Սահմանադրություն ընդունելու միայն մեկ տարբերակ կա. դա համաժողովրդական հանրաքվեն է, ուրիշ տարբերակ չկա: Այդ մասին լրագրողների հետ ճեպազրույցում ասաց վարչապետ Նիկոլ Փաշինյանը:
«Այսօրվա գործող Սահմանադրությամբ է, որ խորհրդարանը որոշակի հոդվածներում կարող է փոփոխություններ անել: Հիմա կոնցեպտուալ վեճ կա, քննարկում կա, թե արդյոք խորհրդարանին պե՞տք է վերապահել Սահմանադրության որևէ հոդվածում փոփոխություններ անելու լիազորություն: Տարբեր տեսակետներ կան, և քիչ չեն այն տեսակետները, որոնք պնդում են, որ, ո՛չ, Սահմանադրության մեջ որևէ փոփոխություն կարող է անել միայն ժողովուրդը, բացառապես ժողովուրդը, որովհետև ժողովուրդն է ՀՀ-ում իշխանության տերը, կրողը և լեգիտիմության աղբյուրը»,- ասաց վարչապետը:
