Կրեմլում տեղի է ունեցել Հայաստանի Հանրապետության վարչապետ Նիկոլ Փաշինյանի հանդիպումը Ռուսաստանի Դաշնության նախագահ Վլադիմիր Պուտինի հետ։
Պուտինը խոսել է տնտեսական ցուցանիշների մասին, ընդգծել, որ տնտեսությունը լավ տեմպերով է զարգանում։
«Նախանցյալ տարում շրջանառությունը կազմել է 11 միլիարդ դոլար։ Իսկ նախորդ՝ 2025 թվականին՝ 6,4 միլիարդ։ Կցանկանայի ուշադրություն հրավիրել, որ, օրինակ, հարևան երկրի՝ Ադրբեջանի հետ այդ ցուցանիշը պակաս է հինգ միլիարդից՝ 4,9։ Այնուամենայնիվ, դա ինչ-որ բան վկայում է։ Եվ այդ 6,5 միլիարդից 1,2 միլիարդ դոլարը գյուղատնտեսական արտադրանք է։ Դա բանջարեղեն է, միրգ, գինի, այսինքն՝ այն ամենը, ինչ արտահանում է Հայաստանը։
Մենք տեսնում ենք, որ Հայաստանում ընթանում է քննարկում Եվրամիության հետ հարաբերությունների զարգացման վերաբերյալ։ Մենք դրան վերաբերվում ենք լիովին հանգիստ, հասկանում ենք, որ ցանկացած երկիր ձգտում է առավելագույն օգուտ քաղել երրորդ երկրների հետ համագործակցությունից։ Սակայն պետք է ակնհայտ լինի, պետք է ազնիվ կերպով, նախապես, ինչպես ասում են, ի սկզբանե ասված լինի, որ Եվրամիության հետ մաքսային միությունում լինելը և ԵԱՏՄ-ում գտնվելն անհնար է։ Դա պարզապես անհնար է։ Եվ հարցը նույնիսկ քաղաքական չէ, այլ զուտ տնտեսական բնույթի է։ Քանի որ որոշ հարցեր պահանջում են համատեղ մեծ աշխատանք, որը պետք է տարվի տարիներով։ Դա առանձին ապրանքային խմբերի գնահատման տարբերությունն է, այդ խմբերի մուտքը շուկա։ Դա բոլոր ապրանքների համար ֆիտոսանիտարական վերահսկողությունն է։ Ռուսաստանում և Եվրամիության երկրներում ֆիտոսանիտարական պահանջները լիովին տարբեր են, էապես տարբերվում են։ Կան նաև բազմաթիվ այլ խնդիրներ, որոնք այսօր, այս պահ, ինչ-որ պահի, գուցե տարիներ անց, մենք՝ ԵԱՏՄ-ն և Եվրամիությունը, հույս ունեմ, որ այդպես էլ կլինի, վերջիվերջո նույն մայրցամաքում ենք ապրում, կկարողանանք կարգավորել հարաբերությունները։
Նույնիսկ ուկրաինական ճգնաժամից առաջ, երբ փորձում էինք եվրոպացիների հետ պայմանավորվել, որպեսզի համատեղ ինչ-որ կերպ աշխատենք, ոչինչ չստացվեց։ Նրանք զբաղեցնում են շատ կոշտ դիրքորոշում՝ գործնականում յուրաքանչյուր հարցի շուրջ, նույնիսկ այնպիսի հարցերի, որոնք ինձ այն ժամանակ թվում էին մանր»,-ասել է Պուտինը։
Ի պատասխան Նիկոլ Փաշինյանը հայտնել է՝ հասկանում է, որ սկզբունքորեն երկու միավորումների անդամակցությունն անհամատեղելի է, սակայն այն, ինչ ՀՀ-ն անում է, և այն օրակարգը, որն ունի առնվազն այս պահին համատեղելի են։
«Քանի դեռ կա այդ օրակարգերը համատեղելու հնարավորություն, մենք կշարունակենք դրանք համատեղել։ Իսկ երբ գործընթացները կհասնեն այն կետին, երբ անհրաժեշտ կլինի որևէ որոշում ընդունել, ես վստահ եմ, որ մենք՝ նկատի ունեմ Հայաստանի Հանրապետության քաղաքացիներին, կընդունենք այդ որոշումը։
Իհարկե, այս համատեքստում Ռուսաստանի Դաշնության հետ մեր հարաբերությունները երբեք չեն եղել և չեն լինի կասկածի տակ, որովհետև, ինչպես արդեն նշել եմ, այս կապերն ու հարաբերությունները շատ խորն են և քննարկման ենթակա չեն»,-նշել է նա։
Մանրամասները՝ տեսանյութում։
