ի լույս 3-ի գիշերը, Իրանի Իսլամական հեղափոխության պահապանների կորպուսը (ԻՀՊԿ) բալիստիկ հրթիռներ և անօդաչու սարքեր է արձակել Պարսից ծոցի հարևան պետությունների՝ Քուվեյթի և Բահրեյնի ուղղությամբ։ Թեհրանի խոսքով՝ թիրախները տարածաշրջանում գտնվող ամերիկյան ռազմական բազաներն էին, գրում է DW-ն։
Իր հերթին, ԱՄՆ զինված ուժերը հարվածել են Հորմուզի նեղուցի Քեշմ կղզում գտնվող իրանական ռազմական օբյեկտին։ ԱՄՆ կենտրոնական հրամանատարությունը (Centcom) հայտնել է, որ հաջողությամբ որսացել է մի քանի բալիստիկ հրթիռ և անօդաչու սարք, խոցել է տարածաշրջանային ջրերում օրինականորեն գտնվող քաղաքացիական նավերի ուղղությամբ արձակված երեք իրանական անօդաչու սարք և հերքել է Բահրեյնում ԱՄՆ ռազմածովային բազան հարվածելու մասին ԻՀՊԿ-ի պնդումները։
Ենթադրվում է, որ վերջին փոխադարձ հարձակումները պայմանավորված են հունիսի 2-ին Խարգ կղզու՝ Իրանի նավթի արտահանման կարևոր կենտրոնի մոտ իրականացված ԱՄՆ ռազմական գործողությամբ։ ԱՄՆ զինված ուժերը հարձակվել են չբեռնված լցանավի վրա, որը փորձել է մտնել իրանական նավահանգիստ՝ անտեսելով ԱՄՆ ռազմածովային շրջափակումը, նախազգուշացումները և շարքից դուրս է եկել հրթիռի հարվածից:
Իրանի ռազմական խոսնակը X սոցիալական ցանցում հաստատել է ԻՀՊԿ-ի պատասխան հարվածները՝ զգուշացնելով, որ Հորմուզի նեղուցի անվտանգության ցանկացած սպառնալիք «ծանր հետևանքներ» կունենա ԱՄՆ զինված ուժերի համար։
