Իրանը և Միացյալ Նահանգները Ժնևում կքննարկեն Թեհրանի միջուկային ծրագիրը, սակայն եթե հետագայում Իրանը հրաժարվի քննարկել բալիստիկ հրթիռները, ապա դա մեծ խնդիր կառաջացնի՝ հայտարարել է ԱՄՆ պետքարտուղար Մարկո Ռուբիոն: Նրա խոսքով՝ Իրանը փորձում է միջմայրցամաքային բալիստիկ հրթիռներ ստեղծել, ունի մեծ քանակությամբ փոքր հեռահարության բալիստիկ հրթիռներ, որոնք սպառնալիք են ներկայացնում տարածաշրջանում ամերիկյան ռազմակայանների և ԱՄՆ գործընկերների համար: Ռուբիոն միաժամանակ շեշտել է՝ նախագահ Դոնալդ Թրամփը ցանկանում է դիվանագիտական լուծում գտնել:
ԱՄՆ փոխնախագահ Ջեյ Դի Վենսն իր հերթին հայտարարել է՝ Վաշինգտոնն ունի վկայություններ, որ Իրանը փորձում է վերսկսել միջուկային զենքի ստեղծումը, իսկ իրենք դա չեն կարող թույլ տալ: Վենսի խոսքով՝ ԱՄՆ նախագահը ձգտում է միջուկային խնդրի խաղաղ կարգավորման հասնել, սակայն ունի նաև այլ տարբերակներ:
Ժնևում բանակցությունների երրորդ փուլին ընդառաջ, Իրանի արտգործնախարար Աբբաս Արաղչին հայտարարել է, որ ԱՄՆ-ի հետ հնարավոր է հասնել արդար համաձայնության: Նա կրկնել է՝ Իրանը միջուկային զենք չի ստեղծի, սակայն իրավունք ունի միջուկային տեխնոլոգիան օգտագործել խաղաղ նպատակներով: Թեհրանը պատրաստ է զիջումների, և դրա դիմաց սպասում է պատժամիջոցների չեղարկման, հավելել է դիվանագետը: Արաղչին նաև նշել է՝ եթե ԱՄՆ-ն որոշի հարվածել Իրանին, ապա տարածաշրջանում ամերիկյան ռազմակայաններն օրինական թիրախ կդառնան:
Ավելի վաղ Ատոմային Էներգիայի միջազգային գործակալության տնօրեն Ռաֆայել Գրոսսին կոչ է արել կողմերին համաձայնության հասնել, այլապես հակամարտությունը կարող է տարածվել Իրանի սահմաններից այն կողմ:
Չնայած սպասվող բանակցություններին՝ ԱՄՆ-ն նոր պատժամիջոցներ է կիրառել Իրանի 4 քաղաքացու, տասից ավելի նավի և Իրանի հետ կապերի համար մեղադրվող 16 ընկերության նկատմամբ, որոնք գրանցած են տարբեր երկրներում, այդ թվում՝ Թուրքիայում, Պանամայում, Մարշալյան կղզիներում:
Մանրամասները՝ Սյուզաննա Չրաղյանի ռեպորտաժում:
