Փետրվարի 9-ին Մարդու իրավունքների պաշտպան Անահիտ Մանասյանն ընդունել է Հայաստանի արհմիությունների կոնֆեդերացիայի նախագահ Էլեն Մանասերյանին և նախագահի տեղակալ Տիրուհի Նազարեթյանին:
Ողջունելով հյուրերին՝ Անահիտ Մանասյանը ներկայացրել է հաստատության գործունեության հիմնական ուղղությունները՝ ընդգծելով աշխատանքային իրավունքների ոլորտում մարդու իրավունքների պաշտպանության առաջնահերթությունը և այդ ուղղությամբ իրականացվող աշխատանքները։
Քննարկման առանցքային թեմաներն են եղել Հայաստանի Հանրապետությունում աշխատանքային իրավունքի ոլորտում առկա խնդիրները, այդ թվում՝ աշխատողների աշխատանքային և սոցիալական իրավունքների պաշտպանությանն առնչվող հարցերը։ Անդրադարձ է կատարվել գործադուլի իրավունքի իրացման հետ կապված խնդիրներին, այս ոլորտում լուրջ օրենսդրական ու ինստիտուցիոնալ փոփոխություններ կատարելու անհրաժեշտությանը։
Քննարկվել են նաև նվազագույն աշխատավարձի սահմանման, առողջ և անվտանգ աշխատանքային պայմանների երաշխավորման, միավորման ազատության իրավունքի իրացման, աշխատանքային իրավունքների պաշտպանության անհրաժեշտ կառուցակարգերի բացակայության, ինչպես նաև ոլորտում արձանագրվող ընթացիկ գործընթացներին վերաբերելի հարցեր։
Կողմերը կարևորել են ոլորտում ինստիտուցիոնալ համագործակցության ամրապնդման կարևորությունը։
Հանդիպման ավարտին կողմերը վերահաստատել են հանձնառությունը` շարունակելու և ակտիվացնելու համագործակցությունը աշխատողների իրավունքների պաշտպանության և արժանապատիվ աշխատանքային միջավայրի զարգացմանը նպաստելու ուղղությամբ:
