Սլովակիան դադարեցնում է Ուկրաինային արտակարգ էլեկտրաէներգիայի մատակարարումը։ Այս մասին հայտարարել է վարչապետ Ռոբերտ Ֆիցոն՝ նշելով, որ որոշումը Բրատիսլավայի պատասխանն է Կիևի կողմից «Դրուժբա» խողովակաշարով ռուսական նավթի տարանցման դադարեցմանը։
Ֆիցոն ընդգծել է՝ նույնիսկ եթե Ուկրաինան Սլովակիայից օգնություն խնդրի էներգետիկ ցանցի կայունացման հարցում, այն չի ստանա։
Սլովակիայի վարչապետի հայտարարություններին ի պատասխան՝ «Ուկրէներգո» ազգային էներգետիկ ընկերությունը հայտարարել է, որ Սլովակիայից արտակարգ էլեկտրաէներգիայի մատակարարումների հնարավոր դադարեցումը չի ազդի Ուկրաինայի միասնական էներգետիկ համակարգում տիրող իրավիճակի վրա։
«Վերջին անգամ Ուկրաինան Սլովակիայից արտակարգ օգնություն է խնդրել մեկ ամսից ավելի առաջ, և այն շատ սահմանափակ է եղել։ Ընդհանուր առմամբ, Սլովակիայից Ուկրաինայի միասնական էլեկտրացանցին արտակարգ օգնություն բավականին հազվադեպ է տրամադրվել։ Սրանք կարճաժամկետ մատակարարումներ էին»,- նշել է ընկերությունը։
«Ուկրէներգոն» դեռևս որևէ պաշտոնական փաստաթուղթ չի ստացել Սլովակիայի համակարգի օպերատոր SEPS-ի կողմից արտակարգ օգնության փոխադարձ տրամադրման մասին համաձայնագրի միակողմանի դադարեցման վերաբերյալ։
Ռուսաստանից նավթի տարանցումը դադարեցվել էր այն բանից հետո, երբ ռուսական բանակը հունվարի 27-ին հարվածել է «Դրուժբա» խողովակաշարին։ Սլովակիան և Հունգարիան արդեն դադարեցրել են Ուկրաինային դիզելային վառելիքի մատակարարումը՝ հունվարի 27-ից Ուկրաինայի տարածքով անցնող «Դրուժբա» խողովակաշարով ռուսական նավթի մատակարարումների դադարեցման պատճառով։ Բրատիսլավան և Բուդապեշտը Կիևին մեղադրել են քաղաքական պատճառներով խողովակաշարի վերանորոգումը դիտավորյալ հետաձգելու համար։
Սլովակիայի վարչապետ Ռոբերտ Ֆիցոն ավելի վաղ հայտարարել էր, որ կատարել է Կիևին էլեկտրաէներգիայի արտակարգ մատակարարումը դադարեցնելու խոստումը։
