ԱՄՆ նախագահ Դոնալդ Թրամփը հայտարարել է, որ Իրանի հետ հրադադարի ռեժիմը երկարաձգելու և Հորմուզի նեղուցը վերաբացելու շուրջ համաձայնագիր կարող է կնքվել հաջորդ շաբաթվա ընթացքում։
Նրա խոսքով՝ բանակցությունները հեշտ չեն ո՛չ Իրանի համար, ոչ էլ ԱՄՆ-ի, սակայն Վաշինգտոնը ստանում է այն, ինչ անհրաժեշտ է: Թրամփը հավելել է, որ դեռ «կա ևս մի քանի կետ», որոնց նա պետք է հասնի համաձայնագիրը ստորագրելու համար։
Սպիտակ տան ղեկավարը նաև հայտնել է, որ զրուցել է Իսրայելի վարչապետ Բենիամին Նեթանյահուի հետ, որից հետո Բեյրութ շարժվող իսրայելական զորքերը հետ են շրջվել։
Նա հավելել է, որ բարձրաստիճան ներկայացուցիչների միջոցով «շատ լավ զրույց» է ունեցել նաև լիբանանյան «Հըզբոլլահ» շարժման հետ, և նրանք նույնպես համաձայնել են դադարեցնել կրակոցները։ Թրամփը հույս է հայտնել, որ Իսրայելի և «Հըզբոլլահ»-ի միջև հրադադարը երկար կշարունակվի։
Նեթանյահուն իր հերթին հայտարարել է, որ իսրայելական ուժերը կշարունակեն գործել Լիբանանի հարավում, ինչպես պլանավորված էր:
Լիբանանում իսրայելական գործողությունների պատճառով Իրանը հայտարարել էր ԱՄՆ-ի հետ բանակցությունները դադարեցնելու մասին:
Իրանի խորհրդարանի խոսնակ Մոհամմադ Բաղեր Ղալիբաֆն էլ հայտարարել է, որ Լիբանանում իսրայելական ագրեսիայի շարունակման դեպքում Իրանը ոչ միայն կդադարեցնի բանակցային գործընթացը, այլև կդիմադրի թշնամուն:
