ԵՄ առաջնորդները ոչ պաշտոնական գագաթնաժողովում քննարկել են, թե ինչպես կարելի է ԵՄ տնտեսությունը մրցունակ դարձնել ԱՄՆ-ի և Չինաստանի ճնշման պայմաններում: Գերմանիայի կանցլերը և Ֆրանսիայի նախագահը միասնական են եղել նպատակների հարցում, սակայն տարբեր՝ մեթոդների հարցում:
Բելգիական Ալդեն-Բիզեն ամրոցում կայացած ոչ պաշտոնական գագաթնաժողովը նվիրված է եղել ԵՄ տնտեսության մրցունակության հարցին, որը դժվարություններ է ունենում բյուրոկրատիայի, միասնական եվրոպական շուկայի ներսում առկա խոչընդոտների, էներգակիրների բարձր գների և Չինաստանի ու ԱՄՆ-ի կողմից աճող մրցակցության պատճառով՝ նշել է DPA գործակալությունը:
Միևնույն ժամանակ, գագաթնաժողովից հետո ԵՄ 27 պետությունների և կառավարությունների ղեկավարները հայտարարել են իրենց առևտրային հարաբերությունները դիվերսիֆիկացնելու անհրաժեշտության մասին՝ ԱՄՆ-ից և Չինաստանից կախվածությունը նվազեցնելու համար: Նրանք նաև համաձայնել են թեթևացնել բյուրոկրատական բեռը եվրոպական ընկերությունների համար: Նման ծանրաբեռնվածությունը կապված է, մասնավորապես, բնապահպանական նորմերի հետ։
Եվրահանձնաժողովի նախագահ Ուրսուլա ֆոն դեր Լայենը հայտարարել է, որ մարտին կայանալիք ԵՄ գագաթնաժողովին կառաջարկվի «Մեկ Եվրոպա, մեկ շուկա» գործողությունների ծրագիր, որը, ըստ նրա, կկենտրոնանա հինգ թեմայի ուղղությամբ՝ բյուրոկրատիայի կրճատում, միասնական շուկա, էներգետիկ շուկա, թվայնացում և առևտուր։
