ՌԴ Վլադիմիր Պուտինը Կրեմլում բանակցություններ է վարել ՀՀ վարչապետ Նիկոլ Փաշինյանի հետ, որն աշխատանքային այցով ժամանել է Մոսկվա։
Քննարկվել են ռուս-հայկայան ռազմավարական գործընկերության և դաշինքի ներկա վիճակն ու հեռանկարները, եվրասիական տարածաշրջանում ինտեգրացիոն փոխգործակցությունը, ինչպես նաև տարածաշրջանային արդիական հարցեր, մասնավորապես՝ Հարավային Կովկասում տնտեսական, տրանսպորտային և լոգիստիկ կապերի զարգացումը։
Պուտինը նշել է, որ Ռուսաստանը և Հայաստանն ունեն հատուկ հարաբերություններ, որոնք կառուցվել են ոչ թե տասնամյակների, այլ դարերի ընթացքում։ «Մեզ միավորում են ընդհանուր պատմությունը և նախկին ժամանակներում համատեղ ջանքերով ընդհանուր խնդիրների լուծումը: Մեզ միավորում է նաև քաղաքակրթական ընդհանրությունը, ինչը չափազանց կարևոր է։ Ես մեկ անգամ ձեզ անձամբ ասել եմ և կարող եմ հրապարակավ ասել. մենք միշտ ընդունում ենք այն, ինչը օգուտ է բերում հայ ժողովրդին, և դուք միշտ կարող եք դա հաշվի առնել»,- նշել է ՌԴ նախագահը։
Պուտինն անդրադարձել է նաև հայ-ռուսական տնտեսական հարաբերություններին: «Ինչ վերաբերում է տնտեսությանը, այն զարգանում է լավ տեմպերով։ Նախանցյալ տարի շրջանառությունը կազմել է 11 միլիարդ դոլար, իսկ անցյալ տարի՝ 2025 թվականին, այն կազմել է 6,4 միլիարդ։ Ես կցանկանայի նշել, որ, օրինակ, հարևան Ադրբեջանի հետ այն հինգից պակաս է՝ 4,9 միլիարդ։ Այդ 6,5 միլիարդից 1,2 միլիարդ դոլարը գյուղատնտեսական արտադրանք է՝ բանջարեղեն, մրգեր, գինի՝ այն ամենը, ինչ Հայաստանն արտահանում է»,- ասել է Ռուսաստանի ղեկավարը։
Հանդիպման ընթացքում անդրադարձ է եղել նաև երկուստեք հարաբերությունների այլ ոլորտներին:
