Միացյալ Նահանգներն իր չորս բրիգադային մարտական խմբից մեկը դուրս կբերի Եվրոպայից։ Պենտագոնի այս քայլը տարածաշրջանում ամերիկյան զորքերի թիվը կնվազեցնի մինչև 2021 թվականի մակարդակը։ Մարտական բրիգադային խմբի դուրսբերումը կհետաձգի նաև ամերիկյան զինված ուժերի տեղափոխումը Լեհաստանում, սակայն ԱՄՆ բանակը կպահպանի «ուժեղ ռազմական ներկայությունն» այդ երկրում, ընդգծել է Պենտագոնը:
Մարտական բրիգադային խումբն ԱՄՆ բանակի հիմնական մարտավարական միավորումն է, որը կարող է ինքնուրույն ռազմական գործողություններ իրականացնել։ Հետևակային մարտական բրիգադային խմբի հետևակային անձնակազմը բաղկացած է 4000-4500 զինվորականից, իսկ զրահատանկային անձնակազմը՝ մինչև 5000: Վերջին տարիներին ԱՄՆ-ն Եվրոպայում տեղակայել է մոտ 100 հազար զինվոր և սպա: Նրանցից ավելի քան 65 հազարը տարածաշրջանում գտնվել են մշտապես, մնացածը՝ ռոտացիոն հիմունքներով։
Նախօրեին Եվրոպայում ՆԱՏՕ-ի միացյալ զինված ուժերի գլխավոր հրամանատար, ԱՄՆ ռազմաօդային ուժերի գեներալ-լեյտենանտ Ալեքսուս Գրինկևիչը հայտարարել էր, որ տարածաշրջանից ամերիկյան զորքերի դուրսբերումը չի ազդի Հյուսիսատլանտյան դաշինքի՝ եվրոպական պաշտպանունակության ամրապնդման ծրագրերի վրա:
