Մարդու իրավունքների պաշտպան Անահիտ Մանասյանը ապրիլի 10-ին ընդունել է Կոնրադ Ադենաուեր հիմնադրամի «Քաղաքական երկխոսություն Հարավային Կովկաս» տարածաշրջանային ծրագրի ղեկավար Յակոբ Վյոլենշտայնին։
Ողջունելով հյուրին՝ Պաշտպանը կարևորել է մարդու իրավունքների պաշտպանության ոլորտում հիմնադրամի հետ ձևավորված արդյունավետ և կայուն համագործակցությունը՝ ընդգծելով դրա շարունակական զարգացման անհրաժեշտությունը։
Հանդիպման ընթացքում կողմերն անդրադարձել են համագործակցության հիմնական ուղղություններին և համատեղ իրականացված ծրագրերին։
Անահիտ Մանասյանը ներկայացրել է Մարդու իրավունքների պաշտպանի գործունեության առաջնահերթությունները, ատելության խոսքի և անհանդուրժողականության դեմ պայքարի կարևորությունը` հատկապես ընտրությունների նախաշեմին։ Այս համատեքստում կարևորվել են հիմնադրամի հետ համատեղ իրականացվող նախաձեռնությունները՝ ուղղված ատելության խոսքի դեմ պայքարին։ Պաշտպանը շեշտել է, որ ատելության խոսքի ցանկացած դրսևորում պետք է բացառվի հանրային խոսույթից՝ ապահովելով հարգանքի և հանդուրժողականության մթնոլորտ։
Կողմերը նաև քննարկել են երեխաների, կանանց, ազգային փոքրամասնությունների և հաշմանդամություն ունեցող անձանց իրավունքների պաշտպանությանն առնչվող հարցեր։ Այս համատեքստում Անահիտ Մանասյանն ընդգծել է ՄԻՊ հաստատությանն առընթեր գործող խորհուրդների կարևորությունը, որոնցում ներգրավված են քաղաքացիական հասարակության ներկայացուցիչներ:
Անդրադարձ է կատարվել նաև մարդու իրավունքների կրթության բարեփոխումների անհրաժեշտությանը։
Անահիտ Մանասյանն անդրադարձել է նաև ազատությունից զրկված անձանց իրավունքներին, հավաքների ազատության իրավունքին առնչվող և մի շարք այլ հարցերի:
Հանդիպման ավարտին կողմերը վերահաստատել են ձևավորված համագործակցությունը շարունակելու և համատեղ նոր ծրագրեր իրականացնելու պատրաստակամությունը։
