Ռուսաստանի նախագահ Վլադիմիր Պուտինը և նրա թուրք գործընկեր Ռեջեփ Թայիփ Էրդողանը հեռախոսազրույցի ընթացքում քննարկել են Մերձավոր Արևելքում և Ուկրաինայի շուրջ ստեղծված իրավիճակը, հաղորդել է Կրեմլի մամուլի ծառայությունը։
Նշվել է, որ Պարսից ծոցի գոտում ինտենսիվ ռազմական գործողությունները հանգեցնում են ոչ միայն տարածաշրջանային, այլև գլոբալ մասշտաբի լուրջ բացասական հետևանքների, այդ թվում՝ էներգետիկայի, առևտրի և լոգիստիկայի ոլորտներում:
«Առաջնորդներն արձանագրել են, որ իրենք ընդհանուր դիրքորոշում ունեն անհապաղ հրադադարի և փոխզիջումային խաղաղության համաձայնագրերի մշակման անհրաժեշտության վերաբերյալ, որը հաշվի կառնի տարածաշրջանի բոլոր պետությունների օրինական շահերը»,- ասվում է հայտարարության մեջ։
Կողմերն անդրադարձել են նաև Ուկրաինայի շուրջ ստեղծված իրավիճակին: Պուտինը շնորհակալություն է հայտնել Էրդողանին «համապատասխան բանակցային գործընթացի անցկացմանն աջակցելու անփոփոխ պատրաստակամության համար»։
«Հաշվի առնելով Սև ծովում Ռուսաստանին և Թուրքիային կապող գազատրանսպորտային ենթակառուցվածքներին ու առևտրային նավերին Կիևի հարվածներ հասցնելու փորձերը, ընդգծվել է Սևծովյան տարածքում անվտանգության համալիր ապահովման նպատակով համակարգված միջոցառումների կարևորությունը»,- ասված է հաղորդագրության մեջ:
ՌԴ նախագահի մամուլի ծառայությունը հայտնել է, որ քննարկվել են նաև «ռուս-թուրքական քաղաքական, առևտրային ու տնտեսական կապերի ընդլայնման հետագա քայլերը, մասնավորապես՝ էներգետիկայի ոլորտում համատեղ ռազմավարական նախագծերի իրականացումը»։
Հայտարարության համաձայն՝ հեռախոսազրույցը տեղի է ունեցել թուրքական կողմի նախաձեռնությամբ։
