Կառավարության՝ հունվարի 29-ի նիստին վարչապետ Նիկոլ Փաշինյանը հետաքրքրվեց՝ խցանումների թեմայով ստացվո՞ւմ է գործակցությունը գործադիրի և Երևանի քաղաքապետարանի միջև:
Փոխվարչապետ Տիգրան Խաչատրյանը պատասխանեց՝ վարչապետի հանձնարարությամբ ձևավորված աշխատանքային խումբն արդեն երկու աշխատանքային հանդիպում է արել: Արձանագրվել են հիմնական անելիքները, որոնք կարող են առաջին փուլում էական նշանակություն ունենալ, որոշվել է երկարաժամկետ, միջնաժամկետ և կարճաժամկետ անելիքների պլանը: Քննարկումները շարունակվում են:
Ըստ փոխվարչապետի՝ կա մի փաստ, որի հետ առնվազն պետք է հաշվի նստել:
«Բոլոր մեծ քաղաքներում այս խնդիրը կա՝ կապված մարդկանց եկամուտների ավելացման, տրանսպորտային սեփական միջոցներ ունենալու՝ ավելի բարձր հակվածության հարցերի հետ: Եվ շատ քաղաքներ (չասեմ՝ մենք էլ ենք ստիպված լինելու այդ խնդրի հետ առերեսվել) հավասարակշռությունը գտնում են այնտեղ, երբ մի կողմից այդ մեքենաների ավելացումը հասնում է մի կետի, որ մարդիկ արդեն հասկանում են, որ դա ամենահարմար եղանակը չէ սեփական տրասնպորտային միջոցներով ժամերով մնալ խցանումների մեջ (մենք, իհարկե, դեռ ժամերով մնալու փաստ չունենք, ունենք ժամի սահմաններում), բայց, մյուս կողմից, նաև փոխկապակցված հարցեր կան. դա առաջին հերթին Երևան քաղաքում հանրային տրանսպորտի ծառայությունների որակի բարձրացումն է առաջնահերթորեն:
Այս բոլորը պետք է միաժամանակ տեղի ունենա, որ կարողանանք միջնաժամկետում կայուն արդյունք արձանագրել»,- ասաց փոխվարչապետը:
Փաշինյանն արձագանքեց՝ պետք է ինստիտուցիոնալ մեխանիզմներ ունենալ, այդ թվում՝ արհեստական բանականության ներառմամբ: Վարչապետը միևնույն ժամանակ նկատեց՝ խնդիրը, այնուամենայնիվ, առաջիկա տասնամյակների ընթացքում լինելու է:
Երևանի քաղաքապետ Տիգրան Ավինյանը ևս արձագանքեց՝ նկատելով, որ մարդատար մեքենաների թիվը մեծ տեմպերով է ավելանում, իսկ լուծումները մի քանիսն են:
Առաջինը երթևեկության կառավարումն է արհեստական բանականությամբ լուսացույցերի ներդրմամբ, որը կտևի մոտ 1,5 տարի: Մեկ այլ լուծում է 250 հատ 18 մետրանոց ավտոբուսների գնումը: Երրորդը «Աջափնյակ» մետրոյի կառուցումն է, որը 22 տոկոսով կավելացնի մետրոյից օգտվողների թիվը:
«Ինչ-որ մի կետում, երբ մենք հասկանանք, որ մարդատար ավտոմեքենաների քանակը գնալով ավելանում է քաղաքում, մենք պետք է մտածենք սահմանափակումների մասին: Բայց սա այն պահին, երբ ունենանք նվազագույնը վերգետնյա հանրային տրանսպորտի ամբողջությամբ իրականացված ծրագիր»,- ասաց Ավինյանը:
