ՀՀ կառավարությունը հավանություն տվեց Հայաստանի Հանրապետության կառավարության 2024 թվականի մայիսի 16-ի N 710-Լ որոշման մեջ լրացումներ և փոփոխություններ և Հայաստանի Հանրապետության կառավարության 2024 թվականի հունիսի 14-ի N 898-Լ որոշման մեջ փոփոխություններ կատարելու մասին հարցին։
«Խոսքը Ղարաբաղից տեղահանված ընտանիքների բնակարանային ապահովման պետական աջակցության ծրագրում փոփոխություններ անելու մասին է»,- ասաց վարչապետ Նիկոլ Փաշինյանը։
ԱՍՀ նախարար Արսեն Թորոսյանը նշեց, որ նախագծով առաջարկվում է ծրագրի արդյունավետության բարձրացման նպատակով կարգավորել իրավակիրառ պրակտիկայում ի հայտ եկած որոշ խնդիրներ, վերանայել ծրագրով սահմանված աջակցության չափերը։
«Մասնավորապես առաջարկում ենք ծրագրի շրջանակներում ընտանիքի անդամ դիտարկել մինչև 2026 թվականի դեկտեմբերի 31-ը ներառյալ ծնված երեխաներին՝ անկախ այն հանգամանքից, թե երբ են նրանք ներկայացրել առցանց դիմում-հայտարարությունը և ստացել ծրագրով նախատեսված հավաստագիրը, քանի որ ներկայում գործող իրավակարգավորմամբ 2025 թվականի հունվարի 1-ից մինչև 2026 թվականի դեկտեմբերի 31-ը ներառյալ ծնված երեխան համարվում է շահառու, եթե ընտանիքն առցանց դիմում-հայտարարություն ներկայացրել է, եթե ծրագրով նախատեսված հավաստագիրը ստացել է մինչև 2025 թվականի դեկտեմբերի 31-ը։
Մյուսով առաջարկում ենք սահմանել, որ գործող հիփոթեքային վարկի մարման աջակցությունից կարող են օգտվել նաև այն շահառուները, որոնք բնակելի անշարժ գույքի ձեռքբերման կամ անհատական բնակելի տան կառուցման նպատակով 2025 թվականի հուլիսի 1-ի դրությամբ ստացել են ոչ թե հիփոթեքային վարկ, այլ հիփոթեքային վարկի վերաֆինանսավորման նպատակով նրանց տրամադրվել է անշարժ գույքի գրավով սպառողական վարկ։ Առաջարկում ենք նաև սահմանել, որ եթե շահառուն դրական մնացորդը ցանկանում է իրացնել կահույքի կամ կենցաղային տեխնիկայի գնման ուղղությամբ, ապա այս դեպքում աջակցության գումարը փոխանցվում է վաճառողի բանկային հաշվին Հարկային օրենսգրքի 55-րդ հոդվածի 2-րդ մասի 1 և 5-րդ կետերով սահմանված փաստաթղթերի հիման վրա. դրանք են՝ հարկային հաշիվը, հաշիվ-վավերագիրը, հսկիչ-դրամարկղային կտրոնը, ԱՀ-ի վերադարձի հարկային հաշիվը, ապրանքի տեղափոխման բեռնագիրը, ներկայումս սահմանված է բացառապես հաշիվ-ապրանքագիրը, ինչը իրավակիրառ պրակտիկայում խնդիրներ է առաջացանում։
Մյուս կետով միջգերատեսչական հանձնաժողովի աշխատանքն առավել արդյունավետ կազմակերպելու նպատակով առաջարկում ենք սահմանել, որ ծրագրին դիմած և շահառուի կարգավիճակ չստացած դիմումատուի տվյալներն առկա են Ղարաբաղի անհատական հաշվառման տվյալների բազայում կամ ԿԳՄՍՆ-ի կողմից վարվող դպրոցների կառավարման տեղեկատվական համակարգում, որտեղ արտացոլված է տեղեկատվություն այն մասին, որ ծրագրին դիմած և շահառուի կարգավիճակ չստացած դիմումատուն 2020 թվականի սեպտեմբերի 27-ից 2022 թվականի դեկտեմբերի 12-ից առաջ առնվազն 12 ամիսների ընթացքում աշխատել կամ սովորել է Ղարաբաղում, ապա նրան շնորհվում է շահառուի կարգավիճակ՝ անկախ որոշմամբ սահմանված մյուս փաստաթղթերի առկայությունից: Այսինքն՝ ավելի դյուրինացնում ենք շահառուի կարգավիճակ ստանալը:
Վերջին առաջարկով՝ նախագծով առաջարկվում է վերանայել ծրագրով սահմանված աջակցության չափը՝ մասնավորապես ընդլայնել 4 մլն դրամ սահմանաչափով բնակավայրերի ցանկը, որոնք ներկայումս 611-ն են, և ավելացնել դրանք 150 բնակավայրով, և խոսքը վերաբերում է Երևանին սահմանակից համայնքներին։ Նախկինում Երևանի և Երևանին սահմանակից համայնքների դեպքում սերտիֆիկատների իրացման ժամանակ կարող էին շահառուները ստանալ 3 մլն դրամի փոխհատուցում, իսկ հիմա Երևանից բացի Երևանին սահմանակից համայնքների դեպքում կդառնա 4 մլն դրամ, այսինքն՝ կլինի Երևանը՝ 3, որոշ սահմանամերձ համայնքներ, որոնք 5-ն են, կմնան 5, մնացած բոլորը կդառնան 4։
Մինչև այս պահը երեկվա դրությամբ սերտիֆիկատների տրամադրման և իրացման մենք ունենք 5232 տրված սերտիֆիկատ, որից իրացվել է 2336-ը։ Այսինքն՝ արդեն ձեռք են բերել կամ սկսել են տուն կառուցել»,- նշեց Արսեն Թորոսյանը։
